Crijkunada pushujkuna ima laya ganamunda
3
1 Maijinbish crijkunada rikusha pushuja gangu munujka jatun allidami rurungu yuyarin.
Kaiga kabishkamigun.
2 Crijkunada rikusha pushujka:
pish na juchachibuj,
shuj warmiyujlla,
na alligunamunda jarkarij,
alli juilluyuj,
alli nishka,
maijinguna chayukish alli japij,
alli yachachi pudij,
3 na ubiana yuyilla gaj,
takanukunada na munuj,
alli apanukuj,
p'iñanukunadash na munuj,
kuchki charinada mana yalli munaj,
4 paibuj wasibish alli manduj,
maragunash uyusha kazuchunbish alli yachachijmi ganagun.
5 Shinadijka maijinsh kikinbuj wasibi kausujkunadash na alli mandungu yachushadijka ¿ima layadi Diosbuj tandanukushka crijkunadaga pushungari?
6 Crijkunada pushajka mushuj crij na gana ganchu.
Na shina gashaga jatun tukusha diablo urmushka shina llakimu p'akta urmanmu.
7 Shinalladi na alli nishkabish diablo pandachishkabish ama urmachunga,
na crijkunaj ñaubukish valichishkami gana gan.
Iglillabi ayudajkuna ima laya ganamunda
8 Shinaidi iglillabi ayudajkunashb alli nishka gaj,
imada rurusha nishash p'aktachij,
na ubiana yuyilla gaj,
kuchkida japingu na allida na rurujkish gachun.
9 Ashtangarin Diosta crinamunda pish na yachushka yachanagunada linshu yuyin wakichichun.
10 Narikish churushaidimi,
paiguna ima laya kausagushkadadi rikuna.
Chibi pish na juchachibuj gakiga crijkunada ayudaj gachunga churanallami.
11 Ayudajkunaj warmigunash alli nishka gaj,
shujkunada washalla na parlaj,
ashtan na alligunamunda jarkarij,
tukibi alli p'aktachij gachun.
12 Crijkunada ayudajka shuj warmiyujlla,
maragunadash alli yachachij,
wasibish alli pushuj gachun.
13 Shina allida rurusha,
crijkunada ayudajkunaga alli nishkami gangaguna.
Shinaidi imadash na manchushallami paiguna Cristo Jesusta crishkamundash parlunga.
Pish na intindibuj crishkamunda
14-15 Kanda ñalla rikungu rinada yuyashash ñuka na ut'ka chayukimaga Diosta crijkunapurabi ima laya kausanada yachachunmi kaida escribisha kachani.
Chi tandanukuj crijkunaga kausuj Diosbuj iglilla gan,
jinchi jinchi pilar shina kabishkada charirijmi gan.
16 Pish na intindibuj ñukuchi crishkagac yalli jatunmi.
Chidaga ʻNa shinachuʼ ningujka pish na ni pudinchu:
Paiga aichayuj tukusha rikurigami.
Pai kabishka gashkada Diosbuj Espíritu rikuchiga.
Angelgunash Paidaga rikugagunami.
Llaktagunabi Paimundaga parlugagunami.
Kai pachabi Paidaga crigagunami.
Jawa pachamu Diosbuj k'uillabi gachun pushashkamiga.