Ropoto siwamnarĩ â poré hawi iwatobrozé
13
Tawamhã wa tô duré 'madâ, ropoto siwamnarĩ â poré hawi watobro ré hã. I'u hã 10 na duré i'rã hã 7 na. I'õmo mono bâ te isõpre hã tãma tihâimana za'ra. Duré i'rãi mono bâ te rob'ui'éré hã ãma tihâimana za'ra, 'Re ihâimana u'âsi mono ãma te te 're iwasété mono zém na iwamri za'ra hã. 2 Ropoto siwamnarĩ te i'madâ hã, hu'u hâiba ne. Duré ipara hã abaze zahi ursu para ne. Duré isadai'ré hã hu'u zérépa zadawa ne. Tawamhã ho'orã hâiba ne ropoto siwamnarĩ hã tinhiptede ma tô tisõ, ropoto siwamnarĩ ma, duré tinhimiwada'uri nhiptete zé hã duré tinhimiroti pire zama. 3 Tawamhã misi ropoto siwamnarĩ 'rã hã, da te u'a wa, idâ'â ne hã. Tane nherẽ, ma tô i'wa're hã tãma dârâ. Tahawa ma tô uburé ti'ai ãma 're idahâimana za'ra mono hã ãma tatob'uzu za'ra ni. Ma tô duré ãma sasõmri za'ra ni. 4 Tawamhã uburé ma tô ãma tawata za'ra ni, ho'orã hâiba ne ropoto siwamnarĩ ãma, tinhimiroti pire hã ropoto siwamnarĩ ma, te te sõmri wa. Ropoto siwamnarĩ ãma zama te duré tawata za'ra ni. Ãne te nasi nharĩ za'ra ni:— E 'wa hã hâimana bâ, ropoto siwamnarĩ ne isiptede hã. E 'wa hã te sada tihâiba, te te i'wapé da hã.
5 Tawamhã ropoto siwamnarĩ ma, ma tô rowairébé hã tihâiba, simiroti pire na 're isi'madâ'â zei mono zarina 're siwasu'u mono da a'â, duré 'Re ihâimana u'âsi mono ãma te te 're wasété mono da a'â. Isimiroti pire hã ma tô duré tãma sõmri ni, te te ãma 're roti wasété mono da, 42 na a'amo 'remhã. 6 Tawamhã 'Re ihâimana u'âsi mono ãma te te 're iwasété mono na ma tô oto ãma sãna'rata, isisi wẽ uptabi na 're ihâimana mono ãma, duré ro 're isãmra mono zéb ãma, duré uburé hâiwa ãma hã 're ihâimana za'ra mono norĩ ãmab zama. 7 Ma tô duré tãma waprosi ni, 'Re ihâimana u'âsi mono nhib'a'uwẽ norĩ hã te te a'wapé da, duré te te ãma ai'uté za'ra da. Duré isimiroti pire hã ma tô tãma sõmri ni, simiroti pire na 're hâimana mono da, dawamri mono bâ dama, duré dapoto mono bâ, duré dahâimanazé mono bâ, duré damreme sipo'o mono bâ, dama 're hâimana mono da. 8 Tawamhã uburé ti'ai ãma 're idahâimana za'ra mono hã te za ãma tawata za'ra ni, ropoto siwamnarĩ ãma hã. Tane nherẽ, 'Re ihâimana u'âsi mono te te aropoto mono wana ré, dahâimanazé isi'utõrĩ'õ ãma za 're idahâimana u'âsi za'ra mono norĩ nhisi na rob'ui'éré ré Ibaihâ na isisi ihâimana za'ra norĩ si, dame ãma wata za'ra õ di za. Ibaihâ hã Pone'ẽrebâ i'rare, da te iwĩrĩ te hã.
9 Tahawa, asimiparizé aima hâimana za'ra wa'aba wamhã, ma'ãpé wapari wẽ za'ra wa'aba, ã hã: 10 Ni'wa hã isazei'wai wa, dazazéb 're, da te sẽrẽ da wamhã, dazazéb 're te za tô sẽrẽ ni. Duré ni'wa hã sib'ézé 'wa pa na da te wĩrĩ da wamhã, sib'ézé 'wa pa na te za tô wĩrĩ ni.
Ãne wamhã, 'Re ihâimana u'âsi mono nhib'a'uwẽ norĩ wati hã te za tô sa'ẽtẽ na tãma tihâimana za'ra, simi'ẽ na robzépada hã te te 're 'wapéi hâ za'ra mono da, duré 'Re ihâimana u'âsi mono si te te sina 're umnhasi za'ra mono da.
Ropoto siwamnarĩ ihâiba amo ti'ai hawi iwatobrozé
11 Tawamhã wa tô duré 'madâ, ihâiba amo ropoto siwamnarĩ ti'ai hawi watobro ré hã. Taha ma, te maparane i'u hã tãma tihâimana zahuré, pone'ẽrebâ i'rare õmo ne. Tane nherẽ, imreme hã ropoto siwamnarĩ ho'orã hâiba mreme ne. 12 Tawamhã imorĩ'rata na ropoto siwamnarĩ â hawi iwatobro nhimiroti pire na ma tô ãma 're hâimana, isadawa para. Taha zarina ma tô te te 're 'rui pese, ti'ai ãma 're idahâimana za'ra mono norĩ ma hã, imorĩ'rata na ropoto siwamnarĩ ãma 're dawata za'ra mono da, da te u'a pire nherẽ, i'wa're tãma idâ'â ãma. 13 Tawamhã maparane ãma ropoto siwamnarĩ iwatobro hã ma tô marĩ isa'rese'õ hã a'manha. Hâiwa hawi uzâ hã ti'ai u waptã'ã da, ma tô romhõsi, uburé danho'a. 14 Tawamhã te te iromhõsi na ma tô uburé ti'ai ãma 're idahâimana za'ra mono norĩ ma arob'rã, tãma irowairébé hã hâimana wa, marĩ te te i'manharĩ da hã, imorĩ'rata na ropoto siwamnarĩ iwatobro zadawa para. Tawamhã maparane ãma ropoto siwamnarĩ iwatobro hã ma tô uburé ropâ 're idahâimana za'ra mono norĩ ma tinha, ihâiba amo hâiba 'manharĩ hã da te dasiwi 'manharĩ da, iwazép sina, sib'ézé 'wa pa na, da te u'a nherẽ, idâ'â õ hâiba hã. 15 Tawamhã maparane ãma ropoto siwamnarĩ ma, ma tô iwaihu'u pe hã tãma sõmri ni, imorĩ'rata na ropoto siwamnarĩ iwatobro hâiba 'manharĩ ma, ipẽ'ẽzani te te tãma isẽrẽ da hã, mreme watobro da, duré te te 're da'a'mapãrĩ mono da, uburé ãma 're idawata za'ra mono õ hã. 16 Ma tô duré uburé dama a'ru zahi, dawaihu'uzéb da, da te dama sihâtâ za'ra da, danhib'rata nhimire niwĩ niwamhã da'uihâi wi, dama ipire norĩ hã duré dama iwapu norĩ hã duré isibro pese norĩ hã, duré isibrob'õ norĩ hã duré wada'uri zarina titede'wai ma romhuri'wa norĩ hã, duré wada'uri ãna 're ihâimana za'ra mono norĩ zama. 17 Tawamhã ni'wa hã te te oto rob'uipra waihu'u õ di za, dawaihu'uzé hã tãma hâimana õ nherẽ. Ta hã i'ui'éré hã, ropoto siwamnarĩ nhisi duré niwamhã isisi za'ratazé.
18 Ã hã, ni'wa hã 'rãiwaihu'u wẽ wapsi, te za waihu'u. Ni'wa i'rãiwaihu'u wẽ si te za upsibi me, ropoto siwamnarĩ te isa'ratazé waihu'uzé hã, ti'ai ãma a'uwẽ nhisi te te wasu'u wa. Ite isa'ratazé hã 666 na.