— Ã hawimhã aiwairébé aba, a'uwẽ Ezitu hawi we isani za'ra norĩ me. Abra'ãhã norĩ ma, Izaqui, Zaco, duré isihudu norĩ ma, ti'a hã za te tãma sõmri za'ra da, te tãma ãma iropisutu za'ra zéb u hã ai'aba'réi wa'aba da. 2 Hâiwa ãma ĩma romhuri'wa hã wa za asõwab za'ra wa'aba hã satõ, te te aima sani za'ra wa'aba da, cananeu norĩ hã, amoreu norĩ hã, hitita norĩ hã, perizeu norĩ hã, heveu norĩ hã, duré zebuzeu norĩ hã. 3 Ti'a iwẽ uptabi u te za ai'aba'réi wa'wa, powawẽ hâiwa'u norĩ 're ipraba zahuré mono zéb u, ropĩni me. Tane nherẽ, wa hã asiré wa'aba ĩmorĩ õ di za. E marĩ wa. A norĩ wa'wa a'uwẽ aipẽ'ẽ tete za'ra wa'aba wa, za te ai'uprosi za'ra wa'aba õ'umnhasite.

4 Tawamhã ã hã romreme Izaraéu nhihudu norĩ ma, Mozési te te tãma wasu'u za'ra wamhã, ma tô tisiwa'õ na sãna'rata za'ra. Tahawa, duré tihâiba na marĩ iwa'âbâ za'ẽtẽ na si'ma'wamarĩ za'ra õ di. 5 Tawamhã Uburé Danhib'apito, Mozésihi ma te tãma ti'ru, ãne te te dama nharĩ da:

— A norĩ wa'wa a'uwẽ i'aipẽ'ẽ tete za'ra wa'wa. Za asiré ĩmorĩ za'ra wa'aba nherẽ, duré asiré wa'aba ĩhâimana hâ õ nherẽ, wa hã wa aré tô uburé pese ai'uprosi 'wa. Tahawa, asipesezé marĩ iwa'âbâ za'ẽtẽ mono hã te za isani za'ra wa'wa ãhã na awa'awi. Tawamhã wa hã wa za 'râwi ĩsima wairébé, za marĩ te aima i'manharĩ za'ra wa'aba zéb da hã.

6 Tawamhã ãne Izaraéu nhihudu norĩ, ẽne Sina'i hawi iwairébé hawim haré, tisipesezém na ãma 're si'ma'wamarĩ za'ra mono õ di.

7 Izaraéu nhihudu norĩ te te sima 're 'ri nhoré za'ra mono sidâpâsi, ma tô Mozési hã 'ri iwazéb zahi hã te te simizusi, danhiti prã na. Taha nhisi hã “Romhâ 'manharĩ 'ri iwazéb zahi wa, 'Re ihâimana u'âsi mono, iwa 're isãmra mono na”. Ni'wa Uburé Danhib'apito te te sadawa pibu da, te te sima wẽ wamhã, te za tô õ wamhã itẽme 're ne. 8 Tawamhã Mozési, 'Re ihâimana u'âsi mono, 'ri 're, 're ihâimana mono zéb u 're ne mono da, 're pusi mono sidâpâsi, ma tô uburé danhorõwa 'ridawa ãma hâiwimhã 're dasimasa, da te dasiwi 're 'madâ'â mono da hã, 're izasi mono zéb u. 9 'Re zasi mono wi, ma tô hâiwa'a zarob'a pisutu pe hã te te 're si'ra. Tawamhã te romhâ 'manharĩ na 'ridawa ãma 're simizahâri. Duré ta hawi te Uburé Danhib'apito, Mozésihi ma, te te 're robzanhamri. 10 Tawamhã 'ridawa ãma hâiwa'a pisutu pe, da te 're 'madâ'â za'ra mono wi, ma tô duré dahi'rãtitõ hã tãma 're dasi'ubumro. 11 Tawamhã Uburé Danhib'apito ma tô Mozésihi ma 'râwi pesere te te tãma 're robzanhamri, ni'wa hã tisiwaihu'u ma, te te 're irobzanhamri mono ne. Taha pari ma tô apâ 'ri nhoré u hã 're ne. Tane nherẽ, Zozué, Nuhu 'ra, ipawapto'wa ai'repudu hã ma tô isa'u 'Re ihâimana u'âsi mono te, 'ri ãma hã 're hâimana.

12 Tawamhã Mozési, te Uburé Danhib'apito ma tinha ãne:

— Tô sena õ hã ti'ai u ã norĩ a'uwẽ te simroi mono da hã, ma tô ĩma i'ru. Tane nherẽ, za ni'wa ĩsiré imorĩ da hã ĩma wasu'u õ di. Ãne si ma tô ĩma inha: “Ĩma hã aiwaihu'u pese di. Wa duré aiwẽsãmri pese.” 13 Ãne hã tô sena ĩwẽsãmri wamhã, 're irowa'õtõ mono zé hã ĩma wasu'u na, te aiwaihu'u pese da, duré 're ĩwẽsãmri mono zém na hã te ĩsina 're uwaimrami u'âsi mono da. Ma'ãpé ã a'uwẽ norĩ asib'a'uwẽ 're ihâimana za'ra mono na hã ãma aipo're pu'u.

14 Tawamhã 'Re ihâimana u'âsi mono, ma te ãma sada'â ãne:

— Asiré wa za mo tô. Aiwa'utuzé hã wa za te aima 're sõmri.

15 Tawamhã Mozési hã ma te ãma tãma wa'rã ãne:

— Wasiré aimorĩ dai õ wamhã, ã hawi wawairébé da hã wama rob'ru za'ra tõ, tô'ã! 16 E niha te za duré wasiré aimorĩ za'ra õ nherẽ, aimawi a'uwẽ norĩ hã waihu'u za'ra, asib'a'uwẽ norĩ ãma, duré ĩ'ãma i'aipẽ'ẽtozém na hã. Wasiré 're i'aihâimana u'âsi za'ra mono zé, te za aimawi na 're iwahâimana za'ra mono zé hã te te dama 're ahâi'ré.

17 Uburé Danhib'apito Mozésihi ma, te duré ãne tãma tinha:

— Ĩwi iwaptẽrẽzém na hã wa za tô aiwapa. E marĩ wa. Ĩma i'aiwaihu'u wẽ zarina, duré asina ĩma irowẽ wazere zarina.

18 Mozési hã te duré ãne tãma tinha:

— Ĩzawi na hã, ma'ãpé aihâiba na rowa'a hã ĩma sa'ré na te 'madâ'â da.

19 Tawamhã 'Re ihâimana u'âsi mono, ma te ãma sada'â ãne:

— Uburé ĩhâiba na rowa'a, ĩma 're ihâimana mono hã asõ're te te ro'razâri da hã wa za tô aima 'manha. Duré ĩnhisi iwazéb zahi na wa za aima wasu'u. Wa hã, Uburé Danhib'apito, te ĩsima 're i'awẽ mono hã wa za te 're azawi pese. Duré te ĩsima 're i'awẽ mono ãma hã, wa za 're ĩsiwãrĩ wẽ za'ra.

20 Te duré zahadu ãne tãma tinha:

— Taré oto tô ĩ'ubu 'madâ'â da hã te aima sa'réi õ di za. E marĩ wa. Ni'wa hã ĩ'ubu te te 'madâ'â wa, za tihâimanazém na hã te te uzusi dai õ wa. 21 Ãhãta te ẽtẽ tõmo wawẽ ĩ'ratamhã nomro, a hã isisiwi hâiwi aipara na ãma i'asab da hã. 22 Tawamhã ĩhâiba na rowa'a asõ're te te ro'razâri wamhã, wa za ẽtẽ sipo'o 'remhã asẽ za. Tahawa, ĩnhib'rata na wa za asuwa, wa hã te a'â ro'razâri da hã. 23 Oto ĩnhib'rada te aima sa'réi wamhã, te za ĩbabarãi hawip si ĩba hã i'madâ za. Taré oto tô tane nherẽ, ĩ'ubu hã 'madâ'â õ di za.