'Re ihâimana u'âsi mono ãma 're idawata za'ra mono zé, hâiwa ãma
4
Ãne parimhã, wa tô duré rob'madâ, ĩnhotõ 'rowim ne. Tawamhã, wa tô 'madâ 'ridawa hã, hâiwa ãma 'ridawa haré isa hã ĩnho're. Duré danhimnhihârâzém ne damreme, iwana ré te te ĩma inharĩ hã ma tô duré ĩma tinha, ãne:— We ãwa sai'uri, i'ru zahi zarina za iromhâimanazé hã te aima ahâi'ré da, ãne hã romhâimana za'ra parimhã.
2 Tawamhã awa'awi pesere 'Re ihâimana u'âsi mono Pẽ'ẽzani hã ma tô ĩ'â, te te ĩma aromhâi'ré da. Tame hâiwa ãma hã, Apito simasisizé te za. Ni'wa hã te ãma nhamra. 3 Apito simasisizém na isãmra ubu hã rã uptabi di, ẽtẽ'ubuzi zaspi na isisi ne, duré sardiu na ẽtẽ'ubuzi isisi ne zama. Apito simasisizé mana wawimhã, tãiwaipore ma tô rob'uiwẽ, ẽtẽ'ubuzi ro'o uzé esmerauda na isisi ne. 4 Apito simasisizé mana wawimhã, te duré aimasa 24 na apito simasisizé hã. Taha na te ai'ubumro, 24 na dama ipire norĩ hã i'uza ihâirã ré. Duré sõpre ré te asimro, ẽtẽ waipo pré oru 'manharĩ na. 5 Apito simasisizém hawimhã, tã si'ubuzi ne hã te nasi a'ubuzi, duré iwapsa'a zama duré irãrã'ã zama. Isõ'remhã, 7 na te 'rãsitõ hã aimasa, ro'o ré. Ta norĩ hã 7 na ihâiba'õ norĩ, 'Re ihâimana u'âsi mono te. 6 Apito simasisizém nho'remhã, te tihâiba â poré simhi ne hã, â isarob'a uptabi ne hã.
Apito simasisizé mana wawimhã, i'a're mono bâ, te tihâimana za'ra, 4 na ropodo ihâiba ré norĩ hã itõmo ahâ hã, isõ're niwĩ ito hã duré ibabarã niwĩb zama. 7 Ropodo ihâiba ré imorĩ'rada hã, hu'u zéré pa ne hã. Isãna'remhã, powawẽ iba'õmo ne hã. Si'ubdatõ ãma hã, ti'ai ãma a'uwẽ ubu ne hã. Maparane si'uiwa ãma hã, si'u hâiwi iwara ne hã. 8 Maparane si'uiwa na ropodo ihâiba ré ihâimana za'ra norĩ ma hã, hâiba mono bâ te isaribi hã imropâ na tãma tihâimana za'ra, ito hã isõ're niwĩ duré ibabarã niwĩ tãma ihâimana za'ra norĩ ma hã. Bâtâ bâre duré mara bâre zama, tinho're hã te te sahâri za'ra õ di, ãne hã:
“Iwasété waihu'u õ, iwasété waihu'u õ, iwasété waihu'u õ. Ta hã Uburé Danhib'apito 'Re ihâimana u'âsi mono, Iwaihu'u pese uptabi. Marĩ õ ré, te 're hâimana u'âsi. Duré ãhã na te 're hâimana. Duré niwa za we imorĩ.”
9 Maparane si'uiwa na ropodo hâiba ré ihâimana za'ra hã, Apito simasisizém na isãmra hã waihu'u pese uptabi wa, duré wazé pese wa, te nasi ãma tiwata za'ra, õne u'âsi 're isãmra mono ãma. 10 Tawamhã ropoto norĩ hã nasi ãma wata za'ra sidâpâ, ma tô 24 na dama ipire norĩ hã hi'rãti na nasi tãma rere, isõ're. Te nasi ãma tiwata za'ra duré. Tinhoprezé hã te nasi sani za'ra, Apito simasisizém nho're. Te nasi nharĩ za'ra, ãne:
11 “Wanhib'apito, wate 'Re ihâimana u'âsi mono, A hã aiwẽ uptabi di, duré sada, ai'ãma si aiwẽ uptabi wa 're idawata za'ra mono da hã, aiwazé pese wa, duré aiwaihu'u pese uptabi wa.
E marĩ wa. A hã uburé marĩ apoto mono wa. Asima iwẽ zarina ma tô uburé marĩ i'apo. Taha zarina te 're hâimana za'ra.”