Naꞌapam mishidainao toriinpan
2
Aizii kiwiitapa õkiaꞌazon mishidainao ati,
tuukii manawun õaipan utoriinapa-kidan ipai pidannao Tominkaru ati.
Ukowaada naꞌiki upishaa ipai aimaakan Tominkaru ati,
ukamunan kizi ĩꞌati.
Naꞌiki “Kaiman manawun pugaru,”
ukii Tominkaru ati,
ipai aimaakan dauꞌan naꞌiki pidannao dauꞌan.
2 Naꞌiki utoriinapa kapam king-tinpainao dauꞌan,
naꞌiki ipai baꞌoran naobanai-tinpainao dauꞌan.
Utoriinapa wamashaapa kizi kaiman,
aonaa kizi wanyukunuu kasharutapa-kao,
naꞌiki mashaa kizi kapam wataapan wanyukunuu.
Wamishida kizi naꞌiki wamashaapa kizi soo Tominkaru ati,
watukapa-kida kizi uruu idaꞌan mishi waikodan kaimanaꞌo mashaapa-karu.
3 Kaimanaꞌo wuruꞌu toriinapa-karuz kaikapaꞌa,
tuukii Tominkaru,
wakazannaatapiki naubaan naꞌapaꞌo toriinapa-karu.
4 Uruu aipaꞌo ipai pidannao kazannaatinan paꞌoian ai.
Naꞌiki ĩaitapa kizi ipai wuruꞌu parada-karu kidaz,
mishiꞌoraz manawun.
5 Mishi kainaꞌa baudaꞌapa Tominkaru,
naꞌiki kainaꞌa baudaꞌapa pidan idaꞌan wakaimanaakan Tominkaru tuma,
aonaa kanom baꞌoran idaꞌan mani,
soo baudaꞌapa daonaiora Christ Jesus idaꞌan.
6 Uruu taainaꞌoraz ipai,
ipai pidannao wadaun nii,
ukazannaataꞌazon idi ĩdyaun paꞌoian ai.
Tominkaru aitanii kamoo kawanaꞌatiꞌo wuruꞌu Jesus taainanuz naa,
utukapa-kida-kinaa nii mishiꞌo wuruꞌu Tominkaru aipanuz ipai pidannao kazannaatinan paꞌoian ai.
7 Uruu idiꞌo wuruꞌu õzaamata-kaoaz,
naꞌiki õdyuuda-kaoaz kowaadapaꞌo nii naꞌiki tominapa-kidaꞌo nii Gentilenao,a
wuru dauꞌaꞌa mishiꞌoraz kuwai.
Tominkaru kazannaataꞌazoonuz ipai pidannao.
Mishiꞌo kaiwuruꞌu õkuwaaz,
aonaa õmariidapan mani karikaonan unao.
8 Ipai choochiapa-karu kawanaꞌati,
tuukii õaipan daonaioranao,
wuruꞌu taaꞌoraz manawun mishi panyukunuu Tominkaru ati,
õaipan ĩtoriinpan panyukunuu kaimanaꞌo diꞌiki.
Aonaa patoꞌorainpan biiꞌi mani,
naꞌiki aonaa pakashadaakapan biiꞌi mani.
9 Naꞌiki õaipan kapam zunnao aitapan naꞌapam pakaiwadinpan kaiman.
Aonaa kizi ĩkonaunamadan padizo,
oo ĩtinokan padizo naꞌapam karikaonan pakonaunamadin-kinaa nii.
Aonaa kizi ĩatadinpan pakaiwadapan idaꞌan kashoro,
zaanobai,
naꞌiki ishitainii,
toma-kariwai kidaz gold idi.
Naꞌiki aonaa kizi ĩkaiwadan kamicha konaunamaa-kariwai sodi kida,
naꞌiki kawinipinaa kidaꞌoraz manawun.
10 Mazan ĩtukapa-kida kizi paꞌan kaiman kidaꞌo pakaduz baꞌorainao ati.
Ĩtukapa kizi ĩkaduz idaꞌan,
naꞌapam zunnao mashaapan,
wuruꞌu mishidainaouz Tominkaru.
11 Naꞌiki marii zunnao abatapan mashaa kakuwaapatin-karu an Tominkaru paradan dauꞌu,
aonaa turuu ĩwazootapan daonaioranao.
12 Naꞌiki aonaa õkashaapan zunnao kakuwaapan oo kazowautapan choochiapa-karu daonaioranao bii ii.
Marii mashaa ĩabatapan.
13 Ushaꞌapanum kauꞌan Adam kiwiiniꞌo utoma-kao,
udaunaꞌan Eve.
14 Naꞌiki aonaa Adam mani wuruꞌu mariida-kariwaiz,
mazan Eve paꞌan wuruꞌu dikintapaꞌoraz Tominkaru paradan,
omishidan idi pamariida-kao,
uruu idi oꞌoian.
15 Mazan zunnao kazannaata-kao nii pakaudanipan dono,
ĩmishidan an pakawan Tominkaru,
naꞌiki ĩkamarainapanun an,
naꞌiki ĩmashaapan an kaiman,
naꞌiki aitapin Tominkaru aipan kawanaꞌati.