Ibaihâ isinhai ré, duré Pone'ẽrebâ i'rare
5
Tawamhã wa tô 'madâ ibaihâ isinhai ré, Apito simasisizém na isãmra tinhib'rata nhimire niwĩ te te 're i'âri, i'ui'éré hã si'uiwa na, duré 7 na i'uptob ré hã siwasihu tõ da. 2 Tawamhã wa tô duré 'madâ, hâiwa hawi romhuri'wa iwaihu'u pese uptabi hã. Ta hã te hârâ 'rãihâ na nasi hâ, ãne:— E 'wa hã te sada tihâiba danhipai u ipire uptabi hã, ibaihâ nhinha uptobzé te te iprub da hã, duré te te i'ridawa da zama.
3 Tane nherẽ, ni'wa hã sada hâimana õ di, hâiwa ãma hã duré ti'ai ãma hã duré ti'ai 'rowib zama, ibaihâ isinhai ré te te i'ridawa da hã duré te te isõré da hã, niha i'remhã rob'ui'éré inomro hã. 4 Tahawa, wa tô aiwa'õi u'âsi, ni'wa hã danhipai u ipire hã sada hâimana õ wa, ibaihâ nhinha te te i'ridawa da hã, duré niwamhã i're rob'ui'éré inomro te te i'madâ'â da zama. 5 Tawamhã 24 na dama ipire norĩ ihâimana za'ra 'remhã, te misi ĩma tinha, ãne:
— Tô'ã, aiwa'õ tõ! Ma'ãpé 'madâ'â! Õhõta, Hu'u Zérépa, Zudaha nhihudu, Davihi nhihudu. Ta hã ma tô uburé marĩ iwasété na ai'uté. Ta hã te sada tihâiba, 7 na ibaihâ nhinha uptobzé te te iprub da hã, duré te te i'ridawa da zama.
6 Tawamhã wa tô 'madâ misi, Pone'ẽrebâ i'rare hâiwi isa hã Apito simasisizé wa'wa. Ta hã ma tô siwi uirĩ maparane si'uiwa na ropodo ihâiba ré norĩ hã, duré dama ipire norĩ zama. Pone'ẽrebâ i'rare, da te wĩrĩ wa, da te iwa'rézéb ré hã. Taha ma hã, 7 na i'u hã te tãma tihâimana za'ra, duré 7 na ito hã. Ta norĩ hã 7 na 'Re ihâimana u'âsi mono te, ihâiba'õ norĩ te wasu'u za'ra, ti'ai ãma 're idahâimana za'ra mono norĩ u te te isatõrĩ za'ra, daro mono bâ. 7 Tawamhã Pone'ẽrebâ i'rare hã ma tô itẽme ai'ré, Apito simasisizém na isãmra u. Tahawa, ma tô ti'â ibaihâ nhinha, tinhib'rata nhimire niwĩ te te 're i'âri hã. 8 Tawamhã ãne hã te te 'manharĩ wamhã, maparane si'uiwa na ropodo ihâiba ré norĩ hã, duré 24 na dama ipire norĩ zama ma tô hi'rãtitõ rere isõ're. Hâiba mono bâ, te tinhib'rata tété za'ra, rowamremezé harpa na isisi hã. Duré ẽtẽ waipo oru 'manharĩ na hâsizé wa, te tété za'ra, wedewa'u isadaze i'masi hã. Ta hã 'Re ihâimana u'âsi mono nhib'a'uwẽ norĩ nhimirowaptẽrẽ te wasu'u. 9 Tawamhã ta norĩ hã danho're itém na ma tô tinho're za'ra, ãne:
“A hã i'aipire uptabi sada hã ibaihâ nhinha i'âri da hã, duré i'uptobzé iprub da hã.
E marĩ wa. Ma tô aiwĩrĩ ni. Tahawa aiwapru na ma tô 'Re ihâimana u'âsi mono ma ida'awa'â, dawamri mono bâ, duré damreme sipo'o mono bâ 're idamreme zusi mono hã, duré dapoto mono bâ, duré dahâimanazé mono bâ.
10 A hã ma tô i'manha, ã norĩ hã sasedoti na 're hâimana za'ra mono da hã, 'Re ihâimana u'âsi mono ma, te te 're romhuri za'ra mono wa. Tawamhã duré ta norĩ hã te za pire na 're hâimana za'ra, ti'ai ãma dama hã.”
11 Tawamhã wa tô duré rob'madâ. Te rob'madâ'â wamhã, hâiwa hawi romhuri'wa norĩ hã wa tô 'madâ'â za'ra, ahâ uptabi na. Hâiwi te aimasa. Apito simasisizé mana wawi, ma tô siwi uirĩ, duré maparane si'uiwa na ropodo hâiba ré ihâimana za'ra norĩ mana wawi, duré 24 na dama ipire norĩ mana wawib zama. 12 Ta norĩ hã te tinho're na ãma tiwata za'ra, sõ're 'rãihâ na, ãne:
“Pone'ẽrebâ i'rare, da te dasiwi iwĩrĩ hã, danhipai u pire uptabi wa, sada hã ãma 're idawata za'ra mono da hã, waihu'u pese uptabi wa, duré danhibrop tede'wai wa, duré rowaihu'u tede'wai wa, duré siptete uptabi wa, duré wazé pese uptabi wa. Duré waihu'u pese uptabi wa, Õhõ ãma si 're idawata u'âsi za'ra mono da si, iwẽ hã.”
13 Tawamhã wa tô wapa, uburé 'Re ihâimana u'âsi mono nhimipoto norĩ hã, hâiwa ãma 're ihâimana za'ra mono norĩ hã, duré ti'ai ãma hã duré ti'ai 'rowi adâ 're ihâimana za'ra mono norĩ hã duré â poré wa, 're ihâimana za'ra mono norĩ hã, uburé ropodo hâiwa ãma duré ti'ai ãma 're ihâimana za'ra mono norĩ hã. Ta norĩ hã te tinho're na tiwata za'ra, ãne:
“Apito simasisizém na isãmra ãma duré Pone'ẽrebâ i'rare ãma, wa za ãma 're wawata u'âsi za'ra, wazé pese uptabi zahuré wa, duré wẽ uptabi zahuré wa, duré waihu'u pese uptabi zahuré wa, õne u'âsi tãma 're hâimana zahuré mono wa.”
14 Tawamhã maparane si'uiwa na ropodo hâiba ré ihâimana za'ra norĩ hã ma tô nasi sada'âbâ za'ra, ãne:
— Tane tô!
Tawamhã duré dama ipire norĩ hã ma tô hi'rãtitõ rere. Ma tô duré ta norĩ hã ãma tiwata za'ra.