\id 1TI - Shipibo NT with OT portions [shp] -Peru 2011 2nd ed. \h 1 TIMOTEO \toc1 1 TIMOTEO \toc2 1 Ti. \mt1 1 TIMOTEO \mt2 Peokin Pablon Timoteoki kirika bomaa \c 1 \s Jato saludana \p \v 1 Ea Pablora Jesucriston raana joni iki, noa jaon manata Cristo Jesús betan Diossen jaskara shinanna iketianra, \p \v 2 nato kirika wishaxon en mia bomai Timoteo, en Cristo ikonhamaa ikax, kikin nokon bakebi keská mia iketian, ja non Papa Dios betan non Ibo Cristo Jesussen, jawen icha noimisti shinan mia menibanon, mia jatíbinin akinbanon, itan jawen jakon shinanribi mia menibanon. \s Ja ikoma joi yoiaiboki koiranmeekanti yoia \p \v 3 Ja Macedonia main kakin en mia yoiantana keskati, Efesoain banéwe, jainxon ja ikon joi keskámaakin jato onanmai jain itina jawetii jonibo jato amayamawe, \p \v 4 ja jatonbi shinanxon yoikanai ikoma jawékibo, jainxon ja jaton rekenbo winókani jawéki yoikin jeneyamaibo, moa jato ninkáxonyamakanon. Neskara jawékibo yoiira iikax moa joinres ianankanai, jatianra ja Dioski koshixon non jawen tee atibo noa akinyamai. \p \v 5 Enra mia neskáakin yoiai, ja non jointi jakonshaman ikax jakonma aká shinan meran yamaax, itan akonkin Dios ikonhatonin imaa, wetsabo betanribi noiananax jakana iti kopí. \p \v 6 Jatíribi joi akaibora neskara joibo jeneax wetsaoritax, moa iresbiresa joibores yoii join ianananreskanai. \p \v 7 Diossen esé kikinhakin jato onanmaishamantonra shinanmeekanai, jabaon jato onanmai jawékibobi onanaxmabi. \p \v 8 Jawetianki atikeskabiakin ja esé jato onanmakanai, jatianparira ja esé jakon iki ixon non onanke. \p \v 9 Jainxon non onanribike, westíora Diossen esébira jakoni jaa jonibaonama iki ixon. Ja esé riki jakonma jonibo axona, yoitima jonibo axona, jakonmamisbo axona, ocha akí jakanabo jato axona, jainoax ja Dioski shirokin jakiakinbobi shinanyamaiboribi axona, jaton papa, itan jaton titabi reteaiboribi axona, retemis jonibo axona, \p \v 10 wetsabo betanbires yoranti akaibo axona, benboxbi ikaibo axona, jonin yometsoaibo axona, jansobo axona, jainoax ja ikon keskati yoyo ikai ikaxbi paranmisbo axona, onantiakin yoia ja ikon esé ikonhayamai jonibo jato axona, \p \v 11 Neskarara akai ja jan raroti jakon join noa onanmakin, ja jato yoitira jakon shinanya Diossen ea imaa iki. \s Pablon Dios iráke aka \p \v 12 Ea jan koshi shinan menia kopíra, en non Ibo Jesucristo iráke akai, janra ea oinna iki en jawéki senenhakaibo, jaskara oinxonra jawen tee akai ea imaa iki. \p \v 13 Moabo ea jaki jakonmaibo yoyo ikatiainbi, masábo tenemanoxon en benaa ikenbi, itan en ichatabo ikenbi. Jaskara ikenbira Diossen jawen akinmisti shinanman ea akinna iki, já ikonhaama ixon en akai jawékibo en onanyamaa iketian. \p \v 14 Jaskáaxonra Diossen jawen icha jakon shinan ea menia iki, jainxon Cristo kopíresibi, jaki koshimataanan jawen noimisti shinan ea menia iki. \p \v 15 Ja Cristo Jesús ochaya jonibo jato kishpinmai nato neten joá, jatian ea riki ja reken kishpinmeeta akin en jato yoiai joibora, kikin ikonhira iki, jaskara ikenra jatíxonbi ikonhakanti jake. \p \v 16 Jaskara ikenbira ea Diossen akinna iki, ja Jesucristo kikinbires manátia emerameax jishtiti kopí. Jaskataxa ja jatíbitian jati neteya inoxon Cristo ikonhai wetsa jonibaon oinkanairibi ea iká iki. \p \v 17 Ja jatíbitian jaa Apo kikin joni iketian, rabikin jeneyamanon akanwe, ja mawáyosma, jishtima, itan jabicho Dios jaskarashaman ibanon. \p \v 18 Timoteo, ikonkon nokon bakebi keská iketianra en mia yoiai, ja Diossen amaa jawen janenko mia yoikani joibokaya shinanwe, jaskataxa kikin reteananti onan sontáro keská mia itiki. \p \v 19 Ja min ikonhaaki koshii jenéyamawe, jakonma aká shinan meran yama iwé; jaskáakin ja jato meran iká shinanman yoiai keskati iamaxonra, jatíribibaon Dios ikonhakin jenekana iki. \p \v 20 Jaskarara winókanke, Himeneo betan Alejandro, jakopira moa *Satanássen jawen keena keská anon ixon en jato jenea iki, Dioski jakonmaibo yoyo itima onankanti kopí. \c 2 \s Jatíbi joniboki oranti \p \v 1 Japari maton ati en yoiai riki, ja maton shinanabo oracion meran Dios yoiananbi maton yokákin jeneyamanon ixon, itan jatíbi jonibo kopíribi maton Dios iráke anon ixon. \p \v 2 Matonra oranti jake apoboki, jainoax jatíbi joni koshibokiribi, jaskatax jakonshaman itan xabáshaman noa jakanti kopí, jainoax noibamisti shinanyabo, itan jaon ratékanai jonibo noa ikanti kopí. \p \v 3 Neskáakin non orantikayara jakon iki, itan ja noa kishpinmai Diossen keenshaman iki. \p \v 4 Jara keenai, jatíbi jonibo kishpinmeetaanan ja ikon joiribi onankantin. \p \v 5 Jarake westíora Diosbicho, jainoax jan jato Dios betan jonibo jakon imai westíora jonibichoribi, ja iki Jesucristo. \p \v 6 Jara jatíbi jonibo kishpinmanox mawata iki, jaskara joira jato onanmati nete nokóketianbiribi, jato onanmaa iki. \p \v 7 Jakopira Criston jawen joi yoiai iti ea janea iki. Jaskáaxon ja judíomaboribi, ja ikon joi onanax, Dioski koshikanon ixon jato onanmati, eara jansoyamai ikonra en mato yoiai. \p \v 8 Jaskara iken ea keenai riki, jatíbiainoa joi akai jonibaon jaton siná shinan, itan jaton join ianananti shinanbo jenetaanan, jakonma shinanhomaxon meken chankaanan orankantin. \p \v 9 Jainoax ea keenribiai riki, ja joi akai ainbobo jakonshamanires benxokaati, senenshamanres shinanmeeti, shinan meran kikini koiranmeetanan raokaakanti, jainxon bebonhiraribi meskóakinbo jaton boobo akantima iki, jainoax ja oro akana jawékibaonribi, ja perla akanabaon, iamax kopí chopairabo saweti shinanyaresboribi ikantima iki. \p \v 10 Jaskáyamakinkaya jakon jawékibo atires shinankanwe, ja Dioski menikaata ainbobo ixon. \p \v 11 Jato joi yoikanaitianra, ja joi ninkáxonkin netéshamanxonres jato ainbobaon ninkáxonti jake. \p \v 12 Ja Dios rabii tsinkítiainxon ainbaon jato joi yoitininra ea keenyamai, jainxon ainbaonra jawen keena keskáakinbores netémataanan benbo ati yamake, jara netéresti jake. \p \v 13 Diossenra rekenpari Adán jonia iki, jainxonparira Eva aká iki. \p \v 14 Jatian Adánra ayamaa iki *Satanássen parankin, ja ainbora aká iki parankin, jatian jaskáakin paranara ainbo ochaa iki. \p \v 15 Ikaxbi ainbora kishpinmenoxiki tita ixon jakonhakin jawen bakebo aniax, Cristoki koshii jenéyamaax jakoni jataanan, wetsaboribi jato noitaanan, jainoax jakonma jawékibo akin jenetaanan, jakon jawékibores akí jataananribi. \c 3 \s Joi akai ikinaibo, jaskara ikanti \p \v 1 Neskara jawéki riki kikin ikon, jaweratoki ja joi akaibo ikinai koshi iti shinanya iki, jara ikonkon jakon tee ati shinanya iki. \p \v 2 Jaskara kopíra ja jato ikinai koshi jikia joni iti jake, tsonbi jawe jakonmaninbi yointi yamaa, westíora awinyabicho, jainoax jatíbi jawékiain shinan meran koiranmeetai, kikinhakin shinanxon jawéki akai, jatíbi jawen ikainkobo jakoni jaa, jaiba nokotaibo jato jakonhaxon biai, jakonhakin jato Diossen joi axeati onan joni, \p \v 3 moa paeni jeneta, ishtonbires sináxon jato jakonmaakai jonima, siná joniribi iti yamake, koríkiakinres shinannairibi itima iki, noimis itan jakon shinanya jonikaya iti jake. \p \v 4 Jainoax jawen xobon ikábo, jakonhaxon jato ikinti onanribi iti jake, jatian jawen bakeboribi iti jake, jato jakonhakin esea ikax, jakoni jaax yoitibo, \p \v 5 jaskáakin jawen xobomeabopari jakonhakin jato akinti atipanyamaxonra, jawekeskaxonbi ja joi akaiboribi jato akinti atipanyamake. \p \v 6 Jatian jato ikinai koshiribira, Cristo ikonhaa benáshokoira itima iki, jaskaranix rabítaanan, ja *Satanás iní keskatiribi ramitax jakonmain katires inaketian. \p \v 7 Jainoax ja joi ayamai jonibaonribi, jakonhakin oinkanai joni iti jake, jaskati jato bebon rabintibo winotax, *Satanássen jakonma axonainko pakénaketian. \s Diáconobo jaskara iti \p \v 8 Jaskaribiira ja *diáconobo ikanti jake, jakonhakin oinkanai jonibo, moa paeni jenetaboribi, jawéki ati yoixon, paranyamakin jato senenhaxonaibo, jakonmanin koríki biti shinannaimaboribi, \p \v 9 jainoax ja Diossenbi noa onanmaa, non ikonhaa ikon joikiribi kikini koshia iti jake, itan jakonma aká jaton shinan meran yamaribi jakanti jake. \p \v 10 *Diáconobo janeamatianbira rekenpari maton jato tanapariti jake, jainxonparira jabaon jakonma akaibo yamaketian maton jato imati atipanke. \p \v 11 Jaskáribiira ja *diáconobaon awinbo ikanti jake, jakon ninkakaataibo, joi keshamabo, jaton shinan meran kikini koiranmeetaiboribi, jainoax jatíbi jawéki atinkobo senenhakaiboribi. \p \v 12 Westíora *diáconora iti jake, westíora awinyabicho, jainoax jawen awin betanbi jawen bakebo kikinhakin jato akinti onanribi. \p \v 13 Ja jakonhakin tee akai *diáconobora, atixonbi jakonhakanai iti jake. Jatiankayara ja Cristo ikonhaa ikax jaton shinan meran xabáshamanbo ikanti iki. \s Ja ikon joi non onanna \p \v 14 Ishtontani mia oinni katira en shinannai, ikaxbira nato kirika wishaxon en mia bomai, \p \v 15 Ea ishton kayamai basiaitian, jawekeskatiki Diossen jonibo xaran ikax mia iti iki ixon min onanti kopí, ja iki ja jiria Diossen joi akaibo. Ja joi akaibo riki, ja ikon joi onanax ja koirani jaon paranan ikaibo. \p \v 16 Ikon riki ja non onanyamaa iká ikon joi ikonhaxon non chibanai, kikin ani jawéki. \q Cristora nato neten joni keska joá iki. \q Diossen Shinanmanra noa onanmaa iki. \q Ángelbaonra oinkana iki. \q Jatíbiainra jawen joi ninkakaata iki. \q Ja joi ninkáxonra jonibaon ikonhakana iki, \q itan Diossenra naikanxon jakonhakin bia iki. \c 4 \s Ja ikoma esébo \p \v 1 Ikaxbi Diossen shinanmanra onantibiresakin noa onanmai, moa netebo senenaitianra, moa Dios ikonhakin jenenoxikanai ixon. Ja janso joi yoikanaibo ikonhakin, jainxon *Satanássen jonibo meranxon jato onanmai eséboribi ninkáxon jan yoiai keskáakinbo axonoxikanai. \p \v 2 Ja beparanmeetaibo itan paranmisbaon joiboribira ninkáxon, jato senenhaxonoxikanai, jaskara jonibora jaton shinan meran moa jawebi rabinyamakanai. \p \v 3 Jaskara jonibaonra wanotima, itan benotimabo jato yoinoxikanai, jainxon piti jawékiboribi atimabo jato yoinoxikanai. Moa Dios ikonhaabo ixon, ja ikon joi onantaanan jan jonia iketian, iráke axon non jawékiatibo ikenbi. \p \v 4 Jatíbi ja Diossen jonia jawékiatibo riki jakon, jaskáakinra jawe jawékibi rotoyamakin, Dios iráke ataanan non jawékiati iki. \p \v 5 Ja Diossen join itan ja non oranatonra ja non piai jawékibo moa jakon imai. \s Jesucriston jakon yonoti \p \v 6 Neskara jawékibo ja non wetsabo jato onanmaaxa, Cristo Jesussen jakon yonoti mia itiki. Miara iti iki ja min ikonhaa jakon joi, itan ja min chibanai jakon esé kikinhakin onanna. \p \v 7 Ikaxbi ja jatonbi shinanxon yoikanai ikoma jawékibo, jainoax ja iresbiresi yoyo ikanai joibo jato ninkáxonyamawe, Diossen jakon jawékibores akai joni itiakinkaya shinanwe. \p \v 8 Ja non yora jakon iti kopí non ejercicio akaira jakon iki, ikaxbi ja Diossen jakon jawékibores akai noa itikayara bebon jakon iki, janra nato neten japariketian noa akinnai, jainoax ja naikan noa jaai kaai kamanribi. \p \v 9 Neskara en yoiai joira kikin ikon iki, jaskara kopíra jatíxonbi ikonhakanti jake. \p \v 10 Jaskara kopíribira, ja jiria Dios manaananbi ikonbiresi onitsapiananbi noa kikini teetai, ja iki jatíbi jonibo jato kishpinmai, ja ikonhaax jaki koshiaiboresa jato imai. \p \v 11 Neskara joibo jato yoiwe, ja join yoiai keskati jakanon ixon. \p \v 12 Tsonbi omiskanti bakeranon iamawe, jaskáyamaikaya jatíribi joi akaibaon, mia jakon ikaitian oinxon mawakantikaya iwé, mia jaskati jaa ikain, mia yoyo ikainko, min jato noiainko, ja Cristo ikonhaax mia jaki koshii jenéyamainko, itan ja min ikábo jakoni ikainko. \p \v 13 Ea jain kaai kaman ja non wetsabo tsinkixon jato Diossen joi yoyo axonkin jeneyamawe, jainxon ja joi jato onanmataanan ja non wetsabo bebonhakin jato shinan koshimawe. \p \v 14 Mia jaskara iti yoikatikanai keskáakin, ja *ancianobaon jaton mekenman mia mamepaskanontian, ja Diossen mia onan shinan meniatoninres, jakoni teewe. \p \v 15 Neskara teeya mia imakana kikinhakin shinanxon, jabiribishaman jeneyamakin awé, jaskáaxon jonibaon jatíxonbi mia beboni jakonai oinkanti kopí. \p \v 16 Minbixbi koiranmeewe, itan ja wetsabo min jato onanmainkoribi koiranmeewe, jatíbiain bebonhakin shinanwe, jaskataxa mia itan ja min joi yoiaitian mia ninkáxonaiboribi kishpinmeekanti iki. \c 5 \s Wetsa joi akaibo betan jaskati itibo \p \v 1 Ja yosi joi akai joni koshi join notsinyamawe, min papabi akai keskáakin shinantaanankaya esewe, jatian ja bakeranonbo kikin min wetsabo akai keskáakin jato ikinwe. \p \v 2 Jatian ja yoxan joi akai ainbobo, min titabi akai keskáakin jato esewe, jatian ja xontakobo min kikin poibo akai keskáakin jato ikinwe, jawe jakonmabi ati shinanyamakin. \p \v 3 Ja benomaatabo ikax jan jato akinti rareboomabo jato akinwe. \p \v 4 Ikaxbi westíora benomaaya ainbo jawen bakebo, iamax jawen bababo jaxonra, jabaonparikaya jaton rarebobo akinkanti jake. Bake iketian koiranxon jan jato akinkatitai keskáribiakin, neskarara jakon iki itan Dios keenai keskáshamanribi iki. \p \v 5 Ja ikon jabicho baneta benomaayatonra, Dioskires manátaanan yaméyabi neten oracion meran yokákin jeneyamai. \p \v 6 Ikaxbi jan jawen shinan raromatibores akai benomaaya ainbora, jiriapari ikaxbi mawata keská iki. \p \v 7 Jaskara kopí neskatiboribi ikanti jato yoiwe, jaskatax tsonbi jan jato yoinkanti jawe jakonmabi yama ikanti kopí. \p \v 8 Jaweratonki ja wetsabo, itan jawen rarebobi jawékinin jato akinti shinanyamai, jara jan ikonha keskati jayamake, itan ja joi ikonhayamaibo bebonbires jakonma iki. \p \v 9 Ja benomaatabo akinnoxon jaton jane wishatiainkora, sokota chonka baritia winoabores itan westíora beneyabicho iká ainboboresibi ikanti jake, \p \v 10 Jainoax ikanti jake jakon jawéki aká kopibo jato onankanabo, jaton bakebo jakonhakin koiranxon aniaibo iká iken, jawen xobon bekanketian jato jakonhaxon biai iká kopí, jabé joi akaibo jato akinnai iká iketian, jainxon ja onitsapitaibo jato akinnai iká kopí, itan jatíbi meskó jakon jawékibo akai ainbo iká iketian. \p \v 11 Ikaxbi jato akinnoxon jaton jane wishatiainkora, ja benomaaya xontakobopari, min jaton jane wishatima iki, jabora jaton keenai shinanbaon jatoaresa, Cristo ikonhakin jenetaanan jakiribi benoti shinanyabo ikanai, \p \v 12 jatianra ja jaton yoinibo senenhayamai, jakonmabores akí iikanti atipanke.\f + \fr 5.12 \ft Jakiribi benotima yoinixbi benoax jaskákanti yoiira ikai jaskati.\f* \p \v 13 Jainoax chikish banetax ikanai, xobobotiibi boaantani, jaskati ikanai joishoko ninkatax keshai, jatíbiain jato betan niakaaxon atima joishokobobi jato yoii. \p \v 14 Jaskara kopíra ja xontako ikaxbi benomaatabo, jakiribi benokanti en jato yoiai, jaskati benotaanan bakeaax xobomeax jaton bake koirannaibobiribi ikanon ixon, jaskáaxon ja joi ayamaibaon jato jakonmaakin yoitima kopí. \p \v 15 Jatíribi benomaayabaonra moa Dios ikonhakin jenekana iki, jaskatira ja *Satanás keenai keskábores akí jakanabo ikanai. \p \v 16 Jawerato joi akai ainbaon rareboki benomaata iki, jara jawen rarebobaon akinti jake, ja joi akaibaonbicho jatíbi jato akinnai itima kopí, jaskaxon ja ikonkon rarebooma ikax, jan akinti yamaabobicho ja joi akaibaon jato akinkanti kopí. \p \v 17 Ja joi akaibo jato jakonhakin ikinai ancianobora, bebonbires jakonhakin shinanxon jawékininbo akinkanai iti jake, ja jaskaakanaibora iti jake, jakon joi jato yoiananbi ja joi jato axeaishamanbores. \p \v 18 Jaskara yoiira ikai Wishá meran neskati: “Trigo xememakin waka kenexyamakanwe abanon pikin”, iki. Jainxon yoiribiai: “Ja teetai joninra jawen kopí biti jake”, iki ixon.\f + \fr 5.18 \ft Dt. 25.5; Lc. 10.7\f*\fig Trillando granos|CO01463b.TIF|col|1 Timoteo 5.18||Trigo jamámaxon waka xememai.|\fig* \p \v 19 Jainxon westíora *ancianonin jakonma aká yoikanaitian, rabékan iamaax kimishaxon onanxon yoikanaima iketian jato ikonhayamawe. \p \v 20 Ja ocha akín jeneyamaibo jatíbi ja joi akaibo tsinkixon, jato bebonxon jato notsinwe, abákanon min jato jaskáa ointaanan, rakéxon wetsabaon jaskara ochabo ashokoyamakin. \p \v 21 Ja Dios betan Jesucristo bebonxon, jainxon jawen katota ángelbo bebonxonra, neskákin min jato anon ixon en mia yoiai, jatíribibores axon wetsabo ayamai akin jato ayamawe. \p \v 22 Westíora joni Diossen tee akai iti janenoxon, akonkin jawen ikábo onanxonmabi ishtonbires min mekenman mamepasyamawe, jaskataxa mia jabébi ocha akai keská inake, miaribira jaskara jakonmainbo niakaati yamake. \p \v 23 Ja min poko meran isinai ixon onpaxbicho xeayamawe, ichama vinoribi xeawe. \p \v 24 Jatíribi joi akaibaon ocha akaibora onantibires non oinnai, ja akanaibo onanxon jato yoixonkanamabi, ikaxbi wetsatianra chinípari jishtiai non oinnai.\f + \fr 5.24 \ft Pablonra jakiribi tekikin yoii iitai ja v. 22 ikain yoia joi.\f* \p \v 25 Jaskáribiira ja jatíribibaon jakon tee akaiboribi onantibires iki, jatian ja non oinyamai jawékibora jatíbitian joné iamai. \c 6 \p \v 1 Jawerato joi akaiki jan iboaka joni tee axonai iki, janra jawen ibo kikin joniakin ointaanan jaki jakon shinanti jake. Jaskatax tsoabi Dioski, itan jawen joi non jato onanmaikiribi, jakonmaibo yoyo ikantima kopí. \p \v 2 Jatian jan jato iboa joni joi akairibi iketianra, kikin joniakin shinankin jenekanti yamake. Jaskáyamakinkaya, bebonbires jakonhaxon jaton teebo axonkanti iki, ja jakonhakin maton tee axonai jonibo riki joi akaibo, jabora non noi wetsabo iki, neskati ikantibora min jato onanmati jake. \s Koríkires noia itima \p \v 3 Jaweratonki wetsaresibi joibo onanmakin, ja non Ibo Jesucriston ikon join yoiai keskáakinbo jato yoiamai, itan non yoiai ikon esekan yoiai keskámakinboribi yoiai, \p \v 4 jara jawe onanma ikaxbi rabitaires iki, jainoax meskó joi kopíshokobo join iananani jaa ikaxiki, já meran westíora isin itina keská. Jaskarainoaxa peokootai jatoki notsiresti shinanbo, jatoki sináti shinanbo, ichamisti shinanbo, jato ikonhayamati shinanbo, \p \v 5 jainoax shinan ramita jonibo betan jatíbitian join ianananresti shinanyabo ikaxa, ja ikon joi onanmabo ikanai, jabaonra shinannai Diossen joi kopi icha koríki bitiakinbores. \p \v 6 Ikon riki ja Diossen joi akai ikax, noa jakonbires jati. Ikaxbi jato jayata jawékiabicho ikax, raroi jakanabores. \p \v 7 Nato neten pikókinra non jawebi beyamaa iki, jatian mawákinra non jawebiribi boyamanoxiki. \p \v 8 Jaskara ikenra ja jawékiatia ikax, itan ja saweti chopaya ikax moa shinan jakonshaman noa iti jake. \p \v 9 Ikaxbi ja icha jawékia itin keenaibaonra tanakaatibo joketian, teneyamakanai. Jaskatira icha jakonma jawékibo ati shinanyabo ikax, jakonmaatax manótiain bokanti atipanke. \p \v 10 Ja koríki noiax noa jayora keenainkoniaxa, jatíbi meskó jakonma shinanbo beai, jainoax jarake bebonbires koríkiatinin keenkin moa non Ibo ikonhakin jenekanabo, jaskataxa jatonbinix icha jakonma onitsapiti jawékibo winókanke. \s Timoteo jaskara iti Pablon yoia \p \v 11 Ikaxbi mia Diossen tee akai joni ixon, jatíbi neskara jakonma jawékiakinbo shinanyamawe, ponté shinanyanix Dios keenai keskábores axoni jawe, jaki koshii jenéyamawe, jato noiwe, atikomabo nokoxon koshiakin shinanwe, jato betan senenbiresibi shinanmeeti jawe. \p \v 12 Ja min ikonhaa jawékinin koshii jenéyamawe, jatíbitian jati neteya itiakin shinankin jeneyamawe, jaskara kopíra mia Diossen katota iki, jakopiribira icha jonibo bebonxon mia Dios ikonhaax jaki koshia min jato yoia iki. \p \v 13 Rama jatíbi nato netemea jawékibo jamaa Dios bebonxon, itan ja Poncio Pilato bebonmeax jakoni yoyo ini Jesucristo bebonxonra en mia yoiai, \p \v 14 ja en yoiai keskatibo mia inon ixon, ja min ikainkonbo jawe jakonmabi iamai, tsonbi mia ja yoixonti yama iti kopí; ja noa jaon raroti non Ibo Jesucristo joái kaman. \p \v 15 Jatian jaskati nete senenketianribira, Diossen non Ibo noa raanxonoxiki, jabicho riki jatíbinin koshi, jaon rarotishaman, apobaon Apo, joni koshibaon joni koshi. \p \v 16 Jabicho riki jawetianbi mawáyosma, tsonbi pataxti atipanyamaa, kikinshaman joé pené meranbires jaa iketian. Tsoa joninbira ja oinnama iki, itan tsonbira ointi atipanyamaribike, jatíbitian jabicho rabinon akanwe, atipana koshia iketian, ibanon jaskarashaman. \p \v 17 Ja jatíbi jawékiabo jato yoiwe jaskaraton rabíamakanon, itan ja jato jayata jawékikires koshiamakanon, ja jato jayata jawékibora basima keyotaibobires iki, jaskayamaikaya ja noa jaskaraton raronon ixon, noa jan jatíbi jawéki meniai Dioskireskaya manákanon. \p \v 18 Jakon jawékibores akanonkaya jato yoiwe, ibákanon ja jakon jawéki akainkobokaya jatíbi jawékia keskábo ikí, itan jato jayata jawékininbo ja jayáomashokobo jato menianan akinti shinanyaboribi ikanon ixon. \p \v 19 Jato jaskáaxonra jawetianbi keyótima icha jawéki tsamankanti iki, itan jati neteyaribi ikanti iki. \s Senentiainbi jaskara atibo yoia \p \v 20 Timoteo, ja en mia ati yoia teebo jakonhakin awé, ja iresbiresi yoyo ikaibo, itan noabokaya riki ja ikon joi onanabo iki ikaibaon yoiaiboribi jato ninkáxonyamawe, \p \v 21 jaskara joibo jato ninkáxonaxa jatíribibo Dioski koshii jenékana iki. Diossenbi jawen jakon shinanman mato akinbanon.