Kusandij warmindij ima laya kausanamunda
3
1-2 Shinalladi warmigunash,
kangunaj kusagunada alli kazujkuna gaichi;
kanguna juchada na ruruj ashtan alli kazuj gashkada rikushkallamunda maijin kusagunaga Alli Shimida na crij gashash kikinbuj warmi ima laya gajta rikushalla imadash na nijllabidi crij tukungagunami.
3 Kanguna k'uilla gashkaga ama jawa jawalla parijarishkallabi,
juakchada k'uilladi nakcharishkama,
kurin rurashkagunada aparishkama,
allilladi churanada churarishkamamunda gachun.
4 Chibuj randiga kanguna k'uilla gashkaga shungu ukumundadi na p'iñarij chulunyashka espiritun na tukuribujti k'uilla gashka gachun.
Diosbuj ñaubukiga kaimi yallidijka valin.
5 Ñaubagunagarin Diosbujlla gaj warmigunash shina layaidi Diosbi yuyigunada churasha kusagunada kazushami allilladi parijarijma laya rurujkuna gaga.
6 Sarash shinami paibuj kusa Abrahamdaga ʻÑukada mandajʼ nisha kazuga.
Kangunash allida rurasha shinaidi imadash na manchuj gashaga Saraj ushigunami tukuganguichi.
7 Kusagunash shinaidi kikinbuj warmin alli yuyarisha kausichi.
Paiguna Dios kumbidashka kausida kangunandi japijkuna gashkamundaga jawaidi p'akirijlla vazumada shina warmidaga yalli valichichi.
Kanguna Diosta mañaki imabish ama trankarichunga chaida rurichi.
Allida rurushash llakida apanamunda
8 Kaida tukuchingaj tukiguna shuj shinalla yuyarisha llakirinukusha kushiyarinukusha shinaidi wauki panigunapura shina k'uyanukusha,
shujkunamunda llakirijkuna shinaidi na jatun tukujkuna gaichi.
9 Ima na allida rurakish ama shinaidijka rurichichu,
litukish ama shinaidi litichichu.
Chibuj randiga paigunamu Dios alligunaida kuchun mañichi.
Alligunada japichunlladimi kangunadaga Diosga kayaga.
10 Dios escribichishkabiga,
“Maijinsh kausida k'uyusha kushilla p'unllagunada charingu munujka
kikinbuj k'alluda na allida rimanamunda shimish llagmusha parlanamundash jarkarichi.
11 Na allida ruranamunda anchurisha allida rurichi;
tukigunan k'uilla kausungu munichi,
chidati katichi.
12 Mandujbuj ñawigunaga kabishkada rurujkunakimi churashka gan;
Paibuj rinringunash paiguna mañushkagunada uyungaj yuyinlladimi chapagun;
shinash
Mandujka millida rurajkunadaga na allibi churashami rikun,”
shinami nin.a
13 Shinusha allida rurana yuyilla gakiga ¿kangunada pidij na allidaga ruri pudingari?
14 Ashtanbish kabishkada ruragushash llakichishka gashamaga ¡kushiyachishka ganguichi!
Chi llakichijkunamunda mancharishama musparishamash ama gaichichu.
15 Chibuj randiga kangunaj shungubi Cristodaga ʻMandajmiʼ nisha allibi churichi.
Kanguna chapagushkada imamunda charishkada maijinguna tapukiga k'uiti vueltachingajka p'unllandijta parijarishka gagüichilla.
16 Imada parlashash k'uyi shungun Diosta manchushash parlarichi.
Cristoda crij shina kanguna alli gashkamunda rimusha juchachijkunaga pinganaibi sakirichun linshu yuyin gananguichi.
17 Na allida rurashkamunda llakida apanabuj randiga,
Dios munashka gakiga allida rurashkamunda llakida apanami alli gan.
18 Cristolladikish kangunada Diosmu pushangajmi kabishkada ruruj gashash na kabishkada rurujkunamunda juchagunamunda shuj kutinlla llakida apaga;
aichabiga wañuchishkamiga shinash Espiritubiga kausachishkami gaga.
19 Espiritubi gashami prezu tiyaj espiritugunamush yachi chayachingu riga.
20 Chi gentegunaga Noé kausagushka ñauba p'unllaguna jatun barca rurarish katiguki Diosga na ut'kada p'iñarishalla shuyagukish na kazujkunami gaga.
Chi barcamu waigushami chi llaki yakumundaga ashagunalla kishpiriga,
tukigunamundaga pusujpurallamiga.
21 Chi yakuga bautizarina ima laya gajtami rikuchin;
kununga ñukuchikish yakun bautizarishkanga Jesucristo kausarishkamundami kishpichishka ganchi.
Bautizarinaga na kikinbuj aichadaga mapalla gashkada maillarinachu,
ashtangarin Diosbuj ñaubuki linshu yuyi gangu munushkadami nigun.
22 Jesucristomi jawa pachamu risha Diosbuj alli ladubi tiyagun;
shinaidi angelguna,
poderyuj manduj espiritugunash Pai mandushkabimi ganguna.