Ñauba sacrificio na alli gashkamunda
8
1 Shinakiga kununga kashna nigushkamundaga tukimunda yalliga kaimigun:
Ña parlamushka shina jawa pachabi Diosbuj mandana alli ladubi tiyashka Jatun Manduj Curadaga charinchimi.
2 Paiga na genteguna rurashka wasibichu,
ashtangarin Manduj Dios rurashka kabishka Paibujlla wasi ukubimi jatun mandaj curaguna ruranada rurusha sirvigun.
3 Tuki jatun mandaj curagunaga ofrendagunada,
sacrificiogunadash Diosmu kuchunmi churashka gan.
Chimundami Jesucristosh imaidash kuna gan.
4 Moisés mandashkabi ofrendada Diosmu kuj curaguna ña tiyashkamunda,
Pai kai pachabi gashkashaga ch'ikun curallash na ganmuchuga.
5 Kai curagunaga Diosmu ch'ikanyachishka ukubimi ruragunguna.
Chi ukuga jawa pachabi imalla tiyashka layallada rurashka,
llandu layallami.
Diosbujlla tuldushka wasida rurungu kallariguki Diosga Moisesmu,
“Alli riki,
urkubi rikuchishka layadami tukida rurana gangui,”
a niga.
6 Ima laya Jesús mañusha kushka mushuj ari ninukushkaga ñauba ari ninukushkadash yalli valijmi,
shinaidi Jesús rurungu japishkaga curagunaj ruranada yallimi.
K'uilla alli ʻP'aktachishaʼ nigushkagunabi churashkamundami ashtan yalli valin.
Ñauba ari ninukushkaga na alli gashkamunda
7 Ñauba ari ninukushka alli gashkakiga kutin shuj ari ninukunaga na ministirinmuchuga.
8 Shinash Diosga chiguna na alli gashkada rikusha takush nishami,
“Jatun Mandujka,
‘Israelgun,
Judanbish shuj mushuj ari ninukida rurana p'unlla shamungami.
9 Kai ari ninukiga paigunaj ñauba taitagunada
Egiptomunda llujshichingaj makimunda japisha nishka layaga na gangachu.
Ari ninukushkada na p'aktachigukimi Ñukaga paigunada sakigani,’
Mandujka ninmi.
10 Jatun Mandujka,
‘Chi p'unllaguna k'ipa
Israelgunan rurungu ari ninukunaga kaimi ganga,’
ninmi:
‘Ñuka mandashkagunada paigunaj yuyibi churashami,
shinaidi paigunaj shungubish escribishami.
Ñukami paigunaj Dios gasha.
Paigunaga Ñukaj gentemi ganga.
11 Chi llaktallamundadi gajkunadash waukigunadash maijinbish,
“Mandaj Diosta rijsinami gangui,”
nisha parlanaga ña na ministiringachu.
Uchillamunda jatungama tukigunami Ñukadaga rijsinga.
12 Ñukami paiguna na alli rurashkagunada perdonasha,
shinalladi paigunaj juchagunadaga nalladi yuyarishachu,’ ”
b ninmi.
13 Kai ari ninukushkamunda mushuj nishaga Diosga ñaubadaga ña paya shina na validami rurashka.
Shina ña na valichishkaga ñallami illujta chingachishka ganga.