Diꞌoraz saada-kariwai kaarita, New Testament wuruꞌu. Wapichan idaꞌan udakota-kao ‘Kaimanaꞌo Kuwai’ kii. Kainaꞌa 27 ubuu-tinpan.

Wuruꞌu saada-kariwaiz, aonaa pidan kuwaa mani karikaonan. Mazan umanawunuꞌo Tominkaru paradan, ipai pidan atiꞌo. Jesus poitorunao saadan dono wuruꞌu Kaimanaꞌo Kuwai, ĩsaadanuz Greek paradan idaꞌan.

Kotuaꞌiki uruu daunaꞌan, usaada-kaoaꞌa naa baꞌoran kaduz parada-karu kida idaꞌan. Atii dobata amazada uruu daunaꞌan, uruꞌu naa usaada-kao English idaꞌan. Atii kai, pabiꞌinaaka kidaꞌo parada-karu idaꞌanaꞌa naa usaada-kao.

Aizii diꞌi usaada-kao Wapichan paradan idaꞌanaꞌa naa.

Usaada-kao dono wuruꞌu Kaimanaꞌo Kuwai Wapichan paradan diꞌiti, pabiꞌinaakaꞌo Bible kaduz kaiwaa-kao. Kainaꞌaꞌo kapam pidannao aitapaꞌo Hebrew naꞌiki Greek paradan, ĩnao kaminkaꞌutaꞌo usaada-kao Wapichan paradan idaꞌan.

Aizii wuruꞌu Kaimanaꞌo Kuwai, saada-kariwaiz Wapichan idaꞌan, usaada-kao kaiꞌoraz Wapichannao paradauzon kaduz kawanaꞌatiꞌo, mashaꞌapannaa kizi pidan aitaanuz. Pabiꞌi kida puikodan nii English idaꞌanaꞌo parada-karu kida kaiwaa-kao. Ushaꞌapanum kauꞌan, kainaꞌa wadakotan pabiꞌi kida aimaakan English idaꞌan. Wuru kaduz kidaꞌa: bread, yeast, wine, bed, lamp, gold naꞌiki mile. Kainaꞌa kapam aimaakan kida aonaa waaitapan naꞌapam udakota-kao Wapichan idaꞌan, wuru kaduz kidaꞌa: harp, camel, synagogue, Pharisee, Sadducee, bear, dragon, grape, olive, naꞌiki sulfur. Uruu idiꞌo usaada-kao English dakotan kawan.

Aizii kaarita tokon itinapu, kainaꞌa Parada-karu Mashaꞌapannaada-kinao, kaminkaꞌutaꞌo nii pidan aitapan kaiwaa-kariwai dadaraꞌo parada-karu. Panaadon parada-karu baꞌoran kaduz pidannao kaiwauzonii, oo kotuaꞌo pidannao kaiwauzonii.

Aizii, puikodan dono parada-karu bracket [ ] nazoꞌaꞌo usaadinpan, ukainaabata-kao aonaa usaadinpan naꞌapa kotuꞌu kidaꞌo saada-kariwai idaꞌa. Mazan pabiꞌi kida baꞌoran kaarita idaꞌa, naꞌapa usaadinpan.

Waaitaan dono diꞌoraꞌa kaarita, Tominkaru Paradanuz, waaitapan nii Jesus Christ, uruu kakupaꞌo Tominkaru Paradan. Jesus kowaadan, Tominkaru kainaabatan nii waꞌati Kaimanaꞌo Doronaa idaꞌan naꞌapaꞌoram wuruꞌu saada-kariwaiz. Ukauꞌan ipai saadinpaꞌoraz Tominkaru Paradan diꞌoraꞌa kaarita idaꞌaꞌoraz, Tominkaru aipan kawanaꞌatiꞌo usaada-kao wuruꞌu. (Puawunuta 2 Timothy 3:16-17 idaꞌa.)

Aonaa baudaꞌapaꞌo choochi diꞌikiꞌo pidannao mani wuruꞌu saadaꞌoraz Kaimanaꞌo Kuwai Wapichan idaꞌan. Ukauꞌan aonaa baudaꞌapaꞌo choochi atiꞌo mani wuruꞌu usaada-kaoaz. Mazan usaada-kao ipai aitapainao Wapichan paradan atiꞌo, wamishida kizi Jesus Christ, uruu mishiꞌo Tominkaru dani. Wamishidan dono, wazaamatan nii karikaonanuꞌo kakupa-karu.