Luke
Saadanii Kaimanaꞌo Kuwai
Diꞌoraz kaarita dauaꞌo
Diꞌoraz kaarita Luke saadanii. Wuruꞌu Luke, uruu Gentile naꞌiki daakataa kapam. Aitapaꞌo pidan uruu, dobataꞌo utominpan, naꞌiki uparada Greek paradan kaimanaiman. Uchiꞌikapauzonii daꞌi apostle Paul tuma ukakuwaatinan dono.
Luke saadan kaarita Theophilus atiꞌo, naꞌiki baꞌoran Gentilenao atiꞌo mishidainaouznaa Jesus. Luke aipan mishidainao aitapan mishiꞌo wuruꞌu ĩtominapa-kida-kaoaz. Tominkaru aipan kawanaꞌatiꞌo wuruꞌu Jesus kaawanuz imiꞌi baara ati kazannaataꞌo nii ipai pidannao oiaꞌo ai, Jewnao naꞌiki Gentilenao kapam.
Kainaꞌa iriba Luke kowaadan aimaakan kida dauꞌan. Soo Luke kaaritan idaꞌa karikaonan usaadinpan: angelnao kunuupan dauꞌu, naꞌiki taapainao kaznizonao tukapankan dauꞌu Jesus, ushakatan daunaꞌan; Jesus makon dauꞌu Tominkaru Dapu iti Upaꞌinan dono zii; Samaria san kamunanun dauaꞌo; naꞌiki daonaiora padantan dauaꞌo padaru idaꞌati.
Tuukii Luke paradan toriinapa-karu dauꞌan; Kaimanaꞌo Kuwai konaukii-kida-kao dauꞌan; zunnao kakuda-kao dauꞌan, Jesus naꞌiki apostlenao kaminkaꞌuapa-kao dauꞌan; mapuraataniinao dauꞌan; oiainao pidannao dauꞌan, naꞌiki Kaimanaꞌo Doronaa dauꞌan.
Paul saadanii kapam masakaudaꞌu Luke dauꞌan pakaaritan idaꞌa, 2 Timothy 4:11 naꞌiki Philemon 24 idaꞌa.
Kaarita buutinpan kida
Kaarita sakadinan 1:1-4
Jesus naꞌiki John Chikaawunuupauzo shakatan atii ĩtuubarun 1:5–2:52
John Chikaawunuupauzo kaudin-kizi dauaꞌo 3:1-20
Jesus chikaawunuu-kao naꞌiki utiwaa-kidapa-kao 3:21–4:13
Jesus kaudinan Galilee Baara ii aka 4:14–9:50
Jesus kaudinaanan pamakopan dono Jerusalem iti 9:51–19:27
Jesus shaꞌapatanii kida pazowii-kao uaꞌii 19:28–22:46
Jesus zaamata-kao, naꞌiki uzowii-kao 22:47–23:56
Jesus kadishitan pamawaka-kizi iki, naꞌiki uaidinan pidannao ati 24:1-49
Jesus naꞌaka-kao aokazi iti 24:50-53