— We aimorĩ ĩsiré, te aima hâi'ré da, rob'manharĩ pipa na rowairébézé za ihâimana hã pi'õ siwa'âbâ zô 're isi'rui mono dama isa'ẽtẽ ãma, panho'u i'ahâ 'rata isãmra ãma. 2 Apito norĩ daro mono bâ 're ihâimana za'ra mono hã ma tô taha ãma hâimana nhiséb ãna ãma siwasété za'ra. Duré dawamri mono bâ 're idahâimana za'ra mono hã ma tô ãma tasi'rãiwamnarĩ pese za'ra ni, pi'õ ihâimana nhiséb õ na, uva 'rãi wa'u isé da te 're âhuri za'ẽtẽ mono wa, siwa'ru marĩ, da te 're i'manharĩ wasété za'ra mono ne.

3 Tawamhã 'Re ihâimana u'âsi mono Pẽ'ẽzani hã ma tô ĩ'â. Tahawa hâiwa hawi romhuri'wa hã ma tô ĩzaprõ, rop si 're irosa'wari mono u. Tame wa tô 'madâ, pi'õ ropoto siwamnarĩ ipré nhisiwi isãmra hã. Ropoto siwamnarĩ hâiba na rob'ui'éré te tihâimana za'ra, 'Re ihâimana u'âsi mono ãma te te 're iwasété mono zé hã. I'rã hã 7 na te tãma tihâimana za'ra, duré 10 na i'u hã. 4 Pi'õi uza hã ihâpré warõ tâ'â na hã, duré ihâpré pese na zama. Duré ãma isiwamnarĩzé hã ẽtẽ waipo pré oru na duré ẽtẽ'ubuzi iwa'âbâ za'ẽtẽ mono na duré a'é tõmo wawẽ ne pérola na isisi na. Tinhib'ratamhã te hâsizé hã 're ti'â, ẽtẽ waipo pré oru 'manharĩ hã, uva 'rãi wa'u isé na 'masisi na. Ta hã marĩ iwasédé te te 're i'ab'manharĩ mono zé te wasu'u, duré hâimana nhiséb ãna aibâ na 're ihâimana mono zéb zama. 5 Duré i'uihâi ãma rob'ui'éré na iwamri te tihâiba, sõ'awi ihâimana õ hã, ãne: “Babilonia 'ri nho'u isa'ẽne, uburé pi'õ norĩ siwa'âbâ zô 're isi'ru za'ra mono norĩ na, duré daro mono bâ dahâimana nhiséb ãna 're idahâimana wasété za'ra mono norĩ na.” 6 Tawamhã wa tô 'madâ, pi'õ hã isi'rãiwamnarĩ na 'Re ihâimana u'âsi mono nhib'a'uwẽ norĩ wapru na duré ni'wam norĩ, da te isimro norĩ wapru na, Zezusihi zazei'wai wa isipizari za'ra õ norĩ hã.

Te 'madâ'â wamhã, wa ãma ĩtob'uzui pese. 7 Tahawa hâiwa hawi romhuri'wa hã ma tô ĩzadanha, ãne:

— E marĩ da, ma ãma atob'uzu. Sõ'awi ihâimana õ hã wa za aima hâi'ré, pi'õ te te iwasu'u hã duré ropoto siwamnarĩ pi'õ, isisi isãmra wasu'u zama. Ropoto siwamnarĩ ma, 7 na i'rã tãma ihâimana za'ra hã duré 10 na i'u hã. 8 Ropoto siwamnarĩ i'madâ hã hâiba ré te aré tihâiba. Tane nherẽ, ãhã na hã hâimana õ di oto. Ta hã oto ab're 'rehâ hawi iwatobro da si. Ta hawi te za tô watobro. Watobro wamhã, 'Re ihâimana u'âsi mono hã te za uprosi za. Ti'ai ãma 're idahâimana za'ra mono norĩ, ropoto na'rata hawim haré Ibaihâ na rob'ui'éré dahâimanazé isi'utõrĩ'õ ãma za 're idahâimana u'âsi za'ra mono norĩ nhisi na dame ihâimana za'ra õ norĩ hã, te za ãma 're tob'uzu za'ra, ropoto siwamnarĩ te te 're 'madâ'â za'ra mono wamhã. Ta hã te aré hâiba ré tihâiba. Tane nherẽ, ãhã na hã oto hâimana õ di. Tane nherẽ, apâ te za sihâi'ré za.

9 — Ã hã, ni'wa hã 'rãiwaihu'u wẽ wapsi, te za waihu'u. 7 na i'rã te te iwasu'u za'ra hã 7 na ẽtẽ 'rãihâ norĩ te wasu'u za'ra, pi'õ isisiwib za'ra isãmra hã. Ta norĩ hã 7 na apito norĩ te duré wasu'u za'ra. 10 Imrotõ na hã ma tô wairé. Tane nherẽ, misi te zahadu te te 're da'a'madâ'â. Duré da'rãsutu'wa hã zahadu sihâi'ré õ di. Ta hã sihâi'ré wamhã, te za te te 're da'a'madâ'â hutu. 11 Ropoto siwamnarĩ aré hâiba ré nherẽ, ãhã na hâiba ré ihâimana õ hã, ta hã 8 ãma apito na 're ihâimana mono, te wasu'u. Duré ta hã 7 na ihâimana za'ra siré hã, duré 'Re ihâimana u'âsi mono za te te i'upro.

12 — I'u hã 10 na i'madâ'â za'ra hã, 10 na apito norĩ te wasu'u, te te 're ida'madâ'â za'ra mono na zahadu te te ãma isãna'rata za'ra õ. Ta norĩ ma, zahadu te za tãma sõmri za'ra ni za, ropoto siwamnarĩ siré simiroti pire na te te 're da'madâ'â za'ra mono da, ro'rutu na. 13 Apito norĩ 10 na ihâiba za'ra hã, misi haré simisutu isimiroti za'ra hã. Tahawa ta norĩ hã ropoto siwamnarĩ ma, te za sõmri za'ra za, tinhiptede duré isimiroti pire tãma 're ihâimana za'ra mono. 14 Tawamhã ta norĩ hã te za siwi 'wapé za, Pone'ẽrebâ i'rare hã. Tane nherẽ, ta hã te za ãma ai'uté za'ra za, Uburé Danhib'apito, ti'ai ãma danhib'apito norĩ nhipai u 're hâimana mono wa, duré Õhõ si misire Apito wa, ti'ai ãma uburé apito norĩ nhipai u. Taha siré te za da'ãma ai'uté za'ra za, sima sô ihârâ za'ra norĩ hã, te te sima i'apisudu, umnhasi na tãma 're ihâimana za'ra mono hã.

15 Tawamhã hâiwa hawi romhuri'wa hã ma tô duré ĩma tinha, ãne:

— Panho'õmo norĩ i'ab'madâ hã, pi'õ siwa'âbâ zô 're isi'rui mono i'rata isãmra hã, ta norĩ hã dahâimanazé mono bâ 're idahâimana za'ra mono norĩ, duré dawamri mono bâ, duré dapoto mono bâ, duré damreme sipo'o mono bâ 're idamreme zusi mono norĩ, te wasu'u za'ra. 16 Ropoto siwamnarĩ duré 10 na i'u i'madâ'â za'ra hã, ta norĩ hã te za pi'õ siwa'âbâ zô 're isi'rui mono hã te te 're 'ruiwapari za'ra. Ta norĩ hã te za uburé marĩ tiwi sani za'ra. Tawamhã te za siwi tirẽ, ai'uréiwi. Inhi hã te za duré siwi ti'rẽ. Taha parimhã te za unhama na ãma siwi sazu. 17 Ãne hã te za 10 na apito norĩ hã 'manharĩ za'ra, 'Re ihâimana u'âsi mono hã ipẽ'ẽ 're te te tãma séme wa, ãne hã te te sima iwẽ za'ra zéb zarina te te 'manharĩ za'ra da hã. Ãne zarina te za ãma sisaze za'ra za, tinhimiroti pire hã ropoto siwamnarĩ ma, te te sõmri za'ra da, te te ãma 're ida'madâ'â za'ra mono zé hã. Ãne hã te za tiromhâiba, 'Re ihâimana u'âsi mono nhimiroti te te sina i'uwaimramizéb u.

18 — Pi'õ i'madâ hã, ta hã 'ri nho'u isa'ẽne, apito norĩ ropâ 're ihâimana za'ra mono norĩ ma, simiroti pire na 're ihâimana mono.