Tukuri JUAN
Gayoda saludashkamunda
1
1 Crijkunada pushaj yuyij gashami kabishkadi k'uyashka Gayomu escribini.
2 K'uyashka wauki,
ima layami kambuj espíritu alli katin shinaidi ima unguish illuj gachun kan tukigunabi alli rishka gachunmi Diosta mañani.
3 Ima urami maijin waukiguna shamusha kan ima laya kabishka shimigunada p'aktachisha katigushkada parlukimi pachundi kushiyarigani.
4 Ñukaj wawagunamunda ʻKabishkada rurusha purigunʼ nijta uyusha tukimunda yallidami kushiyarini.
5 K'uyashka waukilla,
na rijsishkaguna gakish crijkunamunga kan imada ruragushash alli allimi ruraj gangui.
6 Paigunaga kan shina k'uyashkadaga crijkuna tandanukushkabimi yachi chayachigaguna.
Diosbujta rurujkuna gashka shina paiguna rigushkamu richun imallanbish kan ayudana allinmumi.
7 Diosta na rijsijkunamunda imadash na japishalla paigunaga Jesusbuj shutida k'uyushkallamundami llujshisha rigaguna.
8 Shinusha ñukuchiga kabishkada rurujkunanga igulda rurujkuna gangau paigunada imanbish ayudanami ganchi.
Diotrefesmundash Demetriomundash
9 Tandanukushka crijkunamu ña escribiganimi.
Ashtanbish Diotrefesga paigunapuramunda paidij ñaubuki gangu munushami ñukuchidaga na japisha nin.
10 Shinusha ñuka rishaga pai ima ruragushkagunadaga ñukuchida na alli shimigunan llagmusha purishkada yuyachishami rimasha.
Paiga na kailladash rurash ninchu,
ashtanbish chi waukiguna chayukish na japinchu;
paigunada japish nijkunadash ama japichun jarkanmi,
japikiga crijkunapuramundash llujshichishtanmi.
11 K'uyashka wauki,
pai na allida rurashkadaga kambish shinaidijka ama rurichu,
ashtanbish alligunaida ruri.
Allida rurajka Diosbujmi.
Na allida rurajkarin Diostaga na rijsishkachu.
12 Demetriomundaga tukigunami ʻAlliʼ nin pai kabishkada ruragushkaidikish alli gashkada rikuchin.
Ñukuchidikish paimundaga allimi parlanchi,
ñukuchi kabishkada parlagushkadash yachunguimi.
Tukuchingaj yuyiguna
13 Kanmuga milgalladadi ninagunadami charigani.
Shinash tintallan plumallanga na escribisha ninichu.
14 Chibuj randiga ñawi ñawi rikunukusha ñadi parlanukungumi shuyaguni.
15 K'uilla kausiga kangun gachun.
Kangun alli apanukujkunash ʻ¿Allillachu gangui?
ʼ ningunami.
Ñukuchin apanukujkunadash shuj shujlla tukigunada ʻAllilla gashka gachunʼ nibangui.