IPURU
IPURU Yemboma Pepá Topa Sirimu Bokumu
1:1-10:18 I PEPÉA MO TOPA SIRIMU YEMONE MANE SIRIMU UNGUME
Kolomongo Awili 1-2 MULU KOLEANA ANGELLOMA MANIENDOPA, YESUSI OLANDOPAMONGA UNGUMU
1:1-3 Kinié Pulu Yemonga Malone Olio Pulu Yemonga Ungume Nimbe Silimo Ungu Te
1
Paa ou Pulu Yemone alieli olio Ipuru yembomanga anda-kolepalimendo ‘Nanga ungume piliengi!’ nimbe yunge ungumu pilku yando ningu siringi yemaa yuni ungu-umbu tondorumume pilkulie olionga anda-kolepalime ningu siringi. ‘Yemboma paa piliengi!’ nimbe lipe tapondorumu kinie kanu yemane ulu awisili liku ora siku teko ungu awisili ningu siringi. 2 Nalo pe kiniéb ‘Yunge Malone olio yunge ungume nimbe sindepili!’ nimbe Pulu Yemonec yu mana maniendo lipe mundorumu. Kanu kangomo Pulu Yemone ‘Nanga mélema kamu yu simbo, lipe nosipe molomba.’ nirimu kangomo. Kanu kangomo yu Pulu Yemone ou mulu ma mélema “Teambo!” nirimu mélema pali terimu yemola.d 3 ˻Enamo pa telemo mele aku-sipe˼ Malo pa telemo akumuni Pulu Yemonga pa tondolo-mundupe telemo pa telimu olio lipe ora silimo.e Pulu Yemo molemo mele Malo aku-sipe molemo. Malonga ungu tondolomone mélema pali kapola molemele. Yuni ‘olionga ulu-pulu-kerime omba manie pupili, olio yembo kalaro naa mololime molangi!’ nimbe kongono tepa pora sipelie ˻melema pali nokombando˼ mulú-koleana Ye Nomi Kingi Awili Olandopamonga ki umbukundu pupe molemo.f1:4-14 Pulu Yemonga Malo Paa Olandopa Molemo, Angelloma Maniendopa Molemele Akumunge Ungu Te
4 Aku terimu-neg yunge imbi lepa ‘Nanga Malo’ nirimu aku imbimu paa olandopa purumu, mulú-koleana angellomando imbi lepa ‘Pulu Yemonga kongono tendeli yema’ nirimu aku imbimu paa manie, aku-sipe mele yu yuyu paa olandopa angelloma maniendopa. 5 Pulu Yemone nimbendo:
“Nu nanga Malo. Kinié na nunge Lanie.”h
nirimu mele angello tendo walse aku-sipe nirimuye? ˻Molo. Yunge Malondo mindi aku-sipe nirimu.˼
Molo yuni nimbendo:
“Na yunge Lapa molombo,
yu nanga Malo molomba.”i
nirimu akumu angello tendo nirimuye? ˻Mólola. Malondo mindi aku-sipe nirimu.˼ 6 Yundu ungu te pea nirimula. Yunge kango komolayemoj mana lipe maniendo mundupelie Pulu Yemone yunge angellomando nimbendo:
“Kangomo popo toko kapi ningu
yunge imbi liku ola mundundee.”k
nirimu. Aku ungume pilipulie ‘Malo olandopa angelloma maniendopa.’ nimbu pilimolo. 7 Angellomando Pulu Yemone nimbendo:
“Yunge angelloma poporomema mele molko,
yunge kongono tendeli yema
tepe mele molangi!”l
“Pulu Yemo, nu alieli ye-nomi-kingimu
moleno mele molko mindi puni.m
Nuni ulu sumbi nilime teko yemboma nokoni.
9 Nuni ulu pulu sumbi nilime manjiku
konopu siku teleno.
Ulu-pulu-kerime konopu naa mondoko
paa naa teleno, akumunge
nunge Pulu Yemone ‘Nu ye-nomi-kingi molko
mélema pali nokani.’ nimbe mako topalie
nunge pulu lemo yembomanga pali
namba paa olandopamo nu sirimu.
Nu aku-sipe tepa kondorumumunge
nu kinie nunge pulu lemo yemboma kinie
konopu singe.”
nirimu.n
10 Pulu Yemone ˻Malondo˼ ungu te pea nimbendo:
“Awilimu,o ou-pulu-pulu nuni mamo teko,
nunge kimuni nunu mulumu teko mimi terinu.
11 Aku meleselo pora nimbé, nalo
nu alieli molko mindi pulino.
Mulumbalema pingi pupe sungu nimbe keri lemo mele
mulu maselo aku temba.
12 Yembomane wale pakoli sulume
toko ltengendo kimbulimele mele
nuni mulu maselo aku-siku kimboni;
mulumbale te lupe panjingendo alowa telemele mele
nuni aku-siku aku meleselo alowa teni.
Nalo nu nunu aku-siku alowa naa teko,
moleno mele alieli molko,p
anda naa leko, alieli molko mindi puni.”q
“‘Nunge opa puluema nuni nokani.’ nimbu
pe eno topo manie mundundumbo kene
isili-ou nu ˻na kinie pea
tapu topolo ye nomiselo molopolo
mélema nokambili˼
nanga ki umbukundu ongo molani!”r
nirimu aku ungumu angellomando nirimuye? 14 ˻Aku ungumu angellomando naa nirimu liemo˼ angelloma nameleye? Angelloma mini mele molko Pulu Yemonga kongono tendeli yema. Kanume Pulu Yemone lipe tapondopa, mindili nolemela aulkena wendo lipe, yu-kinie pea molko kondonge aulkena lipe mondolemos ulu pulumu linge yemboma ‘Liku tapondoko nokangi paa!’ nimbe lipe mundulimo yema.