Diosbuj Espiritumunda na alli espiritumundash
4
1 K'uyashkagunalla,
kai pachabiga Diosmunda llagmusha yachachijkunaga taugagunami rikurishka;
shinusha ama tuki chi espiritugunada cringuichillachu.
Ashtangarin ʻ¿Chi espiritugunaga Diosbujtichu gan?
ʼ nisha tapurinadimi ganguichi.
2 Kaibimi Diosbuj Espiritushkadaga yachi pudinguichi:
ʻJesucristoga aichayuj tukusha shamujmiʼ nijka Diosbujmi gan.
3 Maijinbish Jesusmunda na shinada nijka na Diosbujchu,
ashtangarin Cristoda p'iñaj espiritudami charin.
Chi espíritu shamunashkadaga kangunaga uyashkanguichimi,
kununga ña kai pachabimi purigun.
4 Ñukaj wawagunalla,
Diosbujkunami ganguichi;
kangunabi Kausagujka kai pachabi gajtagaa ashtandi yalli gashkamundami llullajkunadaga vincishkanguichi.
5 Chigunaga kai pachaj gan,
shinusha kai pachamundaguna laya parlariki kai pachamundagunaga uyanllami.
6 Ñukuchiga Diosbujmi ganchi,
Diosta rijsijkunaga ñukuchida uyanllami;
na Diosbuj gajkunaga na uyash ningunachu.
Shinusha kaigunabimi maijindi kabishkadi Espirituda charin,
maijindi pandachij espiritumada charin,
ñukuchiga rijsi pudinchi.
Diosbuj k'uyimunda
7 K'uyashkagunalla,
k'uyiga Diosmundami shamun,
shinusha kaishujkun chaishujkun k'uyanukushunchi.
Tuki mashnalla k'uyajka Diosbi wacharishkagunami,
Diosta rijsijkunami gan.
8 Diosga k'uyimi gan,
shinusha maijin na k'uyajka Diostaga na rijsishkachu.
9 Diosga Paibuj shujlla Churimunda ñukuchi kausida charichunmi Paidaga kai pachamu kachuga;
shinami Pai ñukuchida k'uyashkada rikuchiga.
10 Ñukuchiga Diostaga na k'uyaganchichu,
ashtangarin Paimi ñukuchida k'uyashash ñukuchij juchagunada p'ichushtachungab Paibuj Churidami kachaga.
K'uyiga kashnadimi gan.
11 K'uyashkagunalla,
Dios ñukuchida shina k'uyuj gakidijka ñukuchikish kaishujkun chaishujkun k'uyanukunami ganchi.
12 Diostaga pish naidi na rikushkachu,
shinash ñukuchi kaishuj chaishujkun k'uyanukukiga Diosga ñukuchibimi kausagun,
shinaidi Paibuj k'uyish tukibi ashtan illujtami ñukuchibi p'aktushka gan.
13 Diosga Paibuj Espirituda ñukuchimu kushkamundami ñukuchi Paigundi kausashkada Paibish ñukuchin kausagushkada yachi tukunchi.
14 Taitaga Paibuj Churida kai pachada kishpichichun kachashkadaga ñukuchilladi rikushkadami parlagunchi.
15 Maijinbish Jesusta ʻDiosbuj Churidimiʼ nijka Dioskunmi kausan,
Diosbish paigunmi.
16 Shinami Dios k'uyuj gashkada yachi chayushkanchi shinaidi Pai ñukuchida k'uyashkada crinchi.
Diosga k'uyimi gan;
k'uyibi gagujllaga Dioskunmi kausan,
Diosbish paigunmi.
17 Shinami Paibuj k'uyish ñukuchibiga tukibi ashtan illujta p'aktushkami gan;
chimundami alli rurushkada na alli rurushkada Dios rikuchina p'unllabiga imadash na manchashun.
Ima layami Jesucristo gan shinalladimi ñukuchikish kai pachabi ganchi.c
18 Kai k'uyibiga mancharinaga na tiyanchu,
ashtangarin tukibi ashtan illujta p'aktushka k'uyiga manchida anchuchishtanmi.
Manchiga llakichinadashmi apamun.
Chimundami maijinbish manchin gashaga k'uyibi narij illujta p'aktunchu.d
19 Diosti ñukuchida k'uyashkamundami ñukuchish k'uyanchi.
20 Maijinbish ʻDiosta k'uyanimiʼ nigushash waukida na rikunachijka,
llagmadimigun.
Shinushaga maijinbish waukida rikushash na k'uyushadijka,
na rikushka Diostagarin na k'uyi pudinchu.
21 Ñukuchiga kai mandashkadami Paimunda charinchi:
ʻDiosta k'uyajka,
kikinbuj waukidash k'uyachun.ʼe