9
Tawamhã imrotõ ãma ma tô duré amnhihâ, hâiwa hawi romhuri'wa hã. Simnhihârâ wamhã, wa tô 'madâ, wasi ti'ai u iwaptã hã. Taha ma, ma tô sõmri ni, 'ridawazé Ab're 'rehâa uptabi 'ridawazé hã. 2 Tawamhã wasi Ab're 'rehâ hã ma tô 'ridawa. Te te 'ridawa wamhã, ta hawi ma tô watobro isizé hã, unhama ro'o za'ẽtẽ ubumroi pese hawi isizédé ne hã. Tahawa, unhama nhizédé hã ab're 'rehâ hawi iwatobro hã ma tô bâdâ hã tõmo utõ. Duré hâiwa nho're na zama ma tô rob'utõ. 3 Romnhizédé hawimhã, 'riti norĩ hã ma tô wairé. Ta norĩ hã ma tô si'ra za'ra, ti'ai u. Isiptede hã ma tô duré tãma sõmri za'ra ni, apa'apa 'wa nhi'oto norĩ ma isiptede 're ihâimana za'ra mono ne hã. 4 Ta norĩ ma, ma tô roti zahi hã tãma tihâimana za'ra, du hã te te wamnarĩ za'ra tõ da, duré wede norĩ hã duré siwa'ru rowede norĩ zama. Tazahã, ni'wam norĩ hã uihâi ui'éré ãna 're ihâimana za'ra mono norĩ si, te te u'a za'ra mono da, 'Re ihâimana u'âsi mono te na i'uihâi ui'éré õ norĩ si. 5 Duré tãma iwaprosi za'ra hã hâimana õ di, ta norĩ te te isimroi mono da hã, taré si te te tãma rob'manharĩ wasété za'ra mono da, imrotõ a'amo isi'utõrĩ 'remhã. 'Riti norĩ nhipsari hã aiwa apa'apa 'wa nhi'oto nhipsari ne, isé hã. 6 Tawamhã imrotõ na a'amo isi'utõrĩ 'remhã, robzépata za'ẽtẽ wa, dadâ'â zô te za dasima sô 're danhopré. Tane nherẽ, da te sõpẽtẽ waihu'u za'ra õ di za. 'Re dadâ'â za'ra mono da, da te dasima 're wẽ za'ra mono nherẽ, te za dadâ'âzé hã dawi 're simani za'ra.7 'Riti norĩ hã, aiwa awaru norĩ simiza'rese dasi'wapé da, 're ihâimana za'ra mono ne. I'rãi ãma hã, marĩ hã te tãma tihâimana za'ra, isõprezé oru ne hã. Duré i'ubu za'ra hã, aiwa a'uwẽ ubu ne. 8 Iséré za'ra hã, aiwa pi'õ zéré ne. Duré i'wa za'ra hã, aiwa hu'u zérépa 'wa ne. 9 Isõ'utu ubuzé hã, aiwa si'uwazi 'manharĩ na danho'utu ubuzém ne. Duré isaripi ruru hã, aiwa dasi'wapéi wa, awaru ahâ uptabi na wedewara zapore te te 're isari za'ra mono ruru'u ne. 10 'Riti na're 'wamhi hã, aiwa apa'apa 'wa nhi'oto na're 'wamhi ne. Duré isimiwa'rézé hã siptete hâ di, imrotõ a'amoi 're, te te 're idahâzu mono da hã. 11 Isib'apito hã te tãma tihâimana za'ra. Ta hã ihâiba'õ, Ab're 'rehâ te te 're i'madâ'â mono. Ebreu norĩ mreme na isisi hã, Abadõ na. Duré Gregu norĩ mreme na hã, Apoliã na isisi hã. Ta hã isisi te te iwasu'u hã, Rob'uprosi'wa.
12 Tawamhã imorĩ'rata na robzépada ipire iwatobro hã ma tô ai'utõ. Duré ihâiba amo aimawi hã maparane te za duré tipusi zahuré, robzépatazé ipire hã.
13 Tawamhã imropâ ãma hâiwa hawi romhuri'wa hã ma tô duré amnhihâ. Simnhihârâ wamhã, damreme hã wa tô wapa. 'Re ihâimana u'âsi mono nho're danhoprubzéb zatazé oru 'manharĩ isa maparane si'uiwa na i'rã'wa hawi, te ni'wa hã wei mre. 14 Ta hã damreme hã ma tô tinha, imropâ ãma hâiwa hawi romhuri'wa isimnhihârâzé tãma ihâimana ma, ãne:
— Ma'ãpé, pawasihu za'ra na, maparane si'uiwa na hâiwa hawi romhuri'wa norĩb pawasisi ré isimasa hã, panho'u Eufrati 'ratamhã.
15 Tawamhã maparane si'uiwa na hâiwa hawi romhuri'wa norĩ pawasisi ré 're isimasa mono hã sada ipisutu siromo za'ra hã ma tô oto pawasihu za'ra ni, ãne bâdâ duré a'amo duré wahub zama, iwa tãma waptã'ã za'ra wa, te te da'uprosi za'ra da, daza'ratazé iwãiwa prã na. 16 Tawamhã wa tô duré wapa, awaru na dasi'wapé zô isisa'rei mono norĩ za'ratazé hã, 200 milhões na isa'rata za'ra hã. 17 Ĩnhotõ 'rowim ne te irob'madâ'â na hã, wa tô 'madâ'â za'ra awaru norĩ hã, duré isisi isi'ubumro norĩ zama. Isisi isi'ubumro norĩ nho'utu ubuzé hã ipré unhama ro'o ne hã, duré hâiwa i'uzéi wẽ ne hã, duré i'uzé amarelu ne hã, ẽtẽ ro'o pese uzé pirec ne hã. Awaru norĩ 'rã hã hu'u zérépa 'rã ne. Tawamhã isadai'ré hawib za'ra hã te uzâ hã nasi wairé, duré isizé hã, duré ẽtẽ ro'o pese uzé pire nhizédé zama. 18 Tawamhã iwãiwa prã na ma tô ai'utõrĩ ni, ã norĩ hã si'ubdatõ marĩ iwasédé ihâimana za'ra na hã: Uzâ, duré isizé, duré ẽtẽ ro'o pese uzé pire nhizédé zama, awaru norĩ zadai'ré hawi nasi iwairébé na. 19 Awaru norĩ nhiptede hã te tô isadai'ré ãma tãma tihâimana za'ra, duré isamo ãmab zama. Isamo 'rãsutu za'ra hã, wahi 'rã ne hã. Taha na te awaru norĩ hã nasi dahâzu.
20 Idasi'atarẽme hã marĩ iwasédé iwairébé na idadâ'â za'ra õ hã, zahadu da te sahâri za'ra õ di, danhib'rata na marĩ, da te 're i'manharĩ wasété za'ra mono zé hã. Wa'uburé norĩ ãma 're idawata za'ra mono zé hã, da te sahâri za'ra õ di, duré romhâiba 'manharĩ oru 'manharĩ ãmab zama, duré prata 'manharĩ ãma, duré brõzi 'manharĩ ãma, duré ẽtẽ 'manharĩ ãma. Duré wede 'manharĩ ãma zama, ãma 're idawata za'ra mono zé hã da te sahâri za'ra õ di, te te 're ida'madâ'â waihu'u za'ra mono õ norĩ ãma hã, duré isimiwapari waihu'u õ ãma hã, duré imorĩ waihu'u õ ãmab zama. 21 Duré si'ruiwapari za'ra õ di, te te 're idanhimroi mono zém na hã, duré abzé na te te 're idawaibui mono zém na hã, duré tihâimana nhiséb õ na dasina dahâimana na 're ihâimana za'ra mono zém na hã, duré 're isimisaihuri za'ra mono zém na zama.