— Mo oto aimorĩ. 'Re ihâimana u'âsi mono nhorõwa 'ri 'rãihâ hã pibu na duré danhoprubzéb zatazé hã. Duré sa'rata za'ra na, tame 'Re ihâimana u'âsi mono ãma iwata za'ra norĩ hã. 2 Tane nherẽ, 'ri 'rãihâ 'wawi wa'ra 'remhã pibu tõ. E marĩ wa. Ta hã 'Re ihâimana u'âsi mono nhib'a'uwẽ'õ norĩ ma, 're hâimana mono wa. Ta norĩ hã te za wati'i za'ra za, 'Ri nho'u iwazé pe hã, 42 na a'amo na. 3 Taha ré, maparane ĩzadawa wasu'u'wa norĩ ma, wa za isiptede hã tãma sõmri zahuré. Tawamhã ta norĩ hã 1.260 bâtâ 'remhã te za te te dama 're ĩzadawa wasu'u zahuré, i'uza zahuré hã zazahâ ihâiro na uza zahuré ré.

4 Ã norĩ, maparane 'Re ihâimana u'âsi mono zadawa wasu'u'wa norĩ hã, ta norĩ hã maparane olivera na wede nhisi 're ihâimana zahuré mono, duré maparane rob'uiwẽzé 're ihâimana zahuré mono. Ta norĩ hã te 're sima'wara zahuré, ti'ai ãma Uburé Danhib'apito nho're. 5 Ni'wa isitob'ru hã maparane isadawa wasu'u'wa norĩ ihâimana zahuré ma, marĩ iwasédé te te tãma 'manharĩ zahuré da, te te pibui wamhã, isadawa hawib zahuré unhama na te za tinhitob'ru norĩ hã te te 're a'uprosi zahuré. Ãne tô i'ru zahi 're isi'utõrĩ mono da hã, marĩ iwasédé te te tãma 're 'manharĩ zahuré mono da, te te sima 're iwẽ za'ra mono norĩ hã. 6 Isadawa wasu'u'wa norĩ hã simiroti nhiptete zahuré di za, hâiwa te te isitob zahuré da hã, tã ta'a tõ da, 'Re ihâimana u'âsi mono nhimiroti te te 're 'mahârâ zahuré mono ré hã. Duré simiroti nhiptete zahuré di za, â hã dawapru na te te 'manharĩ zahuré da hã, duré ti'a hã sipu'u pese na te te iwamnarĩ zahuré da hã, marĩ iwasédé 're ihâimana za'ra mono na, ahâ uptabi na te te sima 're iwẽ zahuré mono sidâpâsi.

7 'Re ihâimana u'âsi mono te te dama 're isadawa wasu'u zahuré mono zé te te 'rãsutu zahuré parimhã, ropoto siwamnarĩ, ab're 'rehâ uptabi hawi iwatobro hã te za 'wapé zahuré. Tawamhã ta hã te za ãma ai'uté zahuré. Te za duré tipã. 8 Tawamhã ihâiba hâ zahuré hã te za tiza'wari zahuré, 'ri nhi'riti nho'õmo ãma 'ri nho'u dama ipire ãma, Isib'apito zahuré, wedepo'o nhonhi'rãmi na da te isasõmrizéb ãma, dâ'â da. Ta hã 'ri nho'õmo wamri ãma isimiré hã, Sodoma na duré Ezitu na. 9 Tawamhã si'ubdatõ bâdâ duré misi bâtâ wãiwab u, uburé pese dahâimanazé mono bâ 're idahâimana za'ra mono hã, duré dawamri mono bâ, duré damreme sipo'o mono bâ, duré dapoto mono bâ, te za maparane isadawa wasu'u'wa norĩ hâiba hâ hã dasiwi 'madâ'â zahuré ni. Te za duré ãma tasi'uwati za'ra ni, da te za zahuré tõ da. 10 Tawamhã ti'ai ãma 're idahâimana wasété za'ra mono hã te za dasima rowẽ za'ra ni, dâ'â zahuré wẽ te, isadawa wasu'u'wa norĩ hã. Dato hã te za ãma dasima 'manharĩ za'ra ni, idâ'â zahuré zém na. Danhoprubzé hã te za duré dasima sõmri za'ra ni. E marĩ wa. Ã norĩ isadawa wasu'u'wa zahuré hã, ti'ai ãma 're idahâimana za'ra mono norĩ te te 're robzépata za'ẽtẽ za'ra mono da, te te ãwisi zahuré wa. 11 Tane nherẽ, si'ubdatõ bâdâ duré misi bâtâ wãiwab u, bâdâ hã ne parimhã, ma tô ihâiba uptabi hã apâ iwap tizasi zahuré, 'Re ihâimana u'âsi mono hawimhã. Tawamhã hâiwi ma tô aima'wa. Tahawa uburé ma tô tapahi pese za'ra ni, da te i'madâ'â za'ra norĩ hã. 12 Tawamhã maparane isadawa wasu'u'wa norĩ hã ma tô hâiwa hawi damreme isiptete uptabi hã wapari zahuré. Ta hã ma tô tãma nharĩ zahuré, ãne:

— We sai'uri aba hâimo.

Tawamhã hâiwa u ma tô tineb zahuré hâiwa'a na, isitob'ru norĩ hã te te siwi 'madâ'â za'ra ré. 13 Tawamhã taha bâtâ pibuzém na awa'awi, ma tô ti'a hã sãsã, sa'ẽtẽ uptabi. Tahawa, 'ri nho'õmo 'remhã 'ri 10 na simasa mono wamhã, ma tô misisi siprub za'ra. Ma tô duré ai'utõrĩ ni, 7 miu na. Idasi'atarẽme hã ma tô duré tapahi pese za'ra ni. 'Re ihâimana u'âsi mono hâiwa ãma 're isãmra mono ãma ma tô duré tawata za'ra ni.

14 Tawamhã maparane ãma da te irobzépata za'ra zé hã ma tô ai'utõ. Tane nherẽ, asimiza'rese sina aihâimana za'ra wa'aba! Si'ubdatõ ãma robzépatazé hã te za duré romhutu na tiromhâiba.

15 Tawamhã 7 ãma hâiwa hawi romhuri'wa hã ma tô duré amnhihâ. Simnhihârâ wamhã, hâiwa ãma ma tô damreme 'rãihâ na idamreme zusi hã tihâiba. Ãne te nharĩ za'ra ni:

— Ãhã na hã simiroti pire na uburé da'madâ'âzé hã, 'Re ihâimana u'âsi mono Uburé Wanhib'apito nhib'rata te za oto 're hâimana, duré isimipisudu Cristuhu nhib'ratab zama. Ta hã te za oto te te 're da'a'madâ'â u'âsi, õne u'âsi.

16 Tawamhã 24 na dama ipire norĩ, tite apito simasisizém na 'Re ihâimana u'âsi mono nho're isi'ubumro hã ma tô hi'rãtitõ tãma ana, ti'ubu na ti'ai u te te ãma roptob za'ra sina. 'Re ihâimana u'âsi mono ãma ma tô tiwata za'ra. 17 Ãne te ãma tiwata za'ra:

19 Tawamhã 'Re ihâimana u'âsi mono nhorõwa 'ri 'rãihâ hã ma tô si'ridawa, hâiwa ãma 're isa mono hã. Duré arca na wedehâ're nhisi hã ma tô dasiwi 'madâ'â ni, 'Re ihâimana u'âsi mono tinhib'a'uwẽ norĩ ma te te iropisutuzé te te iwasu'u hã. Tawamhã tã si'ubuzi hã ma tô duré watobro, duré tãirãrã hã duré tãiwapsa'a zama. Duré ti'a hã ma tô sãsã. Tãzâ hã ma tô duré tita'a.