Pone'ẽrebâ i'rare hã ibaihâ nhinha uptobzé, 7 ãma te te iprubzé
8
Pone'ẽrebâ i'rare hã ibaihâ nhinha uptobzé 7 ãma te te pru wamhã, ma tô ari'iwi tiromhâiba hâiwa ãma hã, niwamhã bâtâ pibuzé aiwa ãma isipo'ozéb u. 2 Tawamhã wa tô 'madâ'â za'ra, 7 na hâiwa hawi romhuri'wa norĩ hâiwi isimasa hã, 'Re ihâimana u'âsi mono nho're. Ta norĩ ma, ma tô tãma sõmri za'ra ni, 7 na danhimnhihârâzé hã.3 Tawamhã aimawi hã hâiwa hawi romhuri'wa hã ma tô we ti'â, u'awi ne ẽtẽ waipo pré oru 'manharĩ wedewa'u isadaze zatazé hã. Ta hã te hâiwi iré za, danhoprubzéb zatazéb 'rata. Wedewa'u isadaze hã sa'ẽtẽ na ma tô tãma sõmri ni, tô ta hã danhoprubzéb zatazé ẽtẽ waipo pré oru 'manharĩ ãma te te zata da, uburé 'Re ihâimana u'âsi mono nhib'a'uwẽ norĩ nhimirowaptẽrẽ siré, Apito simasisizém nho're. 4 Tawamhã hâiwa hawi romhuri'wa nhib'rata hawi ma tô sai'u, wedewa'u isadaze nhizédé hã 'Re ihâimana u'âsi mono nhib'a'uwẽ norĩ nhimirowaptẽrẽ wazari, isõ're u. 5 Tawamhã hâiwa hawi romhuri'wa hã ma tô ti'â, wedewa'u isadaze nhemezé u'awi ne hã. Taha 're, ma tô pré'a hã 'manhe, danhoprubzéb zatazé ipré hawi, Ta hã ma tô ti'ai u sa'wa. Te te sa'wari wamhã, tãiwapsa hã ma tô watobro, duré tãirãrã'ã hã duré tãsi'ubuzi hã duré ti'ai popo'o zama.
Hâiwa hawi romhuri'wa norĩ hã tinhimnhihãsizém na isimnhihãsizé
6 Taha parimhã 7 na hâiwa hawi romhuri'wa norĩ hã, isimnhihãsizé tãma ihâimana za'ra hã te oto sisa'ra pese za'ra, simnhihãsi da.
7 Tawamhã imorĩ'rada hâiwa hawi romhuri'wa, tinhimnhihârâzém na simnhihârâ wamhã, tãzâ hã ma tô rere ti'ai u, duré uzâ dawapru na iwazari zama. Tawamhã iwãiwa prã na ma tô ti'a hã zada, duré wede norĩ hã, isa'ratazé iwãiwa prã na daro mono bâ. Du uzé hã ma tô uburé ai'uzâ.
8 Tawamhã maparane ãma hã ma tô duré amnhihâ, hâiwa hawi romhuri'wa hã. Simnhihârâ wi, ma tô ẽtẽ 'rãihâ ne hã me ni, â poré u unhama ro'o na ro'o ré. Tahawa, ma tô â poré hã si'manha, dawapru na daro mono bâ, isa'ratazé hã iwãiwa prã na. 9 Tawamhã tepe norĩ â 'rowi 're inomro mono hã ma tô ai'utõ ropâ, isa'ratazé hã aiwa ãma isipo'o na. Ma tô duré uba're isa'ẽne hã uprosi ni, duré uba're isurure zama, isa'ratazé hã iwãiwa prã na.
10 Tawamhã si'ubdatõ ãma ma tô duré amnhihâ, hâiwa hawi romhuri'wa hã. Simnhihârâ wamhã, ma tô wasi isa'ẽne hã waptãrã hâiwa hawi, 'rãsitõ iro'o ré ne hã, iwãiwa prã na panho'õmo norĩ nhisiwi, duré ub're norĩ nhisiwib zama. 11 Wasi, panho'õmo norĩ nhisiwi iwaptã'ã nhisi hã, Â'wa're'wa na, isisi hã. Waptã'ã wamhã, ma tô ti'â 'wa're pese za'ra, daro mono bâ. Tahawa, ma tô da'ahâ na ai'utõrĩ ni, â 'wa're hã da te âhuri wa.
12 Tawamhã maparane si'uiwa na ãma hã ma tô duré amnhihâ, hâiwa hawi romhuri'wa hã. Simnhihârâ wamhã, bâdâ hã ma tô titobra itõmo wãiwa prã na, duré a'amo zama itõmo wãiwa prã na. Duré wasi norĩ zama, ma tô titobra za'ra, itõmo wãiwa prã na. Tawamhã robra di, bâtâ wãiwa prã na duré mara wãiwa prã na zama.
13 Taha pari te rob'madâ'â wamhã, si'u hã wa tô 'madâ, hâimo uptabi 're iwara hã. Ta hã wa tô wapa, ãne 're ihârâ mono hã, hârâ 'rãihâ na:
— Ni'ãpé, ni'ãpé, ni'ãpé! Ti'ai ãma 're i'aihâimana za'ra wa'aba mono norĩ, 're aihâimana za'ra wa'aba mono ré, danhimnhihârâzém hârâ wapari za'ra wa'aba wamhã, aima ropipa uptabi za'ra wa'aba di za, si'ubdatõ hâiwa hawi romhuri'wa norĩ oto simnhihãsi wamhã.