Itapiti teteitewa neꞌnetetiame
12
Simitekaonia, noꞌo kaawe nayewaniachio, kihta kaawekoi noꞌo waꞌapi kaawe nayewaniameo, itapiti Riosie noꞌo tetewiteretia kochirewachi, nayewamane. 2 Neeea kiꞌyamio, oosa mariki aampa naao paaumpari iꞌtoachiopa, ahkasi paika tiiachi tewekachi iꞌtotiamekania, noꞌo weerewama iꞌtotiameo ki naneꞌriamenia, ki noꞌo weerewama iꞌtotiameoi, puꞌkao apoeche Riosikamera naneꞌriamepua puꞌkao. 3 Nape pichiwa waꞌa iꞌtotiamenia, weerewamao ki weerewamaoi, ki naneꞌriamenia. Puꞌkao, Riosiche naneꞌrenapua. 4 Waꞌa noꞌo iꞌtotiachio, Riosi taamowichio kateweriachikapua, ki teesa peeniatiame tiiachi, waꞌao inamukane itapiti naawesari, nape puꞌka naawesario ki aaata chaninuretiane. 5 Neeea, puꞌka kochirewachi noꞌo tetewariao, kaawe nayewamania, noꞌoo ki aaatakoio, Riosio waꞌa ahpo tísia peeniatiwachi noꞌo iꞌtoriopua; nape neeea, ki noꞌo kochirewachio, noꞌo ki yeꞌkameche uuka nayewamania. 6 Nape noꞌo waꞌapi kaaweruma nayewakainia, ki aaata ki inatamechitia nayewame enemiinia, noꞌo nayewaopua pichiwakopa. Nape ki noꞌo weruma uuka nayewamenia, ki aaata noꞌo werumachitia tetewijerapa.7 Pukaepa neeea, ki weruma noꞌo uumichiopua, puꞌka noꞌo kochirewachi tetewitetiameo, Satanasi reesisetiamenia, itapiti ki kaawe yorapuaichiopua noꞌoo, weerewachio. 8 Neeea noꞌo Paamirao, paisa simiyame itaniame neeeapa, iꞌka noꞌo weerewachi aiwaka yasitoao, noꞌo puhjemichiopua, 9 nape Apoe Eesusia senepi noꞌo itanioio, chaachaniamepua: “Neeea amochio soparame teewiamenia aamo kuꞌimiao, kihta eerina teeremichiopua, aamo noochi tekipanao; waꞌa teekao amochi noꞌo tetewipuawichiopua, noꞌo teꞌta utewario, aꞌchitiaoi ki eerina teetoka simitiamekopua noꞌo tehkiwao.” 10 Waꞌa teetoame enesoo noꞌo Paamirao noochi, kaawe eꞌraka teetoamenia, yooma ihta aꞌchi tiame tesiwa ikiyaio, naatichitia, noꞌo naꞌara chaanewa, kaꞌchi ikime eraniame, yooma ihta aꞌchikoi yoraniame tísia aiwatekao, yooma ihta noꞌo tehki tiiame ikiwame. Yooma puꞌka aiwari noꞌo ikiyoiopua, teꞌta Apoe Paamira utewariraa, noochi enesiamepua kuꞌipasika.
Paoro ki Eesusie weratiameko chaachapawa
11 Neeea, ki inatameka chaaninia chiiao, nape eemepua ki noꞌo kaawe chaachapaka waꞌa noꞌo chanitiamepua. Nape neeea ki nooe noꞌo kaawe nayewametepua, eemekamera puuua, noꞌo kaawe nayewame teꞌteriamea. Noꞌoo kihtakoio, neeea ki epeche nuꞌutikaitenia puꞌka teꞌta ahpo Eesusie ajawatiamekoo, chaachapameo. 12 Neeea eepi naaniatiame inisikamenia noochio, noꞌoo pichiwa Riosie weratiamekoo, naati noꞌo iintoriachitiaopua: ki kuꞌitapisi noꞌo tekipanaka ihsia Eesusichio, amochiopua kaawe teꞌteremichiopua, Eesusie noꞌo kiasiwaopua, kokoriame yachapatesika ki maaenari peenia ihsiwa. 13 Wahjachi tiopachiamio Riosichi paparakamea, aapoe ahpo waꞌapi kaawe erakowachi noꞌo kuꞌikamepua, nape neeea aamoo, noꞌo kuꞌinarioio ki noꞌo kuꞌijerakamenia, ki amochi petenariapa itapiti noꞌo tesiwatia ki noꞌo iinuekao. Neeea ki noꞌo kuꞌijerariawichioo, noꞌo cheriwejeraninia. Neeea aamo tiopachi mochikameo, ki epeche wichipa tetewamenia aamoo, wahjachi tiꞌtiopachi mochikamechio.
14 Ehpe aamo tuuyamenia, noꞌoo waꞌa siimeri kahtiamekopua waꞌasi, amori yooma katewesa. Ihji noꞌo waꞌa simiyaa, paisa enemeripua waꞌasi, neeea ki peterenariapa amochio, ki uunariamenia noꞌo kuꞌiwao, nooekamera aamo kuꞌinariamepua, itapiti Riosichi simiyameeopua. Aaata tatanaraa, ki aapoekamera iꞌyamepua koꞌkometio, ahpo noonowichioo; noonorakamera ihsiamepua ahpo tatanawichioo, koꞌkometi iꞌyanekao. 15 Pukaepa neeea aamo noonochitiao, neeekamera resipanariamepua aamowichioo, ahkasioi mukiwachisio, kihta noꞌo kuꞌijerapao. Nape epeche noꞌo ihsioio aamowichioo, ¿epeche noꞌo nakiyame enetare eemea?
16 Nape aꞌchitioi noꞌo eranioipua, kihta kuꞌiwa petereka yasitokamenia amochio. ¡Naakonakosaoi, ki noꞌo nakiriopa aamo kuꞌiwao, noꞌo aamo wiskuiame maaena eemea? 17 Kaꞌíí, ki waꞌatepua. ¡Naakonakosa noꞌo uhjurariaa waꞌa, aamo wisikuaka itanekamepua itapitikosa? 18 Tiitooi piirechi ahjama noꞌo uhjurariaa, ¿wisikuekosa aamo itanekamepua kuꞌiwa?
19 ¿Taamo aamo wihkuekame maaenakosa eemea, neipa epeche weeka itanariapa? Kiisi waꞌa eꞌrame teemea. Yooma taamo nokariaopua, chaachapariaopua tiameo, yooma Apoe Riosi neꞌniachi ikitiamepua, teꞌta Riosie Weratiamechi, teꞌteriamechitia. Yooma taamo yoorariaa, aamokamera epeche aamo Riosichi utewarepamichio, noonowitiame puuua. 20 Nape seewenania waꞌa noꞌo eenoio, seenekachioi ki yoomahka kaawe teꞌtereniaopua, noꞌo aamo teꞌterejeriachitiaopua. Seewiame neeea aamoo, tísia noꞌo aamo yoojoramia amochi eenameko, erakomiao. Seenekachio eemea waꞌa erakomapua, weeka itapiti ahpo wenejiniame teꞌteriapa, iꞌkachitia: ahpo aamo nekamucheniame aaata itapiti epeche tiiopua waꞌachi teerenarewa, ahpo nekakoniame, ahpochiche inataniame, ki kaaweruma naewaniame aaatachio, ki kaawe iintorio tuuwame, ahpo weruma uuyame, waꞌa tiopachio ki Riosi nakiyachitia tahpitika nokiwame. 21 Seewenania tiame aamoo, puꞌka kiꞌyami oꞌinia kiisi kaawe aamo nokaka mochitoriao, ki yoomahka aamo katewetiame teimiaopua Riosichio. Waꞌa teꞌteriame aamo tewisaania, tísia suuwe aamo erapamania Riosichio, neeea tísia kaawe aamo nayewakamekapa noꞌo oiriachiamio. Soparame tehpe iinueme eemeapa aamo kaꞌkaruma enepamiaopua, yooma iinya aamo nokayaopua toaká, ki kaꞌkaruma pahkotaka nawajiwaopua, ihtaoi suwepori nokiwameoioopua tiamé.