K'ipa JUAN
Crijkunada saludashkamunda
1
1 Crijkunada pushaj yuyij gashami alli nishka agllushka warmimu paibuj churi ushigunamusha escribini,
paigunada kabishkadimi k'uyani,
na ñukallashchu ashtanbish kabishka parluda tuki yachi chayujkunashmi;
2 chi kabishka parluga ñukuchibi gagushkallamundami k'uyani,
ima uragamash ñukuchin gagungallami.
3 Taita Diosmundash Taitabuj Churi Jesucristomundash kushka alliguna,
ñukuchida llakishka,
k'uilla kausish ñukuchin kabishkabi k'uyibishmi ganga.
K'uyanukusha kausanamunda
4 Kambuj wawagunapuramunda maijingunaga Taita Dios mandushkada ñukuchi japishka shina kabishkada rurusha purigujta rikusha pachundimi kushiyagani.
5 Kununga warmilla,
kaishujkun chaishujkun k'uyanukuchunmi mañabani.
Kaida kangunamu escribigushkaga na mushuj mandashkachu,
ashtangarin kallarimunda pacha charishkalladimi gan.
6 K'uyiga kaimi gan:
Paibuj mandashkagunabi nishka shina kausana.
Kai mandashkaga,
kanguna kallarimunda pacha uyashka shinaga k'uyibi kausachunmi gan.
Llullusha crichijkunamunda
7 Kai pachabiga llullusha crichijkunaga taugagunami purin.
Paigunaga Jesucristo kabishkadi aichayuj tukusha shamushkadaga na parlujkunachu.
Maijin shina rurujka llullasha crichij shinaidi Cristoda p'iñajmi gan.
8 Ñukuchi rurashka ama yanga sakirichun,
ashtangarin chi ruragushkamunda japinashkada illujtada japingajka kangunallamundadi yuyin gaichi.
9 Maijinbish Cristo yachachishkada na katisha ashtandi yallida yachachijka Diostaga na charinchu.
Pai yachachishkagunallada ruragujkarin Taitadash Churidashmi charin.
10 Maijinbish kangunajmu risha kashna yachachishkagunada na yachachij gakiga wasimu ama waiguchinguichichu.
ʻAlli shamushkanguiʼ nishamash ama ninguichichu.
11 Maijin ʻAlli shamushkanguiʼ nijka paiguna layaidi na allida rurujmi tukun.
Tukuchingaj yuyiguna
12 Kangunamu ninagunadaga milgalladadi charishash p'angabi tintallanga na escribisha ninichu.
Ashtangarin ñukuchi illujta kushiyaringujka kangunandi ñawi ñawi rikunukusha parlanukungumi munani.
13 Dios agllashka kambuj ñaña shina gaj crijkunami kangunada ʻ¿Allillachu ganguichi?
ʼ nin.