2 Ĩsiwaihu, ĩma i'asawi uptabi, 'Re ihâimana u'âsi mono ma, wa tô ai'ãma 're ĩmreme u'âsi, rowẽ na 're aihâimana mono da, aihâzé ãna, aipẽ'ẽ 're aima rowẽ na 're i'aihâimana mono ne. 3 Ĩma rowẽ uptabi di, nima norĩ wasisãnawã norĩ we isihudu hã te te ĩma aiwasu'u za'ra wa, asiptete sina 're i'aihâimana mono na hã duré tô sena 'Re ihâimana u'âsi mono nhimiroti na ãma 're i'aihâimana u'âsi mono na hã. 4 Marĩ te te sina ĩma rowẽ wazere õ uptabi di, ĩ'ra norĩ tô sena 'Re ihâimana u'âsi mono nhimiroti zarina 're inomro mono na rowasu'u te iwapari ne hã.

5 Ĩsiwaihu, ĩma i'asawi uptabi, wasisãnawã norĩ ma, te tô sena aihâimana na marĩ 're i'ab'manharĩ mo, 're awaihu'u mono õ nherẽ. 6 Ta norĩ hã ma tô asimizawizém na aiwasu'u za'ra, isazei'wa norĩ nho'a, ãme. Tahawa, ma'ãpé, ãma aime za'ra na, timorĩ na te te tô ãma uzusi u'âsi za'ra mono da, 'Re ihâimana u'âsi mono ma, te te 're irowẽ zani mono zéb zarina. 7 E marĩ wa. Ta norĩ hã ma tô Cristuhu ma romhuri zarina, tinem na hã ãma sãna'rata za'ra, zudeu'õ norĩ ãma isime za'ra da hã, te te sima wẽ za'ra ãna. 8 Tahawa, wa norĩ isazei'wa norĩ hã wa za ãma 're wasina, ã norĩ ãma hã. Tawapsi, wa za isiré romhuri hã wa te 're 'manharĩ za'ra, tô sena 'Re ihâimana u'âsi mono nhimiroti na rowasu'u na hã.

9 Rob'ui'éré hã wa tisõ, isazei'wa norĩ ma. Tane nherẽ, Diutrefesi pire na isazei'wa norĩ ma, 're hâimana mono da, te te sima 're iwẽ mono hã, ta hã te te sima wẽ õ di, ĩnhimiroti te te iwapari da hã. 10 Tahawa, ãma atẽme ĩwisi wamhã, wa za tãma waihu'u, uburé marĩ te te 're i'ab'manharĩ mono zém na hã, ãne: Te te wa'ãma iwasété pese za'ra zém na duré tizadawa nhipese na te te dama iwawasu'u za'ra zém na zama. Tane nherẽ, taha si õ di, tiwasédé te te 're i'manharĩ mono zé hã. Wasisãnawã norĩ darob amoi hawi itẽme 're sihutu mono wamhã, te te 're awaibui mono õ di. Duré ni'wa hã te te waibu da nherẽ, te za tiwi sawi. Te za duré waze, isazei'wa norĩ hawimhã.

11 Gaiu ĩsiwaihu, ĩma i'asawi, marĩ iwasédé hã 're sizusi mono tõ. Iwẽ si 're anhizusi mono. Ni'wa hã marĩ iwẽ si te te 're i'ab'manharĩ mono hã, ta hã 'Re ihâimana u'âsi mono te. Tanei õ di, ni'wa hã marĩ iwasété si, te te 're ab'manharĩ mono wamhã, niwa 'Re ihâimana u'âsi mono te te 'madâ'â õ di^a.

12 Dimetriu hã, uburé te da te dasiwi 're wasu'u wẽ. Tô sena 'Re ihâimana u'âsi mono nhimiroti hã te duré te te 're wasu'u wẽ. Wa norĩ zama wa wa te 're wasu'u wẽ za'ra. Ãne hã aima waihu'u pese di, wa te 're irowasu'u za'ra mono zé, tô sena na hã.

13 Zahadu marĩ ahâ uptabi di, te aima ãma iwaihu'uzéb da hã. Tane nherẽ, te ĩsima wẽ õ di, ibaihâ na te aima ãma irob'ui'éré da hã. 14 Romhutu na te i'asõpẽtẽ da si, wa rob'madâ. Tawapsi wa za wasima ãma robzanhamri ni, wasisõ'a.

15 'Re ihâimana u'âsi mono te rowẽ hã, asiré 're ihâimana u'âsi mono da si, iwẽ hã. Ãme asiwaihu'u norĩ ihâimana za'ra hã te ãma siwi asawi. Ma'ãpé duré ĩma sawi za'ra na, tame ĩsiwaihu'u norĩ hã, hâiba mono bâ.