Pe-Timoti 4

4:1-5 Pollone Timotindu “Nu Pulu Yemonga Ungume Paa Yemboma Mane Si!” Nirimu Ungu Te

˻Timoti,˼ Pulu Yemo kinie Kirasi Yesusiselone yembo kondema kinie kololime kinie enonga kote pilingele yeselo kanoko molangili Kirasi Yesusi omba mona molopa ye-nomi-kingi molopa mélema nokombamonga^a nane nundu i-sipu tondolo-mundupu nikiru:

2 ˻Kirasinge˼ ungume yemboma ningu sieni.

Ningu sini kinie yemboma ungu pilinge kinie

molo naa pilinge kinie kepe alieli

ungume ningu siku munduku siye naa kolko,

‘Enonga ulu telemelema ‘Tepo kenjilimolo.’ ningu pilku

konopu alowa teangi!’ ningu mane siku,

ulu-pulu-keri telemelema naa teangi iri toko mane siku,

‘Eno Pulu Yemone kanopa peanga kanolemo ulume teko

konopu tondolo pupili molangi!’ ningu mane sieni.

Eno mane sinindu alieli andiki teko taka liku

mimi-siku mane sieni. 3 Yemboma ungu sikema ‘Naapilimolo.’ ningu bulu siku komu pipi sikulie ningemone, eno langi mele waka kolemele ungu konopu siku pilinge ungume mane singe ye awisili mako tonge walemo pe wendo ombá kene ˻ungu sikema munduku siye naa kolko mane siku kondani˼. 4 Eno ungu sikemo bulu siku, kolo toko kange temane lupe lupe tongema mindi komu tendeko pilku molonge kene ˻ungu sikema munduku siye naa kolko mane siku kondani˼. 5 Nalo nu, alieli umbu konopu pepili ungume mimi-siku apuruku kondoko pilkulie, mindili te noni molo umbune te nu-kinie wendo omu liemo aku umbunema we mengo, ‘Yemboma temane peangamo paa pilku liku konopu alowa teangi!’ ningu toko siliku andoko, Pulu Yemone ‘Nu nanga kendemande yemo molani!’ nimbe kongono sirimume pali teani.

4:6-8 Pollone Yu Nondopa Kolomba Terimumunge

6 ˻Na nondopa wendo ombá mele pilipulie nu aku-siku teani nikiru.˼ Na, ou ˻Isirele˼ yembomane Pulu Yemo popo toko kongi mélema kaloringi polomonga pulune Pulu Yemo popo toko no-waene ondoko munduku yu siringi mele^b kinié na kolombondo nanga kangimu Pulu Yemo popo topo simbo tekero. Na ma koleamo mundupu siye kolopo pumbo walemo nondopa wendo ombá tekemo.^c 7 ˻‘Mele peangama liembo!’ nimbu˼ na tondolo-mundupu kere-kuru lipu lkiserindu.^d ‘Lkisiku pangi!’ ningu ówe toringine kamu pupu pora sikiru. ˻Kirasinge˼ ungume mundupu siye naa kolopo tondolo-mundupu pilipu lkiserindu. 8 Aku-sipu tepo molorundumunge kinié ˻ulu telu mindi we pelemo.˼ Owena kamu okoromonga na mele kalomba mele peangamo nosipe molemo,^e kanu mele peangamo Awilimu, kote sumbi-sipe pilimo yemone nando “Nu ye sumbi nilimu.” nimbé kanumu.^f Na mindi mólola. Yuni ˻yembomanga kote pilipe apurumbe˼ walemonga na kinie yu ombá mele ‘Paa kanamboa.’ ningu nokoko molemele yemboma kinie pea kanu mele peangamo simbe. Yunge Kongonomo Pora Nimbé Terimumunge Ungu Te

4:9-22 Pollone Timotindu Ungu Ponjili Mare Nirimu Ungume

4:9-13,21 Pollone Timotindu “Na Moliona Welea Ou.” Nirimu Ungumu

9-11 Dimasini ^g na mundupe siye kolopa purumu yemo yu mana ulume olandopa konopu mondopalie ulke kolea Tesallonaikando purumu. Ye Keresenje kolea Gallesia poropinji pupe, Taitasi* kolea Dallemesia disiriki^h purumu. LLuku* mindi ya na kinie pea molembolo kene nu na moliona aulke te paa korokolie welea nondoko wani. Makone* na kongono manda lipe tapondopa temba kene yu opili liku mengo pea wangili. 12 ˻Andi nu˼ ulke kolea Epesasi ˻molenona˼ Tikikasiⁱ “pu.” nimbu lipu mundorundu. 13 Oni kinie aulkena ongo ulke kolea Toroasi^j ongolie, ali wale pakoli kinie boku mare kinie kongimenga kiluni teli bokume kepe, Kapasinge ulkena noserindu lemo akume liku mengo wani. Kongimenga kiluni teli boku ˻paa peanga, kou awili tepa puli˼ me paa naa komu sindiku paa liku mengo wani.

4:14-18 Pollo Molopa Kenjerimu Kinie Pulu Yemone Yu Lipe Tapondopa Tondoloma Sirimu Ungu Te

14 Allekisanda,^k kou kapane mélema tepa mimi teli yemo, yuni na paa tepa kenjerimu. Yuni ˻na kinie˼ tepa kenjerimumunge Awilimuni yu pundu tomba. 15 Yuni olionga ungu nilimoloma paa konopu naa mondopa aku ungume kinie opa pulue molopa ‘Manie pupili.’ nirimu kene ˻nu aku-sipe tepa kenjimbe kene˼ yu mimi-siku kanoko molou!

16 Nanga kotemo pulu polko pilieringi kinie yembo tene na kote terindu mele naa lipe tapondorumu. Enone pali na munduku siye koloringi. Pulu Yemone kanu yemane teko kenjeringimunge pundu naa topa siye kolopili! 17 ˻Yema na munduku siye koloringi˼ nalo Awilimu na kinie tapu topa kotena angilipe na engemo sirimumunge kote koleana Juda-yembo naa molko yembo lupema moloringi yemboma^l na temane peangamo topo sirindu kinie kapola pilieringi. Na kotena enge naa silkenje ‘Lopa posi llayonomane na toko nangi!’ nilimela^m nalo Awilimuni ‘Na naa kolambo.’ nimbe lipe tapondorumu-ne ˻ya ka ulkena˼ we molio. 18 ‘Yu mindili nopili, tepo kenjemili.’ ninge walemanga pali Awilimuniⁿ na lipe tapondopa wendo lipelie nimbemone, yu ye-nomi-kingimu molopa nokolemo^o mulú-koleana ‘Na kapola opili kene ou mana molopa kondopili!’ nimbé. Alieli yu kapi nimbu imbi lipu ola mundundulipu mindi pamili! Aku-sipe paa sike tepili!

4:19-22 Pep mo Topa Pora Simbendo Pollone Kamu Nirimu Ungume

19 Ambo Pirisilla kinie yunge menu Akuwillaselo^p kinie, Onesiporasi^q yunge yemboma kinie, “Pollone “Eno manda molemeleye?” nikimu.” nindeni.

20 Ye Erasitasi^r ulke kolea Korini we molemo. Toropimasi^s kuru torumu-ne ulke kolea Maillitasi molopili mundupu siye kolopo orundu.

21 ‘Kolea ali telemo walema ou wendo naa opili na moliona wambo.’ ningu aulke te tondolo-munduku korokolie wani.

Yupullasi kinie Punenje kinie LLainasi kinie^t ˻ambo˼ Kollodia kinie ˻olionga˼ angenupilime ˻Kirasinge˼ yembomane pali “Nu manda molenoye?” nikimili.

22 Awilimu nunge minimu kinie molopili molani!

Yuni eno we kondo kolopa molopili molangi!

˻Aku pea nikiru.˼