— Mo oto ai'aba'réi wa'aba, ti'ai u sa'wari za'ra wa'aba da, 7 na u'awi 're, 'Re ihâimana u'âsi mono zahizé ihâimana za'ra hã.

2 Tawamhã hâiwa hawi romhuri'wa imorĩ'rada hã ma tô mo. Ma tô sa'wa, tite u'awi wa, ti'ai u. Te te sa'wari wamhã, da'wa're ipipa uptabi hã duré isé uptabi hã ma tô ãma wairé, ropoto siwamnarĩ hâiba te na ui'éré ré, ãma iwata za'ra norĩ ãma.

3 Isãna're ãma hâiwa hawi romhuri'wa hã tite u'awi wa, ma tô sa'wa, â poré wa. Te te sa'wari wamhã, â poré hã ma tô dawapru na si'manha, idâ'â wapru ne. Tahawa, ma tô uburé si'utõrĩ, â poré na 're inomro mono norĩ hã.

4 Tawamhã si'ubdatõ ãma hâiwa hawi romhuri'wa hã ma tô tite u'awi wamhã sa'wa, panho'õmo mono wa, duré ub're norĩ wab zama. Te te sa'wari wamhã, panho'õmo norĩ hã duré ub're norĩ hã ma tô dawapru na si'manharĩ za'ra. 5 Tawamhã wa tô wapa hâiwa hawi romhuri'wa, â mono bâ â ma isimiroti pire te te nharĩ ré hã, ãne:

— 'Re ihâimana u'âsi mono I'aiwasété õ, a hã i'uwaibaba na si te uburé marĩ na 're i'arowairébé mo. Ãhã na te õne u'âsi 're aihâimana mo. Duré, duréi uptabi marĩ õ uptabi ré 're i'aihâimana mono. 6 'Re inomro wasété mono norĩ hã ma tô asib'a'uwẽ norĩ te te 're simro, duré asadawa 'mahârâ'wa norĩ zama. Tahawa, ma tô dawapru hã tãma isõmri za'ra, te te âhuri da. Ta norĩ ma, te tô ibâre tãma tihâimana za'ra, iwa'rãmimhã.

7 Tawamhã damreme, danhoprubzéb zatazém hawimhã ma tô we tinha, ãne:

— Uburé Danhib'apito 'Re ihâimana u'âsi mono, I'aiwaihu'u pese uptabi! 'Re i'arowairébé mono zé hã, tô sena uptabi duré i'uwaibaba uptabi si!

8 Taha pari maparane si'uiwa na ãma, hâiwa hawi romhuri'wa hã u'awi wamhã, ma tô duré tite sa'wa, bâtâ nhisiwi. Te te sa'wari wamhã, bâtâ ma, ma tô rowairébé hã tihâiba, wa'ro uptabi wa, te te da'ahâiba zata da. 9 Tahawa, ma tô bâtâ ro'o wa'ro uptabi hã dazata za'ra. Ãne wa, ma tô duré 'Re ihâimana u'âsi mono ãma wasété za'ra ni, ta hã simiroti pire uptabi nherẽ, ã hã rob'manharĩ pipa ma hã. Tane nherẽ, 'Re ihâimana u'âsi mono ma siwẽ'õ za'ra õ di, tiwasété na sisãmri za'ra wa. Duré ãma wata za'ra õ di.

10 Tawamhã imrotõ ãma hâiwa hawi romhuri'wa hã ma tô duré sa'wa tite u'awi wamhã, ropoto siwamnarĩ â poré hawi iwatobro simasisizém nhisiwi. Te te sa'wari wamhã, ma tô tirobra, te te 're ida'a'madâ'â mono zéb 'remhã, daro mono bâ. Ma tô duré nasi tasihâzum ni danhoto wi, robzé te. 11 Dahâzé uptabi za'ra wa, duré ida'u'a za'ra u'âbâ ma tô 'Re ihâimana u'âsi mono ãma wasété za'ra ni. Tane nherẽ, dawasédé, da te 're i'manharĩ za'ra mono zém na dasisãmri za'ra õ di, 'Re ihâimana u'âsi mono u dasipizari za'ra da hã.

12 Tawamhã imropâ ãma hâiwa hawi romhuri'wa hã tite u'awi wamhã, ma tô duré sa'wa, panho'u Eufrati nhisiwi. Te te sa'wari wamhã, panho'u hã ma tô ti'â 'ré, bâdâdi hã oto hâimana da, bâtâ pusizém hawi apito norĩ ma, isiré dasi'wapéi 'manharĩ'wa norĩ ma zama â ãna te te saprĩ za'ra da. 13 Tawamhã wa tô 'madâ'â za'ra, wa'uburé iwasété uptabi norĩ hã uti hâiba ne, ho'orã hâiba ne ropoto siwamnarĩ zadai'ré hawi wairébé ré, duré ropoto siwamnarĩ zadai'ré hawi, duré senai'õ na 'Re ihâimana u'âsi mono zadawa 'mahârâ'wa zadai'ré hawib zama. 14 Ta norĩ hã, wa'uburé norĩ te te 're iromhõsi za'ra mono. Ta norĩ hã te za ropé ropâ, apito norĩ hã te te 'rã'õtõ za'ra da, Bâdâ Ipire 'Re ihâimana u'âsi mono Iwaihu'u pese uptabi te, za iwisi ãma te te siwi 'wapé da.

15 “Ĩwapari za'ra wa'aba! Isimisaihuri zô 're danhimipari za'ra mono õ nherẽ, danhorõwa u 're isisisi mono ne, wa za wei mo apâ. Simiza'rese 're ihâimana u'âsi mono ma hã, tãma 're rowẽ uptabi mono di za, duré 're isi'uza u'âsi mono ma hã, ai'uréiwi 're hâimana mono tõ da, danho'a 're sisé mono tõ da!”

16 Tawamhã si'ubdatõ wa'uburé norĩ hã ma tô apito norĩ hã 'rã'õtõ za'ra, dasi'wapéi 'manharĩ'wa norĩ zama, ro Ebreu norĩ mreme na iwamri u, ãne: “Armazedõ”.

17 Tawamhã hâiwa hawi romhuri'wa 7 ãma hã ma tô duré tite u'awi wamhã sa'wa, hâiwa nho're ãma rowa'u'u na. Te te sa'wari wamhã, Apito simasisizém hawi damreme 'rãihâ hã 'Re ihâimana u'âsi mono nhorõwa 'ri 'rãihâ hawi te we tinha, ãne:

— Tâibâ oto!

18 Tawamhã tãsi'ubuzi hã ma tô watobro, duré tãirãrã hã, duré tãiwapsa hã, duré ti'ai popo isa'ẽtẽ uptabi hã. Ã hã ti'ai popo isa'ẽtẽ uptabi, niwa ãne iwatobro õ, ropoto na'rata hawim haré. 19 Tawamhã 'ri nho'u isa'ẽtẽ uptabi hã ma tô aipru, si'ubdatõ iwa'õtõ na. Duré 'ri nho'õmo mono hã ma tô aiprub za'ra, ti'ai wa'õtõ nho'õmo mono bâ 're ihâimana za'ra mono hã. Tawamhã 'Re ihâimana u'âsi mono hã ma tô ãma sipo're pu'u, Babilonia 'ri nho'u isa'ẽtẽ ãma hã. Tahawa uva 'rãi wa'u isé uptabi, da te 're i'âhuri mono ne ma tô tizahizé tãma tisõ, uva 'rãi wa'u zé ne tizahizé hã. 20 Tawamhã uburé rob'ré za'iti norĩ hã ma tô aimani za'ra, duré uburé ẽtẽ 'rãihâ norĩ zama. 21 Tãzâ hã ma tô duré danhisiwi rere. Tãzâ isa'ẽtẽ uptabi hã 30 na ipire pibuzé hã. Tahawa, ma tô 'Re ihâimana u'âsi mono ãma wasété za'ra ni, tãzâ hã sisa'wari wa, ta hã pipa uptabi wa.