— We aimorĩ!

2 Tawamhã wa tô duré rob'madâ. Te rob'madâ'â wamhã, awaru i'a hã wa tô 'madâ. Isisi isãmra hã te 're ti'â, umnhi'ã. Tawamhã ma tô duré tãma sẽrẽ ni, apito nhoprezé hã. Taha pari ma tô wara ti'ai u, marĩ na ai'uté'wa na, duré tô tinhitob'ru norĩ na te te ai'uté za'ra da.

3 Taha parimhã, Pone'ẽrebâ i'rare hã ma tô duré pru, maparane ãma ibaihâ nhinha uptobzé hã. Tawamhã wa tô duré wapa, isãna're ãma ropodo ihâiba ré ihârâ hã, ãne:

— We aimorĩ!

4 Tawamhã awaru ihâiba amo hã ma tô duré watobro, ta hã ipré na hã. Isisi isãmra ma, ma tô tãma sõmri ni iwaihu'u pe hã, dasi'wapé hã te te dazada wazere da, ti'ai ãma 're idahâimana za'ra mono norĩ da, 'râwi 're dasisimroi mono da. Taha ma, ma tô duré sib'ézé 'wapa hã sõmri ni.

5 Tawamhã Pone'ẽrebâ i'rare, si'ubdatõ ãma hã ma tô duré pru, ibaihâi nhinha uptobzé hã. Taha pari, wa tô duré wapa, si'ubdatõ ãma ropodo ihâiba ré ihârâ hã, ãne:

— We aimorĩ!

Tawamhã wa tô duré rob'madâ. Te rob'madâ'â wamhã, wa tô 'madâ, awaru i'rãdâ hã. Isisi isãmra hã te marĩ pire pibuzé 're ti'â, tinhib'rata. 6 Tawamhã wa tô duré wapa damreme ne hã, maparane si'uiwa na ropodo ihâiba ré norĩ wa'wa hawimhã, ãne:

— Misi na amnho trigu pire pibuzé wa'â hã misi bâtâ na ni'wa te te romhuri wa, ipawa'âbâzém ne. Duré si'ubdatõ na amnho cevada pire pibuzé wa'â hã, ni'wa tô misi bâtâ na te te romhuri wa, ipawa'âbâ ne. Tane nherẽ, azeitona 'rãi wa'ui wabre hã duré uva 'rãi wa'u isé hã, wamnarĩ tõ.

7 Taha parimhã, Pone'ẽrebâ i'rare, ma tô duré pru, maparane si'uiwa na ãma ibaihâ nhinha uptobzé hã. Tawamhã wa tô duré wapa, maparane si'uiwa na ãma ropodo ihârâzé hã, ãne:

— We aimorĩ!

8 Tawamhã wa tô rob'madâ. Te rob'madâ'â wamhã, wa tô 'madâ, ĩnho're isa awaru i'uzé amarelu hã. Isisi isãmra hã Adâ'â na isisi hã. Taha zarina te mo, Hades^a na romnhisi hã. Tawamhã ta norĩ ma, ma tô sõmri ni iwaihu'u pe hã, ti'ai ãma 're idahâimana za'ra mono hã sib'ézé 'wapa na te te da'uprosi zahuré da, maparane si'uiwa na dahâimana za'ra mono wamhã, misi si dasi'utõrĩ mono da, mram na, duré dahâzé pire na, duré abaze zahi na zama.

9 Tawamhã Pone'ẽrebâ i'rare hã ma tô oto pru, imrotõ ãma ibaihâ nhinha uptobzé hã. Te te pru wamhã, wa tô 'madâ za'ra, danhoprubzéb zatazéb zahâpâ 'Re ihâimana u'âsi mono nhimiroti te te dama 're 'mahârâ za'ra mono 'ru te, da te isimro norĩ pẽ'ẽzani hã, duré õne u'âsi 're siwasu'u za'ra mono 'ru te, Zezusihi zazei'wa na. 10 Ta norĩ hã te hârâ 'rãihâ na nasi tihârâ za'ra, ãne:

— Danhipai u 're I'aihâimana mono, Aiwazé pese na duré sena na! E niwa te za ãma i'arowairé, ti'ai ãma 're idahâimana za'ra mono norĩ ãma hã, tãma arob'manharĩ wasété da hã, te te wanhimroi 'ru te.

11 Tawamhã hâiba mono bâ ma tô tãma sõmri za'ra ni, i'uza ihâirã hã. Ma tô duré tãma nharĩ za'ra ni, suru na a'â simi'ẽ na simipari za'ra da, isisãnawã norĩ isine za'ra Cristuhu ma romhuri'wa norĩ za da te isimro da hã isa'ratazé ibâ na ihâimana za'ra zéb u.

12 Taha parimhã, wa tô duré 'madâ, Pone'ẽrebâ hã. Imropâ ãma ma tô pru, ibaihâ nhinha uptobzé hã. Tawamhã awa'awi ma tô ti'ai popo isa'ẽtẽ uptabi hã watobro. Bâdâ ma tô titobra, da'uza ihâ 'rãdâ dadâ'â wa, ãma 're idasi'uza zara mono ne. Duré a'amo zama ma tô titõmo wapru, dawapru ne. 13 Wasi norĩ hã ma tô rere ti'a u, rob'rã figu zahadu a ré 're irere'e mono ne, rowa'u isiptede te te 're sãsã'ã za'ra mono wa, iwede hã. 14 Hâiwa hã ma tô asisinha, ibaihâ isisinha ne. Tawamhã ẽtẽ'rãihâ norĩ hã duré rob'ré za'iti norĩ zama ma tô duré uburé sina si'ré za'ra. 15 Tawamhã daro mono bâ apito norĩ 're ihâimana za'ra mono hã duré da'madâ'â'wa norĩ hã duré dasi'wapéi 'manharĩ'wa norĩ nhib'apito norĩ hã, duré isibro pese norĩ hã duré pire na 're ihâimana za'ra mono norĩ hã, duré uburé pese 're idahâimana za'ra mono, wada'uri zarina titede'wai ma romhuri'wa norĩ hã, duré sima iwẽ na 're ihâimana za'ra mono hã ma tô aima'uri za'ra ẽtẽ 'rãihâ ãma ab're siromo wa, duré ẽtẽ 'rãihâ nhi'riti 'reb zama. 16 Tawamhã te nasi si'mahârâ za'ra ẽtẽ 'rãihâ ma, duré ẽtẽ 'rãihâ nhi'riti ma zama, ãne:

— We wanhisiwi airere'e aba. Duré wanhimi'uri za'ra wa'aba, Apito simasisizém na isãmra tõmo nhiti. Duré Pone'ẽrebâ i'rare zahizé wi wa'wawi aimapa za'ra wa'aba. 17 E marĩ wa. Bâdâ hã ma tô oto iwa waptãrã, isahi zahuré zé, wa te 're isépata za'ra mono da hã. E 'wa hã isimihâ zahuré zé te te 'wapé da bâ.