Pe-Korini 9

1-2 Eno Korini yembomane tondolo-munduku ‘˻Judia-Disiriki yemboma˼ paa lipu tapondamiliya!’ ningu molemele mele piliola. Liku tapondongendo teko molemele mele ˻Kirasinge yembo˼ kolea Masedonia poropinji molemele yemboma konopu sipu temane topo sipu ˻eno Korini yemboma˼ kapi nimbulie nirindumuni, kolea Akaya poropinji lemo ˻kolea-awili Korini˼ yembomane ou poniemonga kinie yandopa kepe ‘Lipu tapondopo mélema siemili.’ ningu nokoko moloringi mele Masedonia yembomando nimbu sirindu kinie pilkulie ‘Korini yembomane telemele mele manda manjipu teamili!’ ningu eno awisilini mélema singe ulume telemelela, akumunge, Pulu Yemonga yembo konopu kake teli ˻kolea Judia-Disiriki molemelema koleamanga pali Kirasinge yembomane˼ liku tapondoko we singe kou-monema liku máku toko molemele ˻mele eno Korini yemboma pilimele˼ monga eno ungu ˻awisili˼ pepána naa topo simbo kinie mandala. 3-4 Nalo na ombó kinie Masedonia poropinji ye mare pea omulu liemo eno ˻Korini yemboma˼ ne kou-mone singema kamu naa liku máku tongi liemo nane kapi nimbu enone telemele mele yemboma temane topo sirindu mele pilipulie paa pipili kolombo. Eno ˻Korini yemboma˼ kepe pipili kolonge.^a Akumunge pilipulie, ‘na eno molongena ombó kinie yemboma kapi nimbu temane topo sirindu mele paa sike aku-siku teangi! Yembomane ‘Pollone kolo torumu. ˻Yuni Korini yemboma we kapi nirimu.˼’ ningu naa piliengi! ˻Kou mone limbo ombóma sike liku máku toko pora siengi!’ nimbu olionga˼ angenu ye ˻yepoko˼ kanume eno molemelena lipu mundukuru. 5 ˻‘Na kinie eno Korini yemboma kinie olio pipili naa kolamili!’˼ nimbu ˻olionga˼ angenu ˻ye yepoko˼ ndo tondolo-mundupulie nimbondo: “Na ou naa pambo eno kumbi leko puku, Korini yemboma liku tapondoko, singe kou-mone liku máku tolemelema kamu liku máku toko nosiku molangi wambo kene eno molemelena liku tapondangi kumbi leko pangi!” nimbu lipu mundukuru. Pe “Simolo.” ningu panjeringi mele kamu liku máku tokolie na nokoko molangi ombó kinie pilkulie konopu pe nipili yemboma liku tapondonge kou-mone awisili na toya toko singe. ˻Kamu naa nosiku nokoko molangi ondu liemo ‘Pollone olio kou takisi tomoloma omba likimu. Olionga mélema oliolio we nosipu kolea Judia-Disiriki yemboma naa silimelanje papu.’ ningu˼ konopu keri panjiku singe kinie kapola naa temba. Aku-sipu nimbu pilipulie na ou naa wambo olionga ye angenupili pokondo “Eno liku tapondangi paa!” nimbu lipu mundukuru.

Kolomongo Awili 9 Pollone Korini Yembomando “Kirasinge Yembo Kolea Judia Disiriki Molemelema Engelene Paa Kolemele Kene Liku Tapondoko Mele Mare We Siengi!” Nirimu Ungu Te^b

9:6-15 Poniena Langi Umbu Awisili Mundulimolo Kinie Langi Awisili Yando Lipu Nosilimolola, Akumunge Ungu Pulu Te (Kolomongo awili 8-9 palimunge ungu te.)

6 ˻‘Kou mone toya toko siengi!’ nimbu˼ nikirumunge ungu-pulumu niembo piliengi! Yembo te langi koltalo umbu tolemomone langi koltalo lipe nolemo; langi awisili umbu tolemo yembomone awisili lipe nolemo.^c 7 Yembomane yemboma liku tapondoko mélema konopu siku sumbi-siku silimele akume Pulu Yemone kanopa konopu mondolemo kene^d eno yemboma yu-mele-mele konopuni pilkulie ‘Kou mone i-sipu yemboma lipu tapondopo siemili.’ ningu pilkulie siengi! Konopu keri panjiku naa siengi! ‘Naa silimela nalo yembomane “Siee!” ningu tondolo-munduku mawa tekemelemonga sikimulu.’ ningulie singe kinie kapola naa latemba. 8 Pulu Yemone eno mele paa awisili manda simbe nosiku kapola tendenge, alieli ˻konopu pe nimbé ulume kinie, kongono tenge ulume kinie, mélema˼ molo tombama pali manda sipe kapola tendemba kene ˻konopu kimbu naa siku yemboma liku tapondoko mélema siengi!˼ ‘Enone liku tapondoli ulu peangama pali kapola tendangi!’ nimbe aku temba. 9 Aku ulumunge ungu te Pulu Yemonga bokune molemo, akumu i-sipe:

‘˻Yembo tene poniemanga langi awisili

umbu tolemo mele yembo peanga tene˼

yembo koropama lipe tapondopa

mele awisili andopa moke tepa silimo;

pe aku-sipe kondo kolopa

tepa kondolemo ulu peangama^e

alieli pepa mindi pumbe,

˻Pulu Yemo pilipe molomba˼.’^f

nilimo kanumu.

10 ‘Langi umbu tolemo yemone langi umbu topili!’ nimbe umbume silimo ˻Pulu Ye˼ mo, yuni we yemboma ‘langi lupe lupema nangi!’ nimbe silimo Pulu Yemola, yuni ‘Enone yemboma liku tapondangi!’ nimbe mele paa awisili simbe. Enone kondo kolopa tepa kondoli ulu peangama tenge kinie ‘Olandopa olandopa teangi!’ nimbe lipe tapondopa mélema simbe. Yembo langi umbu tolemo kinie langi awisili tolemo mele eno kinie aku-sipe wendo ombá.^g 11 ‘Alieli, yemboma mélema molo tomba kinie enone kanu yemboma liku tapondoko mele awisili toya toko siengi!’ nimbe ˻Pulu Yemone˼ eno mele awisili simbe kinie enone enonga angenali mele awisili manda singe. Kanu-kinie olione ˻Kirasinge Judia-Disiriki yemboma˼ lipu tapondopo, eno ˻Korini yembomane˼ mele awisili toya toko singema lipu membo pupu simolo kinie aku-siku angenali liku tapondongemonga angenalini Pulu Yemo kinie “Ange.” ninge.

12 Enone aku-siku Pulu Yemonga yemboma liku tapondoko mélema singe ulumu tengemonga ulu talo wendo ombá. Aku tenge kinie yembo mele molo tolemoma molo naa topa kapola temba. Nalo aku mindi mólo! Aku tengemonga yembo awisilini ˻Pulu Yemo kinie˼ “Ange.” ningu yu kapi ningela. 13 Eno ˻Korini yembomane˼ ˻Judia-Disiriki˼ yemboma ˻aku-siku˼ liku tapondoko mélema singemonga kanokolie ˻we˼ yembomane eno sike Kirasinge yemboma molko, yunge temane peangamo sike pilku likulie yunge ungume pilku liku tenge panjiku tenge mele kepe, enonga mélemanga awisili Judia yemboma kinie yembo lupe lupema pali kinie toya toko liku tapondoko moke teko singe mele kepe, mona lemba kanokolie Pulu Yemo kapi ningu imbi liku ola mundundunge. 14 Akumu kanokolie ningemone, Pulu Yemone eno ˻Korini yemboma˼ we kondo kolemo mele akumu paa olandopa we kondo kolemo mele kanokolie Pulu Yemo kinie ungu ninge kinie eno paa konopu mondoko Pulu Yemo enonga mawa tendenge. 15 Pulu Yemone mele paa peanga olandopa we sirimu akumu^h olione yemboma nimbu simolondo perelemolo akumu Pulu Yemo kinie paa awili tepo “Ange.” nikimulu.