3 Tawamhã aimawi hã marĩ ma tô duré watobro. Ta hã ropoto siwamnarĩ ho'orã hâiba ne, ipré na hã. 7 na i'rã te tãma tihâimana za'ra, duré 10 na i'u hã. Isõprezé hã te tãma tihâimana za'ra, i'rãi mono bâ. 4 Tawamhã tizamo na ma tô wasi hã waibu, suru na iwãiwa prã na. Ta norĩ hã ma tô sãmra, ti'ai u. Tawamhã ropoto siwamnarĩ ho'orã hâiba ne hã ma tô pi'õ nho're za, i'ra hã tãma poto wa, te te tiwi âri da, te te 'rẽne da. 5 Tawamhã pi'õi ma, ma tô oto podo i'ra hã, 'watébrémi na. Ta hã te za simiwada'uri nhiptete na te te 're da'a'madâ'â dapoto mono bâ 're idahâimana za'ra mono hã. Tane nherẽ, ma tô i'ra hã tiwi âri ni, 'Re ihâimana u'âsi mono u, duré ite apito simasisizém na 're isãmra mono zéb u. 6 Tahawa ma tô pi'õ hã aimani, rop si 're irosa'wari mono u, 'Re ihâimana u'âsi mono hã ro iwana ré te te sô isa'ra pese zéb u, tame 1.260 bâtâ na da te a'â 'madâ'â da, marĩ zô tiwi rowaptâ'â ãna.

7 Tawamhã hâiwa ãma ma tô dasi'wapé hã watobro. Miguéu hã duré isiré hâiwa hawi romhuri'wa norĩ hã ma tô 'wapé za'ra, ropoto siwamnarĩ ho'orã hâiba ne hã. Ta hã ma tô duré a'wapé asa, tite wa'uburé norĩ siré^a. 8 Tane nherẽ, ropoto siwamnarĩ ho'orã hâiba ne na ma tô ãma ai'uté za'ra, Miguéu norĩ hã. Tahawa ta hã duré isiré wa'uburé norĩ hã hâiwa ãma oto 're hâimana waihu'u za'ra mono õ di. 9 Tawamhã ho'orã hâiba ne ropoto siwamnarĩ isa'ẽtẽ uptabi hã ma tô hâiwa hawi me ni. Ta hã wahi na isihâiba duréihã, isisi hã Wa'uburé niwamhã Satanasi, uburé ti'ai ãma 're idahâimana za'ra mono ma, te te 're irob'rãmi mono, 're dawasété za'ra mono da. Ta hã ma tô me ni ti'ai u, duré isiré hâiwa hawi romhuri'wa na aré 're ihâimana za'ra mono norĩ zama.

10 Tawamhã damreme 'rãihâ hã wa tô wapa, hâiwa hawi te te inharĩ hã, ãne:

— Ãhã na hã ma tô oto iwa waptãrã, 'Re ihâimana u'âsi mono te te 're ida'anho'reptui mono zé hã! Ãhã na hã 'Re ihâimana u'âsi mono, tinhiptede ma oto hâi'ré, apito na te te 're ida'a'madâ'â mono zé hã! Duré ãhã na hã, Danho'reptui'wa da, te te ipisudu hã ma tô oto hâi'ré, tinhimiroti pire na te te 're iroti mono zé hã! E marĩ wa. Wasisãnawã norĩ, 'Re ihâimana u'âsi mono nho're bâtâ na duré mara na te te 're i'awasu'u wasété mono hã, hâiwa hawi da te oto mei wa. 11 Wasisãnawã norĩ hã ma tô ãma ai'uté za'ra, Pone'ẽrebâ i'rare wapru na duré isimiroti te te 're i'mahârâ za'ra mono na zama. Ta norĩ hã te sisa'ra pese siromo 're hâimana za'ra, sisawi ãna isisõmri za'ra da hã duré dâ'â za'ra da i'u'âbâ. 12 Tahawa, hâiwa ãma 're i'aihâimana za'ra wa'aba mono norĩ, ma'ãpé asima rowẽ za'ra wa'aba! Tane nherẽ, ti'ai ãma duré â poré ãma 're i'aihâimana za'ra wa'aba mono norĩ, aima 're ropipa uptabi za'ra wa'aba mono di za. E marĩ wa. Wa'uburé hã te te ãma atẽme si'ra za'ra wa'aba wa! Ta hã sahi uptabi di, te te waihu'u pese wa, bâdâ 'ruture na tãma ihâimana na hã, te te iromhuri da hã.

13 Ropoto siwamnarĩ ho'orã hâiba ne, ti'ai u da te ime na siwaihu'u wamhã, pi'õ i'ra 'watébrémi na tãma ipoto zarina ma tô oto 're mo, te te tãma rob'manharĩ wasété da. 14 Tane nherẽ, pi'õi ma, ma tô sõmri ni, si'õmo wawẽ zaribi hã rop si 're irosa'wari mono u ãma wara da, da te sô irobza'ra pese u, tame za a'â ihâimana da hã marĩ zô tiwi rowaptâ'â ãna, si'ubdatõ wahu hã duré misi wahu iwãiwab u, wahi^b te te sõpẽtẽ tõ da. 15 Tawamhã wahi hã ma tô tizadawa hawi â hã sa'wa. Panho'õmo ne ma tô tipraba pi'õ zarina, te te 'mapraba da, â wara hã. 16 Tane nherẽ, ti'a hã ma tô pi'õi ãma aime. Tizadawa ma tô 'ridawa, ti'a hã. Tahawa â hã ma tô tisõ, ho'orã hâiba ne ropoto siwamnarĩ tizadawa hawi te te isa'wari hã. 17 Tawamhã ropoto siwamnarĩ ho'orã hâiba ne hã ma tô ab'rui pese, pi'õ da. Tahawa ma tô watobro, isihudu norĩ isi'atarẽme zô te te a'wapé da, tô 'Re ihâimana u'âsi mono nhimiroti te te 're i'madâ'â pese za'ra mono norĩ zô duré tô sena 'Re ihâimana u'âsi mono nhimiroti Zezusi te te ihâi'rézém na te te 're i'madâ'â pese za'ra mono norĩ zô. 18 Tawamhã ropoto siwamnarĩ ho'orã hâiba ne hã ma tô oto hâiwi za, supara ai wa, â poré zaihâ na.