“Ã hã 7 na 'Re ihâimana u'âsi mono te ihâiba'õ norĩ, duré wasi 7 na tãma ihâimana za'ra nhimiroti. Ĩma waihu'u pese di, ãhã na marĩ i'manharĩ za'ra wa'wa hã. Te 're asiwasu'u za'ra wa'aba mo, aihâiba ré na. Tane nherẽ, aipẽ'ẽ 'remhã atâ'â za'ra wa'aba di. 2 Ma'ãpé atopo'o za'ra wa'aba! Duré siptete za'ra wa'aba, ãhã na marĩ iwẽ zahadu aima ihâimana za'ra wa'wa hã aiwi dâ'â pese za'ra wa'aba õ ré. E marĩ wa. Ĩma waihu'u pese di, marĩ 're i'manharĩ za'ra wa'aba mono hã, zahadu 'Re ihâimana u'âsi mono te te sima 're iwẽ mono zéb zarinai õ wa. 3 Tahawa, ma'ãpé ãma aipo're pu'u za'ra wa'aba, iwaihu'u za'ra wa'aba zém na hã, duré iwapari za'ra wa'aba zém na zama. 'Re 'madâ'â pese za'ra wa'aba mono, duré aiwasété na asisãmri za'ra wa'aba. Atopo'o za'ra wa'aba õ wamhã, rosa'rese õ ré, wa za ãma atẽme ĩmorĩ 'wa, isimisaihuri ne. Tawamhã bâtâ pibuzé ãma atẽme ĩmorĩ aba zé hã rosa'rese õ ré, waihu'u za'ra wa'aba õ di za. 4 Tane nherẽ, ni'wam norĩ Sadési ãma 're i'ai'ubumroi wa'aba mono norĩ hã te ai'umro na asima 're i'madâ'â pese za'ra wa'aba mo, ai'uza hã hâirã na aima 're hâimana za'ra wa'aba mono da. Ai'uza hâirã na te za ĩsiré 're anomro aba mo, a norĩ wa'wa hã ibâ na sada 're anomro wẽ wa'aba mono wa.

5 “Uburé marĩ iwasété na ai'uté'wa ĩwi sipi'rai ãna tidâ'âzéb u 're hâimana mono wamhã, ta hã te za uza hâirã na 're si'uza. Tawamhã niwa isisi hã te ipari da hã mare di, Ibaihâ na rob'ui'éré dahâimanazé isi'utõrĩ'õ ãma za 're idahâimana u'âsi za'ra mono norĩ nhisi hawimhã. Wa hã wa za sõ'awi wasu'u, ĩte na hã Ĩmama nho're duré ite hâiwa hawi romhuri'wa norĩ nho'reb zama.

6 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã.”

7 — Filadéufia ãma isazei'wa norĩ 'madâ'â'wa hâiwa hawi romhuri'wai ma, te za irob'ui'é, ãne:

“Ã hã marĩ iwasédé, ãma ihâimana õ duré sena uptabi 're ihâimana mono nhimiroti. Taha ma te 're hâimana, 'ridawazé apito Davihi ma aré 're ihâimana mono hã. Marĩ te te 'ridawa wamhã, ni'wa te te sito waihu'u õ di. Duré marĩ te te sito wamhã, ni'wa te te 'ridawa waihu'u õ di.

8 “Ĩma waihu'u pese di, ãhã na marĩ i'manharĩ za'ra wa'wa hã. Ĩma waihu'u pese di, i'asib'uware za'ra wa'aba na hã. Tane nherẽ, te ĩnhimiroti zarina 're anomro aba mo. Duré sena na te ĩ'ãma si 're aihâimana za'ra wa'aba mo. Tahawa, 'ridawa hã wa 'ridawa asõwab za'ra wa'aba, ni'wa te te isito waihu'u õ hã. 9 Ĩwapari za'ra wa'aba! Ni'wam norĩ Satanasihi te na 're ihâimana za'ra mono norĩ hã, isadawa nhipese norĩ hã, Zudeu na 're isiwasu'u za'ra mono norĩ hã, Zudeu õ nherẽ, ta norĩ ma, wa za 'manharĩ za'ra, atẽme si'aba'réi wa'aba da, hi'rãtitõ aima sina wa'aba da, asõ're. Tawamhã uburé ta norĩ hã te za waihu'u za'ra, ĩma i'asawi uptabi za'ra wa'aba na hã. 10 Ĩnhimiroti hã te 're i'madâ'â pese za'ra wa'aba mo, asimi'ẽ na robzépada hã 're 'wapéi hâ za'ra wa'aba mono da. Tahawa, ropipa ti'ai ãma 're idahâimana za'ra mono norĩ pibuzé za iwatobro wi hã, wa za ai'madâ'â pese za'ra wa'wa, ti'ai ãma uburé dawamri mono bâ 're idahâimana za'ra mono norĩ zada za ihâimana wi hã. 11 Wa za wei morĩ su. Tahawa, ma'ãpé aima ihâimana za'ra wa'wa hã asima 'madâ'â pese za'ra wa'aba, ni'wa te te aiwi 'mai'âri aba tõ da, asõprezé^a hã.

12 “Ni'wa, uburé marĩ iwasété na te te i'ai'uté ãma hã wa za 'manha, 'ri uparizém ne 're sa mono da, ĩte 'Re ihâimana u'âsi mono nhorõwa 'ri 'rãihâ ãma. Tawamhã ta hawimhã niwa iwatobro da hã, mare uptabi di za, ta hã. Tawamhã taha ãma, wa za ãma ui'éré, ĩte 'Re ihâimana u'âsi mono nhisi hã duré ĩte 'Re ihâimana u'âsi mono te 'ri nho'õmo nhisi zama, Zeruzalẽ itém nhisi, hâiwa hawi za we te te isi'ra ĩte 'Re ihâimana u'âsi mono hawimhã. Tawamhã ĩnhisi ité hã wa za duré ãma ui'éré.

13 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã.”

14 — Laudiséa ãma isazei'wa norĩ 'madâ'â'wa hâiwa hawi romhuri'wai ma, te za irob'ui'é, ãne:

“Ã hã Tô Sena na isisi nhimiroti, duré sena na 'Re ihâimana u'âsi mono wasu'u'wa i'umnhasi nhimiroti. Duré taha zadawa na ma tô 'Re ihâimana u'âsi mono hã uburé te te aropoto. 15 Ĩma waihu'u pese di, ãhã na marĩ i'manharĩ za'ra wa'wa hã. Ĩma aiwaihu'u pese za'ra wa'aba di, â wahâ ne niwamhã duré â wa'ro ne i'aihâimana za'ra wa'aba õ na hã. Wa aré ĩsima wẽ pese, misi haré aihâimana za'ra wa'aba da, â wahâ ne niwamhã duré â wa'ro ne. 16 Tane nherẽ, a norĩ wa'wa hã â wapu ne 're aihâimana za'ra wa'aba mono wa, â wahâ zé ne 're aihâimana za'ra wa'aba mono õ wa, niwamhã duré â wa'ro ne 're aihâimana za'ra wa'aba mono õ wa, aima ĩnho'o'o za'ra wa'aba da si. 17 Te 're asiwasu'u za'ra wa'aba mo, ãne: ‘Wanhibro pese za'ra di. Marĩ, wa te 're sépata za'ra mono õ di. Duré uburé marĩ te wama 're hâimana za'ra, sô 're iwanhimnhasi za'ra mono hã.’ Tane nherẽ, aima waihu'u za'ra wa'aba õ di, aipẽ'ẽ 're, irobzépata za'ra wa'aba na hã, duré aima irobzei'õ za'ra wa'aba na hã, duré aipẽ'ẽ 're i'asibrob'õ za'ra wa'aba na hã, duré ai'uréiwi 're i'anomro aba mono na hã, duré i'atob'a za'ra wa'aba na zama. 18 Tahawa, wa za ãne aima roti za'ra wa'wa. Ma'ãpé ĩwi uipra za'ra wa'aba, ẽtẽ waipo pré oru iwazari'õ hã tô sena uptabi ãma asisibro pese za'ra wa'aba da. Duré da'uza ihâirã zama uipra za'ra wa'aba, ãma asi'uza za'ra wa'aba da, ai'uréiwi asiséb ãna 're i'anomro aba mono zé hã ãma upsibi za'ra wa'aba da. Ma'ãpé duré uipra za'ra wa'aba, datõmo nhihâzé hã ãma asitõmo nhihâ za'ra wa'aba da, oto rob'madâ'â wẽ za'ra wa'aba da. 19 Uburé ĩma isawi pese norĩ ma, wa wa hã te tãma 're apẽtẽ. Wa duré te tãma 're arob'manharĩ. Tahawa, ma'ãpé marĩ na sena na ãma 're aihâimana za'ra wa'aba mono. Duré aiwasété na asisãmri za'ra wa'aba, aipizari za'ra wa'aba da, 'Re ihâimana u'âsi mono u. 20 Ma'ãpé ĩwapari za'ra wa'aba! Wa hã wa 'ridawab za. Wa duré 'ridawa ta'a. Tawamhã ni'wa hã te te ĩmreme wapari wa, te te ĩma 'ridawa wamhã, wa za ãzé, isõrõwa u. Tawamhã wa za wasiré wasa ni.

21 “Uburé marĩ iwasété na ai'uté'wa norĩ ma hã, wa za tãma pisutu za'ra, ĩte Apito simasisizéb ãma ĩzababa 're si'ubumroi mono da, uburé marĩ iwasété na te ai'uté wa, ãhã na Ĩmama zababa 're ĩnhamra mono ne, ite Apito simasisizéb ãma.

22 “Tahawa, ni'wai ma isimiparizé tãma hâimana wamhã, te te wapari, Ĩmama Pẽ'ẽzani isazei'wa norĩ, 7 na 'ri nho'õmo mono bâ siré 're isi'rã'õtõ mono norĩ ma, te te irotizé hã.”