7 na hâiwa hawi romhuri'wa norĩ, duré 7 na rob'manharĩ pipa ihâimana za'ra zé
15
Tawamhã wa tô duré 'madâ, hâiwa na marĩ iwaihu'u'õ duré ãma idatob'uzu za'ra hã. Ta norĩ hã 7 na hâiwa hawi romhuri'wa norĩ, 7 na rob'manharĩ pipa tãma ihâimana za'ra. E marĩ wa. Ã norĩ na za oto ibâ na hâimana za'ra wa, 'Re ihâimana u'âsi mono zahizé hã.2 Tawamhã wa tô duré 'madâ, marĩ hã. Ta hã â poré, simhi isarob'a uptabi ne, unhama na iwazari ré hã. Wa tô duré 'madâ'â za'ra, ropoto siwamnarĩ ãma duré isine ihâiba 'manharĩ ãmab zama ai'uté'wa norĩ hã, tô ropoto siwamnarĩ nhisi na daza'ratazém na. Ta norĩ hã te rowamremezé harpa hã tété za'ra, 'Re ihâimana u'âsi mono te te tãma isõmri za'ra hã. 3 Ta norĩ hã te tinho're za'ra, Mozési 'Re ihâimana u'âsi mono ma romhuri'wa nho'rezém na, duré Pone'ẽrebâ i'rare nho'rezém na zama, ãne:
“Uburé Danhib'apito 'Re ihâimana u'âsi mono, i'aiwaihu'u pese uptabi, asimiromhuri hã isa'ẽtẽ uptabi si duré iwẽ uptabi si!
Aiwétési Apito dawamri mono bâ 're idahâimana za'ra mono norĩ ma hã, e niha ate bâdâdi hã i'uwaibaba si duré sena uptabi si.
4 Uburé Danhib'apito, e 'wa hã te te aiwazéb ãna hâimana da bâ.
E 'wa hã asisi na ai'ãma wata õ da bâ.
E marĩ wa. Aiwétési aiwasété õ wa.
Uburé dapoto mono bâ 're idahâimana za'ra mono hã te za asõ're u we 're danomro.
Te za duré ai'ãma 're dawata za'ra, i'uwaibaba na si uburé marĩ 're i'a'manharĩ mono zé hã sõ'awi oto 're hâimana za'ra mono wa.”
5 Taha parimhã, wa tô duré rob'madâ. Te rob'madâ'â wamhã, wa tô 'madâ, hâiwa ãma 'Re ihâimana u'âsi mono nhorõwa 'ri 'rãihâ isi'ridawa na. Ta hã romhâ 'manharĩ na 'ri, 'Re ihâimana u'âsi mono 're isãmra mono zé. 6 Hâiwa hawi romhuri'wa norĩ 7 na ihâiba za'ra norĩ, 7 na rob'manharĩ pipa tãma ihâimana za'ra hã ma tô wairé, 'Re ihâimana u'âsi mono nhorõwa 'ri 'rãihâ hawi. I'uza hâirã uptabi ré duré ihâ si'ubuzi ré ma tô wairé, duré ẽtẽ waipo pré oru 'manharĩ na sõ'utu wa'rãmi ré zama. 7 Tawamhã maparane si'uiwa na ropodo ihâiba ré norĩ ihâimana za'ra 'remhã ma tô misi tãma sõmri za'ra, 7 na hâiwa hawi romhuri'wa norĩ ma, 7 na u'awi i'masi hã 'Re ihâimana u'âsi mono zahizém na, õne u'âsi 're ihâimana mono zahizé hã. 8 Tawamhã hâiwa ãma 'ri 'rãihâ ãma ma tô romnhizé hã rob'utõ, 'Re ihâimana u'âsi mono te, rowa'a za'ẽtẽ hawimhã duré iwaihu'u pese uptabi hawib zama. Tawamhã duré ni'wa hã sébré waihu'u õ di, 7 na rob'manharĩ pipa hâiwa hawi romhuri'wa norĩ te te 'rãsutu za'ra õ ré hã.