Pone'ẽrebâ i'rare, duré 144 miu na ihâiba za'ra norĩ
14
Taha parimhã wa tô duré rob'madâ. Te rob'madâ'â wamhã, wa tô 'madâ, Pone'ẽrebâ i'rare hâiwi isam na Siã na ẽtẽ 'rãihâ nhisi ãma. Te duré isiré tihâimana za'ra 144 miu na dahâiba hã, i'uihâi ãma Pone'ẽrebâ i'rare nhisi na duré Imama nhisi na zama rob'ui'éré ré norĩ hã. 2 Tawamhã wa tô wapa hâiwa hawi damreme hã, â'a'a za'ẽtẽ ruru'u ne imreme hã, niwamhã tãi rãrã'ã za'ẽtẽ ruru'u ne zama. Damreme te iwapari hã harpa na rowamremezém na rowamreme'wa norĩ, te te 're irowamreme za'ra mono ne. 3 Tawamhã danho're itém na ma tô tinho're za'ra, apito simasisizém nho're duré maparane si'uiwa na ropodo ihâiba ré norĩ nho're, duré dama ipire norĩ nho'reb zama. Tawamhã ni'wa hã danho're te te iwaihu'u da hã waihu'u õ di, 144 miu na ihâiba za'ra norĩ upana hã. Ta norĩ si ma tô 'Re ihâimana u'âsi mono hã sima wa'âbâ za'ra, ti'ai ãma 're idahâimana za'ra mono norĩ wazari 're ihâimana za'ra mono hawimhã. 4 Ã norĩ hã marĩ iwasété na 're isiwasété za'ra mono õ norĩ, pi'õ na 're siwasété za'ra mono õ wa. Pone'ẽrebâ i'rare nhirã zarina si ma tô 're nomro. Ti'ai ãma uburé a'uwẽ norĩ 're ihâimana za'ra mono norĩ wazarimhã, ma tô ã norĩ si wa'âbâ za'ra, 'Re ihâimana u'âsi mono hã. Ma tô duré imorĩ'rata na sõmri za'ra ni, 'Re ihâimana u'âsi mono ma, duré Pone'ẽrebâ i'rare ma zama, roptehâri wa, imorĩ'rata na amnho, 'Re ihâimana u'âsi mono ma, ãma 're idanhoprub za'ra mono ne. 5 Ã norĩ hã niwa isadawa nhipese za'ra õ, duré iwasédé da te ãma isa'ra waihu'u za'ra õ.Si'ubdatõ hâiwa hawi romhuri'wa norĩ te te irowasu'u za'ra zé
6 Tawamhã wa tô duré 'madâ, hâiwa hawi romhuri'wa hâimo uptabi 're iwara hã. Rowasu'uwẽ isi'utõrĩ'õ te tãma tihâiba, te te i'mahârâ mono da hã, ti'ai ãma uburé 're idahâimana za'ra mono norĩ ma, dapoto mono bâ duré damreme sipo'o mono bâ, duré dahâimanazé mono bâ, duré dawamri mono bâ 're idahâimana za'ra mono norĩ ma zama. 7 Ãne te mreme 'rãihâ na te te dama 'mahârâ:
— 'Re ihâimana u'âsi mono 're wazé pese za'ra wa'aba mono. Duré wẽ uptabi wa, ãma 're aiwata u'âsi za'ra wa'aba mono, bâdâ oto iwa waptã'ã wa, te te da'ãma i'arowairébézéb da hã. Hâiwa 'manharĩ'wai ãma 're aiwata za'ra wa'aba mono, duré ti'a te te i'manharĩ ãma, duré â poré te te ipoto ãma duré ub're norĩ zama te te i'apoto ãma.
8 Tawamhã isãna'remhã te duré 're wara. Ãne te duré ta hã te te rob'mahârâ:
— Ma tô waptãrã! 'Ri nho'u Babilonia hã ma tô waptãrã. Ta hã ma tô da'a'rãiwamna dapoto mono bâ, â sipãrĩ na 're dasi'rãiwamnarĩ za'ra mono wa, marĩ iwasété uptabi na si 're idahâimana za'ra mono ne, 're dahâimana za'ra mono da.
9 Tawamhã si'ubdatõ ãma hâiwa hawi romhuri'wa hã ma tô isarina zahuré te te rob'mahârâ duré, mreme 'rãihâ na, ãne:
— Ni'wam norĩ hã ropoto siwamnarĩa ãma duré isine ihâiba 'manharĩ ãmab zama wata za'ra wamhã, duré iwaihu'uzé, i'uihâi ãma, niwamhã isib'rata ãmab zama da te ui'éré za'ra wamhã, 10 ta norĩ hã 'Re ihâimana u'âsi mono nhimihâzé te za te te 're sépata za'ra, uva 'rãi wa'u isé isahizé â na wazari ãna hâsizé wa te te isa'wari hã. Ta norĩ hã te za te te 're robzépata u'âsi za'ra unhama wa, duré ẽtẽ ro'o nhizédé uzé pire wa, hâiwa hawi romhuri'wa norĩ, 'Re ihâimana u'âsi mono ma si 're ihâimana za'ra mono norĩ nho'a duré Pone'ẽrebâ i'rare nho'a zama. 11 Uzâ te te 're irobzépata za'ra mono zém nhizédé hã te za hâimo 're sizédé 'rãti u'âsi. Tamemhã robzépada hã 're simizahâri waihu'u mono õ di za, bâtâ na hã duré mara na zama, ropoto siwamnarĩ ãma duré isine ihâiba 'manharĩ ãma 're iwata za'ra mono norĩ ma, duré ni'wam norĩ hã isisi na iwaihu'uzé i'ui'éré tãma ihâimana za'ra norĩ ma hã.
12 Ãne hã 're romhâimana mono dâ'âsina, 'Re ihâimana u'âsi mono nhib'a'uwẽ norĩ hã te za tô simi'ẽ na robzépada hã te te 're 'wapéi hâ za'ra, isimiroti te te 're i'madâ'â pese za'ra mono norĩ, duré Zezusihi ãma si sena na 're inomro mono norĩ hã.
13 Tawamhã hâiwa hawi damreme hã wa tô duré wapa, we te te ĩma i'ru hã, ãne:
— Ma'ãpé ãma rob'ui'éré, ãhã na: Ni'wam norĩ ma, ã hawimhã 're rowẽ uptabi za'ra mono di za oto, Wanhib'apito ma, te te 're romhuri pese za'ra mono ré, 're idâ'â za'ra mono norĩ ma hã!
Tawamhã 'Re ihâimana u'âsi mono Pẽ'ẽzani ma tô ãma saze, ãne:
— Ĩhe, tô sena tô! Ta norĩ hã te za oto 're wa'utu za'ra, romhuri na siwasutu pire na te te 're 'manharĩ za'ra mono wa. E marĩ wa. Simiromhuri wẽ ré te za hâiwa u iré 're sihutu.
Amnho tehâri ne za iromhâimanazé, ti'ai ãma hã
14 Tawamhã wa tô duré rob'madâ. Te rob'madâ'â wamhã, wa tô 'madâ, hâiwa'a hã. Taha na te ni'wa hã nhamra, ti'ai ãma a'uwẽ ne hã. Isõprezé hã ẽtẽ waipo pré oru 'manharĩ na. Duré tinhib'rata te 're ti'â, popanone amnho tehârizé i'wa pese uptabi hã. 15 Tawamhã ihâiba amo hâiwa hawi romhuri'wa hã ma tô watobro, 'Re ihâimana u'âsi mono nhorõwa 'ri 'rãihâ hawi. Watobro wamhã, hârâ 'rãihâ na ma tô 'mahâ hâiwa'a na isãmra hã, ãne:
— Ma'ãpé popanone amnho tehârizém na amnho hã atehâri. E marĩ wa. Bâdâ hã ma tô oto iwa waptãrã, amnho tehârizé hã. Ti'a hã te oto sa'ra pese na tihâiba, iwa roptehârizéb da hã.
16 Tawamhã hâiwa'a na isãmra hã ma tô amnho tehârizé popanone na te te roptehâri ti'ai ãma hã, ropâ.
17 Tawamhã aimawi hâiwa hawi romhuri'wa hã ma tô duré watobro, hâiwa ãma 'Re ihâimana u'âsi mono nhorõwa 'ri 'rãihâ hawi. Ta hã te duré tinhib'rata 're ti'â, amnho tehârizé popanone i'wa pese uptabi hã.
18 Taha pari duré aimawi hâiwa hawi romhuri'wa unhama 'madâ'â'wa hã ma tô watobro, danhoprubzéb zatazéb 'rata isa hã. Ta hã ma tô hârâ 'rãihâ na 'mahâ, hâiwa hawi romhuri'wa amnho tehârizé popanone i'wa pese uptabi te te 're i'âri, ãne:
— Ma'ãpé, ate amnho tehârizé popanone i'wa pese na azuhâri mono, uva 'ru, su ré isimnhatã mono hã ti'ai ãma daro mono bâ, 'rãi prédu mono wa oto, uva hã!
19 Tawamhã hâiwa hawi romhuri'wa ma tô te te azuhâri ti'ai ãma hã, uva 'rã su ré isimnhatã mono hã. Taha pari, ma tô te te anhamra, uva ubumrozé isa'ẽne dapara na da te 're i'rãiwati za'ra mono zéb u. Ta hã uva ubumro iwatizéb da hã te wasu'u, 'Re ihâimana u'âsi mono dazada isahizé. 20 Tawamhã uva 'rã hã ma tô oto wati za'ra ni i'ubumrozéb 're, 'ri nho'õmo nhiti. Tawamhã dawapru hã ma tô sa'ẽtẽ na puru, uva 'rã iwa'u zô i'ubumrozém hawimhã. Awaru zadawa ãma isi'uwazi ipozéb u ma wi hâimo, â 'rehâ prã na. Duré 300 kilometru na ma tô tipraba.