2 Zuwã
Zuwã hã maparane ãma te te duré irob'ui'érézé, isazei'wa norĩ ma
1
Wa hã, Wanhib'apito zazei'wa norĩ 'madâ'â'wa, wa ãma aima rob'ui'éré za'ra wa'wa, Pi'õi ma duré i'ra norĩ maa, tô sena ĩma i'asawi pese za'ra wa'aba norĩ ma. Ĩwétési õ di. Uburé 'Re ihâimana u'âsi mono nhimiroti tô sena 're ihâimana mono waihu'u'wa norĩ zama, te te asawi pese za'ra wa'aba di. 2 Wama asawi pese za'ra wa'aba di, tô sena 'Re ihâimana u'âsi mono nhimiroti 're ihâimana mono, wasiré 're ihâimana u'âsi za'ra mono u'âbâ. Ta hã te za wasiré 're hâimana u'âsi za'ra.3 Wamama 'Re ihâimana u'âsi mono duré Wanhib'apito Cristu Zezusihi zama, isimizawi zahuré zé hã wa'ãma 're ihâimana u'âsi za'ra mono da si, duré wa'ãma 're ipẽ'ẽzé u'âsi zahuré mono da si, rowẽ u'âsi, ãma 're wanomro mono da, tô sena 'Re ihâimana u'âsi mono nhimiroti 're ihâimana mono na duré isimizawizém na.
Tô sena 'Re ihâimana u'âsi mono nhimiroti duré isimizawizé
4 Nima norĩ ai'ra norĩ wa'wa hã, te sõpẽtẽ za'ra wa, ma tô ĩma tirowẽ pese, tô sena 'Re ihâimana u'âsi mono nhimiroti zarina 're hâimana za'ra mono wa, Wamama hã te te wama i'ru za'ra zéb zarina. 5 Tahawa, ĩma i'asawi pese za'ra wa'aba norĩ, ãhã na hã wa za aiwi waptẽrẽ za'ra wa'wa, 're iwasisawi pese za'ra mono da si. 'Re ihâimana u'âsi mono nhimiroti itém na te aima rowasu'u za'ra wa'aba õ di. Tazahã, ã hã wa te 're isaze na'rata za'ra mono hawim haré, wa te 're iwapari za'ra mono. 6 Danhimizawi pese zé hã, ãne: 'Re ihâimana u'âsi mono nhimiroti zahi, wa te 're 'madâ'â pese za'ra mono sina, wa za 're wahâimana za'ra. 'Re isaze na'rata za'ra wa'aba mono hawim haré, ma tô 're iwapari za'ra wa'aba mo, ã hã: 'Re asisawi u'âsi za'ra wa'aba mono sina, 're i'anomro aba mono da si.
7 Dama rob'rãmi'wa norĩ hã ahâ na ma tô ropâ oto sihâi'ré za'ra. Ta norĩ hã, Zezu Cristu ti'ai ãma a'uwẽ na ipoto na te te 're udâ za'ra. Ni'wa hã ãne te te 're i'manharĩ mono hã, ta hã Dama Rob'rãmi'wa, duré Cristuhu Nhitob'ru. 8 Tahawa, ma'ãpé ãma 're pibui pese za'ra wa'aba mono, romhuri wa te atẽme i'manharĩ za'ra wa'aba zé hã, simini za'ra wa'aba tõ da, aipawa'â hã wahuré waibui wa'aba da.
9 Ni'wa hã Cristuhu nhimiroti na 're hâimana mono õ wamhã, duré sihawi ãma sipai wamhã, taha siré 'Re ihâimana u'âsi mono 're hâimana mono õ di. Tanei õ di, ni'wa hã Cristuhu nhimiroti na 're hâimana mono wamhã, Wamama hã te za isiré 're hâimana duré I'ra zama. 10 Ni'wa atẽme wisi aba wamhã, Cristuhu nhimiroti ré atẽme morĩ aba õ nherẽ, asõrõwa u hã âri aba tõ. Duré sawi aba tõ. 11 Ni'wa hã timreme na si te te sawi nherẽ, te za isiré oto tiwasété, isimiromhuri wasété na hã.
Zuwãhã nhimi'ui'éré i'rãsudu
12 Zahadu marĩ ahâ di, te aima iwasu'u za'ra wa'aba da hã. Tane nherẽ, te ĩsima wẽ õ di, rob'ui'éré na te aima ãma irowasu'u za'ra wa'aba da hã. 'Râwi te i'asabu za'ra wa'aba da si, wa ĩsima wẽ, ĩsi'uihâ na te aima rowasu'u za'ra wa'aba da, watoi uptabi zé hã wahuré wama hâimana za'ra da.
13 Isazei'wa norĩ hã, 'Re ihâimana u'âsi mono te te sima ipisutu za'ra norĩ hã, te ãma asawi za'ra wa'wa.