Kai pachabi kausujkunan ima shina apanukunamunda
4
1 Kangunapurabi takanukigunama,
rimanukigunama,
¿maimundadi shamun?
Kangunaj ukumunda milli muniguna takanukuchigukimi chigunadaga rurunguichi.
2 Kanguna imada japingu munushash na japishaga wañuchinguichi;
imabish shujkunajta munusha wañurigushash ima munushkada na japi pudishaga,
rimanukunguichi shinaidi takanukunguichi.
Ashtanbish Diosta na mañushkamundami kanguna munushkadaga na charinguichi.
3 Shinaidi imada mañushash na alli mañushkamunda,
kangunaj aicha munushkallada rurusha katingu mañushkamundami na japinguichi.
4 ¡Wainayaj layaguna!
Kai pachaj yuyigunan alli apanukujkunaga Diosta na rikunachij gashkadaga ¿nachu yachunguichi?
Shinushaga maijinbish kai pachan apanukungu munajka Taita Diosta na rikunachijmi tukun.a
5 “Ñukuchibi kausachun kushka Diosbuj Espiritudaga Paibujlla gachun nishami Diosga manchanaidi k'uyan,”
nisha Diosbuj Shimibi parlushkadaga ¿yangamunda nishkadachu yuyunguichi?
6 Shina gakish Paiga na kuna gakish ñukuchimu ashtandijmi alligunada kushka;
shinusha,
“Jatun tukushkagunanga Diosga jinchi tukunmi,
ashtanbish ʻImash na ganichuʼ nijkunamunga Diosga alligunada kujmi,”
nishami Diosbuj Shimibiga parlan.b
7 Shinakiga Diosta kazichi;
diablomundaga jinchi gaichi;
paiga kangunamunda mitikusha ringami.
8 Diosmu kuchuyichi;
Paish kangunamu kuchuyangami.
Juchayujkuna,
makida maillichi.
Kanguna,
Diostash kai pachadash yuyarik'ichujkuna,
shungugunada linsharichi.
9 ʻ¡Na allida rurushkanigaʼ nichi,
llakirichi,
wakichi!
¡Kanguna asishkash wakana tukuchun,
shinaidi kushish llaki tukuchun!
10 Manduj Diosbuj ñaubuki imash na gaj shina gaichi;
chibimi Paiga kangunada jatunyachinga.
Crijkunapura na juchachinukunamunda
11 Crij wauki paniguna,
ama kaishuj chaishujta maidash rimanguichichu.
Maijinbish kikinbuj waukida juchachisha na allida rimushaga,
ʻDios mandushkagac na allichuʼ nisha rimushka shinami tukun.
Shina ʻDios mandushkaga na allichuʼ nisha rimushaga kazuna randiga ashtanbish juezmi tukungui.
12 Mandushkada Kujka shujllami gan;
Pailladimi Juez gan.
Paimi kishpichingukish,
llakimu kachangukish pudin.
Ashtanbish kanga shujta na allida rimusha juchachingujka ¿pidi ganguiri?
Kayundij p'unlla ima tukunada na yachushkamunda
13 Kununga mashnalla,
“Kunun gasha kaya gashash mai llaktamush rishunmi,
chibimi shuj watada randisha k'atusha kuchkida rurashun,”
nijkuna kaida uyichi:
14 Kaya ima tukuna gashkadaga yachish na yachunguichichu.
Kangunaj kausi ¿ima layadi gan?
Ratuwaida rikurisha ratubiga chingarijlla p'uyu layami ganguichi.
15 Ashtangarin,
“Mandaj Dios munukiga kausashun,
ima ruranadash rurashunmi,”
ninami ganguichi.
16 Chida nina randiga kangunaga jatun tukusha imadash atirishaidi parlunguichi;
tuki shina jatun tukush parlanaga na allichu.
17 Shinushaga maijinbish allida ruranada yachushash na rurushaga juchadami ruran.