Izaraéu nhihudu norĩ, 144 miu na ihâiba za'rata za'ra zé
7
Tawamhã ãne pari, wa tô duré 'madâ'â za'ra, maparane si'uiwa na hâiwa hawi romhuri'wa norĩ hã. Ta norĩ hã te hâiwi aimasa, maparane si'uiwa na ti'ai a're 're ihâimana za'ra mono bâ. Maparane si'uiwa na rowa'u, ti'ai ãma te te 're irowapõrĩ za'ra mono hã te tété za'ra, ti'ai ãma te te rowapõrĩ za'ra tõ da, duré â poré ãma hã, duré wede ãmab zama. 2 Tawamhã aimawi hã hâiwa hawi romhuri'wa, wa tô duré 'madâ, bâtâ pusizém hawi isihâi'ré hã. Taha ma, te tihâiba datob'rata to zém ne hã, 'Re ihâimana u'âsi mono nhib'a'uwẽ norĩ te te ãma 're i'atob'rata to mono zéb da hã. Ta hã ma tô hârâ 'rãihâ na 'mahârâ za'ra, maparane si'uiwa na hâiwa hawi romhuri'wa norĩ, iwaihu'u pe da te tãma isõmri za'ra norĩ hã, ti'ai ãma duré â poré ãmab zama te te daré rowamnarĩ za'ra da hã. 3 Ãne te 'mahârâ za'ra:— Tô'ã! Ti'ai ãma a'â rowamnarĩ za'ra wa'aba tõ, duré â poré ãma hã duré wede norĩ ãmab zama, wate 'Re ihâimana u'âsi mono ma romhuri'wa norĩ, wa te a'â uihâi ui'éré za'ra õ ré hã, pibui pese na da.
4 Tawamhã ni'wai mreme hã wa tô wapa, te te ĩma iwasu'u za'ra hã, da te itob'rata to za'ra norĩ za'ratazé pibui pese na da, ãne: 'Re ihâimana u'âsi mono nhib'a'uwẽ norĩ, ihâiba za'ra hã, 144 miu na. Ta norĩ hã uburé Izaraéu nhihudu norĩ wamri 're ihâimana za'ra mono hawimhã. 5 Zudaha nhihudu 'remhã 12 miu na ihâiba za'ra hã. Duré Rubẽhẽ nhihudu hã 12 miu na. Duré Gadihi nhihudu hã 12 miu. 6 Duré Aséhé nhihudu hã 12 miu na. Duré Nafitalihi nhihudu hã 12 miu na. Duré Manaséhé nhihudu hã 12 miu na. 7 Duré Simiãhã nhihudu hã 12 miu na. Duré Levihi nhihudu hã 12 miu na. Duré Isacaha nhihudu hã 12 miu na. 8 Duré Zébulõhõ nhihudu hã 12 miu na. Duré Zuzéhé nhihudu hã 12 miu na. Duré Bẽzamihĩ nhihudu hã 12 miu na.
Da'ahâ uptabi hã da'uza ihâirã ré idasimasabzé, 'Re ihâimana u'âsi mono nho're
9 Taha parimhã, wa tô duré da'a'madâ, ĩnho're da'ahâ uptabi na idasimasa hã daza'rata waihu'u ãna, dapoto mono bâ, duré dawamri mono bâ duré dahâimanazé mono bâ duré damreme sipo'o mono bâ 're idamreme zusi mono zama. Hâiwi te uburé aimasam ni, Apito simasisizém nho're, duré Pone'ẽrebâ i'rare nho'reb zama, da'uza ihâirã ré, duré wa'a su, da te tété za'ra ré. 10 Ãne te nasi tahãsi ni, dahârâ 'rãihâ na:
— Danho'reptuzé hã, wate 'Re ihâimana u'âsi mono, uburé danhipai u pire uptabi na Apito simasisizém na isãmra hawip si, duré Pone'ẽrebâ i'rare hawib zama.
11 Uburé hâiwa hawi romhuri'wa norĩ hã te hâiwi aimasa, Apito simasisizé mana wawi. Dama ipire norĩ mana wawib zama te aimasa, duré maparane si'uiwa na ropodo ihâiba ré norĩ mana wawib zama. Tawamhã ta norĩ hã ma tô hi'rãtitõ rere, ti'ai u. Ti'ubu na ma tô roptob za'ra, Apito simasisizém nho're. 'Re ihâimana u'âsi mono ãma te duré tiwata za'ra, 12 ãne:
— Tane tô. Wate za'ra 'Re ihâimana u'âsi mono ãma si wa za ãma 're wawata u'âsi za'ra, waihu'u pese uptabi wa, rowaihu'u tede'wai wa, duré wẽ uptabi wa, duré wazé pese uptabi wa, duré siptete uptabi wab zama.
13 Tawamhã 24 na dama ipire norĩ ihâimana za'ra 'remhã ma tô misi ĩzadanha, ãne:
— E 'wam norĩ hã ã hã, da'uza ihâpa ihâirã ré hã. E ma hawi we isi'aba'ré.
14 Tahawa, wa tô sada'â, ãne:
— Me. Ĩma waihu'u õ di. Aima waihu'u pese za'ra di, a hã!
Tawamhã ma tô ĩma wasu'u za'ra, ãne:
— Ã norĩ hã rob'rãsutuzéb ãma da te 're irobzépata za'ẽtẽ za'ra mono zéb 'rãsutu u, hâiba ré iwairébé. Ã norĩ hã ma tô ti'uza ihâpa hã hâ upsõ za'ra, Pone'ẽrebâ i'rare wapru na. Tahawa ma tô ti'uza hâirã uptabi za'ra. 15 Tahawa, te ã norĩ hã 'Re ihâimana u'âsi mono simasisizém nho're aimasa. Bâtâ na duré mara na zama te ã norĩ hã te te tãma 're romhuri za'ra, isõrõwa 'ri 'rãihâ ãma. Tawamhã Apito simasisizém na isãmra hã te za i'wawi 're simapa za'ra, i'rata 're isãmra u'âsi za'ra mono zém na. 16 Tawamhã niwa mra hã duré 'rubu zama te te oto isépata za'ra da hã mare uptabi di. Bâtâ ro hã te te oto 're hâiba zata za'ra mono õ di za, duré siwa'ru marĩ wa'ro zama. 17 E marĩ wa. Pone'ẽrebâ i'rare Apito simasisizé wa'wa isa hã te za i'madâ'â'wa na oto tãma 're hâimana za'ra. Te za duré te te 're simroi u'âsi, ub're â dahâimanazé isi'utõrĩ'õ nhomri'wai u. Tawamhã duré 'Re ihâimana u'âsi mono hã te za itõmo u hã tãma u'õ za'ra, 're 'ru'ru mono tõ da oto.