4
1 Jesús mandungu shamusha rikurishami kausujkunadash wañushkagunadash kauzayuj gashkada rikuchinga.
Shinusha Cristo Jesusbuj shinaidi Diosbuj ñaubukimi kai jatun alligunada kanmu mingani.
2 Uras gakish na uras gakish Diosbuj Shimida yachachisha katigunguilla.
Shinaidi takash nisha,
kunasha,
kushiyachisha na p'iñarishalla gushtulla yachachi.
3 Gentegunaga k'ipa p'unllagunabiga Diosmunda kabishka yachachishkada na uyusha ningagunachu,
ashtangarin paigunaj milli munigunamunda uyanaidigunada yachachichunmi tauga yachachijkunada mashkangaguna.
4 Kabishkamunda parlushkagunadaga na uyanachisha ñauba yanga parlugunaidami uyanachingaguna.
5 Ashtan tukibi kanga alli yuyin gailla.
Ima llakigunabish jinchi tukusha Alli Shimida parlanadaga parlusha katilla.
Kan ruragushkada ashtan yalli allida rurasha p'aktachi.
6 Ñuka wañunaga ña p'aktamugunmi.
Shinusha ñukaj wañibiga sacrificio shinami Diosmu kushka gasha.
7 Ñukaga Jesusta crishkada na kungarishami,
takanukunabi alli takanukusha mishanabi vincij shina chi chayanamu ña chayaganimi.
8 Kununga,
kabishkada rurushkamunda japina coronaga wakichishkami gan.
Chidaga,
kabishkada kauzachij Manduj Pai shami p'unllabiga ñukamu kunga.
Na ñukallamu ashtangarin mashnalla Pai shamunada yuyillan chapajkunamushmi kunga.
Timoteo ruranagunamunda
9 Ima layash ñukada rikungu ut'kada shamungui.
10 Kai pachada k'uyashkamundami Demasga ñukada shitusha Tesalónica pueblomu riga.
Crescentega Galacia llaktamu,
Titoga Dalmacia llaktamu riga.
11 Lucasllami ñukan gan.
Marcostaga Diosbujta ruranabi ñukada ayudaj gashkamunda pushamungui.
12 Tiquicodaga Éfeso pueblomumi kachugani.
13 Kan shamugushaga Troas pueblobi kausuj Carpoj wasibi sakisha shamushka jawalla churanada shinaidi librogunadash,
yallidijka pergaminogunadaa apamungui.
14 Jirrugunan imadash ruruj Alejandrosh ñukadaga manchanaimi llakichishka.
Pai llakichishkamundaga Mandajbish paidaga shinaidimi llakichinga.
15 Ñukuchi parlushkadash manchanaidi shayarisha nima na kazuj tukushka.
Shinusha paimundaga yuyin puringui.
16 Ñuka yanga juchachishka gashkada mandujkunaj ñaubuki kallari parlaribi pish na ayudagachu,
ashtan tukiguna kungarisha ñukaida sakigaguna.
Shina rurushkada Dios kungarichun.
17 Shina gakish Manduj Jesusga ñuka kuchubi gashami ñuka Diosbuj Shimida illijta parlachun tuki na israelguna uyachun jinchiyachiga.
Shinushami leonbuj shimimunda kacharichishka shina gagani.
18 Shinaidi tuki na alligunamundash Mandujka ñukada llujshichisha Paibuj jawa pachabi tiyaj mandanamu chayungama wakichinga.
¡Paidaga ima uragamash na tukuribuj ʻ¡Alli k'uilladijmingui!
ʼ nishka gachun!
Shina gachun.
Tukurina yuyigunamunda
19 Onesiforoj familiada,
Priscilada,
Aquiladash saludabangui.
20 Corinto pueblobimi Erastoga sakiriga.
Shinaidi Trofimodaga Mileto pueblobimi ungushkada sakimugani.
21 Tamia chiri p'unllaguna narij chayamujllabidi ut'kada shamungui.
Eubulo,
Pudente,
Lino,
Claudia shinaidi tuki wauki panigunashmi kanda saludan.
22 Manduj Jesusga kambuj espiritubi gachun.
Dios kushka alligunash kangunan gachun.