Efesobi gaj crijkunamu parlushkamunda
2
1 Paiga parlusha katisha,
“Éfeso pueblobi gaj iglillaj angelmua kashna nisha escribi:
Kanchis luzerogunada Paibuj alli ladu makibi Chariguj,
kurin rurushka michayuj kanchis candelerogunaj chaubibi Purigujka kaidami nin:
2 Kan tuki ima rurushkadami yachani.
Jinchida ruragushkadash,
llakigunada apagushalla purishkadash,
millida rurujkunada na rikunachishkadash yachanimi;
shinaidi ‘Jesusmunda parlachun agllashkami ganchi’ nisha nij tukushalla purijkunada imalla rurashkada alli rikushami llagmaguna gashkada cuenta kushkangui.
3 Ñukada katishkamunda llakigunada apushash na sakirishalla na shaikushalla katijtash yachanimi.
4 Shina gakish kanmundaga kaidami na allidaga rikuni:
kallarimu charishka k'uyidaga sakishkanguimi.
5 Chimundami maibi gasha urmushkada yuyarisha,
juchada sakisha Diosmu vuelti.
Kallaribi ima rurashka layaidi ruri.
Na shina rurusha,
llakirisha Diosmu na vueltamukiga,
ut'kadami kambujmu risha,
kambuj candelero maibi tiyagushkamundash kichusha.
6 Shinash kaidami allilla rurangui:
nicolaitaguna ima na alli rurushkagunada p'iñuj gangui,
Ñukash chigunada p'iñanimi.
7 ¡Maijin uyungu rinrinda charijka tandanukushka crijkunamu Diosbuj Espíritu ima nishkada uyachun!
Na alligunada maijinsh mishujkunamunga Diosbuj k'uilla llaktabi tiyuj kausida kuj yuramundami karusha,”
b nishami parluga.
Esmirnabi gaj crijkunamu parlushkamunda
8 “Esmirna pueblobi gaj iglillaj angelmush kashna nisha escribi:
Kallarichijkish Tukurichijkish,
wañushka gashash kutin Kausarijka kaidami nin:
9 Ñuka kanda llakibi gajtash,
imada na charij gashkadash yachanimi (shinash charijmingui).
Na israelguna gashash ‘Israelgunami ganchi’ nijkuna kanda na valichisha rimujkunadash yachanimi.
Ashtangarin paigunaga Satanasbujta rurungu tandanukujkunami gan.
10 Kai llakigunada apanadaga ama mancharichu.
Kangunamunda maijingunadaga diablo carcelbi shitushami,
crijchu na crijchu gashkada rikunga;
shinaidi chunga p'unlladami llakida apunguichi.
Kan wañungamaga alli crisha katinguilla.
Shina katikiga na tukurij kausi coronadami kanmu kusha.c
11 ¡Maijinbish rinrinda charijka tandanukushka crijkunamu Diosbuj Espíritu ima nishkada uyachun!
Na alligunada maijinsh mishujkunaga,
kutin k'ipa wañimundaga ima llakidash na apungagunachu,”
nishami parluga.d
Pergamobi gaj crijkunamu parlushkamunda
12 “Pérgamo pueblobi gaj iglillaj angelmush kashna nisha escribi:
Ishki jiluyuj puntalladi espadada Charijka kashnami nin:
13 Maibimi Satanás mandagun kan chibi kausashkadaga yachanimi;
Ñukamunda parlusha alli p'aktachij kangunapuramunda Antipasta wañuchishka p'unllagunabish Ñukaj shutida na kungarishalla,
Ñukada crinadaga na sakishkanguichu.
14 Shina gakish kanmundaga kai ashagunaidami na allidaga rikuni:
Chibiga Balaam yachachishkagunada na sakisha nijkunadami charingui.
Pai Balaam-mi Balac k'arida yachachishagaeʻMusrhagunamu kushka mikunada mikusha,
wainayasha israelguna juchabi urmachun yachachiʼ nij gaga.f
15 Shinaidi nicolaitaguna yachachishkagunada na sakisha nijkunadash maijingunadaga chairijti charigunguillami.
16 Chimunda juchada sakisha Diosmu vueltari.
Kan na shina rurukiga kambujmu ñadi rishaga,
Ñukaj shimimunda llujshiguj espadanmi paigunanga takanukusha.
17 ¡Maijinbish rinrinda charijka tandanukushka crijkunamu Diosbuj Espíritu ima nishkada uyachun!
Na alligunada maijinsh mishujkunamunga,
pakushka tiyaj ‘maná’g shuti tandadami karusha.
Shuj uchilla yuruj rumidash kushami;
chi rumibiga pish na rijsishka mushuj shutida escribishami kusha,
hchidaga maijin japijllami rijsinga.”
Tiatirabi gaj crijkunamu parlushkamunda
18 “Shinaidi Tiatira pueblobi gaj iglillaj angelmush kashna nisha escribi:
Ñawi lulungunash nina rupaj shinada charij,
chakigunash llambushka bronce layada charij Diosbuj Churiga kaidami nin.
19 Ñukaga tuki kan rurushkagunada,
kambuj k'uyida,
kan crishkada,
alli yuyin alligunada shujkunamu rurushkada,
llakiguna shamukish jinchi gashkada,
shinaidi kununga kallari rurushkadash yalli rurushkadami yachani.
20 Shina gakish kanmundaga kaidami na allidaga rikuni:
Jezabeliwarmi ‘Dios nishkada parlujmi gani’ nisha,
na allida yachachisha,
Ñukaj sirvijkunada ‘Wainayana allimigun,
dioskunamu kushka mikunada mikunallamigun’ nisha pandachigukish na jarkashkanguichu.
21 Ñukaga chi warmi juchagunada sakisha Diosmu vueltarichun nishami chapagugani,
shinash paiga wainayagushkadash na sakish ninchu.j
22 Shinusha k'awitubi siririchun paimumi unguida kachusha;
paigun wainayajkuna pai rurachishka juchagunada sakisha Diosmu na vueltukiga,
paigunadashmi manchanaidi llakichisha.
23 Shinaidi chi warmij maragunadashmi wañuchishtasha.
Shina rurukimi tuki tandanukushka crijkuna paigunaj umabi ima yuyagushkadash,
shungubi ima sintishkadash Ñuka yachuj gashkada yachi chayungaguna.
k Shinami kanguna ima rurashkada rikusha kuna gashkadaga tukigunamu kusha.l
24 Ashtanbish kangunadaga Tiatira pueblobi kausujkunamunda maijinguna pai yachachishkada na katishkamunda,
Satanasbuj pakushka yachanami nishkagunadash na yachi chayashkamundaga,
ashtan ima ruranadaga na mandanichu.
25 Shina gakish kangunaga Ñuka shamungagama crinada ama sakinguichichu.
26 Na alligunada maijin mishusha Ñuka munushkallada tukuringagama p'aktachijkunamunga llaktagunada mandachunmi kusha.
27-28 Ima layami Ñuka Taita shuj mandanada Ñukamu kuga,
shinaidimi paigunamush kusha.
‘Shina kuki achpa mangada ñutushtaj laya jirru varan mandangami.’
m
Shinaidi p'unllayanaj rikurij luzerodashmi paigunamunga kusha.
29 ¡Maijin uyungu rinrinda charijka tandanukushka crijkunamu Diosbuj Espíritu ima nishkada uyachun!”