Hâiwa hawi romhuri'wa hã, ibaihâ nhinha isurure te te 're i'ârizé
10
Tawamhã wa tô duré 'madâ, hâiwa hawi romhuri'wa isimiwada'uri pire uptabi, hâiwa hawi we te te isi'ra hã. I'uza hã hâiwa'a ne. Duré i'rãi ãma hã tãiwaipore ne hã te tãma tihâiba. I'ubu hã bâtâ ne, duré ipara hã aiwa unhama ro'o nhoto ne. 2 Hâiwa hawi romhuri'wa hã te ibaihâ nhinha hã 're ti'â tinhib'rata, 'ridawa haré isurure hã. Tipara nhimire hã ma tô tisã â poré nhisiwi, duré tipara nhimi'e hã ti'a nhisiwi. 3 Tawamhã hârâ 'rãihâ na ma tô hâ. Ihârâ hã hu'u zérépa wairõ ne. Hârâ parimhã, 7 na tãiwapsa hã ma tô tiwapsa'a na sada'âbâ za'ra, wapsa'a 'rãihâ na. 4 7 na tãiwapsa'a norĩ hã te te nharĩ za'ra wamhã, wa hã te aré oto ãma rob'ui'éré da, imreme za'ra na. Tane nherẽ, hâiwa hawi damreme hã wa tô wapa, te te ĩma inharĩ hã, ãne:— Tô'ã. Ãma rob'ui'éré tõ. Asi'repsi pi'uriwi iré aihâimana, 7 na tãiwapsa'a norĩ mreme ré hã.
5 Tawamhã hâiwa hawi romhuri'wa, â nhisiwi duré ti'a nhisiwib zama hâiwi isam na te i'madâ hã tinhimire niwĩ ma tô tinhib'rada hã wẽ, hâiwa u. 6 Tawamhã simiwẽ sina, ma tô ropisutu zahi hã 'manha 'Re ihâimana u'âsi mono nhisi na, õne u'âsi 're ihâimana mono nhisi na, hâiwa te te ipoto nhisi na, duré ti'a, duré â poré, duré uburé marĩ iwa 're ihâimana za'ra mono te te i'apoto nhisi na. Ãne te te iropisutu zahi zé hã:
— Rowaptâ'â õ di za oto. 7 7 ãma hâiwa hawi romhuri'wa tinhimnhihârâzém na oto simnhihârâ da wamhã, 'Re ihâimana u'âsi mono hã te za oto ãma uwaimra tite rowa'õno iwaihu'u'õ hã, tite romhuri'wa norĩ tizadawa 'mahârâ'wa norĩ ma, te te 're i'awaihu'u mono zé hã.
8 Tawamhã hâiwa hawi damreme te iwapari 'rada hã ma tô duré ĩma tinha, ãne:
— Ma'ãpé sô aimorĩ, ibaihâ nhinha hã âri da, hâiwa hawi romhuri'wa â poré nhisiwi duré ti'a nhisiwib zama isa, 'ridawa haré isib'rata tãma ihâimana hã.
9 Tawamhã wa tô sô mo. Itẽme te ĩsina sô rotété wamhã, wa tô tiwi waptẽ, ibaihâ nhinha isurure hã te te ĩma sõmri da. Tawamhã ma tô ĩma ti'ru, ãne:
— Ma'ãpé âri, 'rẽne da! 'Rẽne wamhã, anomo ma hã 'wa're uptabi di za. Tane nherẽ, asadawa ma hã sei uptabi di za, ropĩni ne.
10 Tawamhã ibaihâ nhinha isurure hã wa tô ti'â, hâiwa hawi romhuri'wa te te 're i'âri hã. Taha pari, wa tô ti'rẽ. Te 'rẽne wamhã, ĩzadawa ma hã isei uptabi ropĩni ne. Tane nherẽ, te oto sõmri wamhã, wa waihu'u, ĩnomo 'remhã isé na hã. 11 Tawamhã ni'wam norĩ hã ma tô ĩma nharĩ za'ra, ãne:
— Tô i'ru zahi, 'Re ihâimana u'âsi mono dama isadawa wasu'u mono da hã, dapoto mono bâ 're idahâimana za'ra mono norĩ wasu'u na hã, duré dawamri mono bâ, duré damreme mono bâ, duré dama ipire norĩ mono bâ 're ihâimana za'ra mono norĩ wasu'u na zama.