5
1 Kununga wauki paniguna,
ima wata ima p'unllamundaga kangunamu escribinaga na ministirinchu.
2 Tutabi shuwa shamuj laya Mandajbuj p'unlla shamunadash kangunalladi ña alli yachanguichimi.
3 Shujkuna,
“Kununga ima manchimash illaki chulunllami kausagunchi,”
ninukuki,
ñash jatun llakiguna tukuchingu shamushaga,
iksa charij warmi mirungaj nanida japijma layaidimi tukunga.
Chigunamundaga nalladi mitiki pudingachu.
4 Ashtangarin,
wauki paniguna,
kangunaga na tutabi laya gashkamunda Pai shamuna p'unlla kangunadaga shuwa layaga na manchachingachu.
5 Tuki kangunaga p'alaniguj p'unllaj churi ushigunami ganguichi.
Na tutaj na ansaj ganchichu.
6 Shina gashkamundami ñukuchiga chaishujkuna laya na puñurinanchi,
ashtangarin rijchujkuna tuki alli yuyillandi gashunchi.
7 Puñujkunaga tutami puñun.
Machajkunash tutami machan.
8 Ashtangarin ñukuchiga p'unllaj gashkamundaga tuki yuyinmi jarkarijkuna gashunchi.
Soldado shina jerro churanada churarij layami Jesusta alli crisha k'uyashash,
cascoda churarij layami Jesús kishpichinada yuyillandi shuyasha kausashunchi.
9 P'iñasha llakichishka gachunga Diosga na agllagachu,
ashtangarin ñukuchij Mandaj Jesucristomunda kishpichishka gachunmi ñukuchida agllaga.
10 Rijcharishash puñushash Paiyun kausachunmi Jesucristoga ñukuchimunda wañuga.
11 Ima shinami kanguna ruragunguichi,
kaishuj chaishuj ñaubujmu katina yuyida kunukusha jinchiyachinukunguichi.
Alli kausachun yachachishkamunda
12 Wauki paniguna,
kangunapurabi jinchida trabajasha Manduj Diosbi yuyachisha pushujkunada allibi churachunmi mañanchi.
13 Paiguna allida ruragushkamundaga k'uyasha ʻAlli allimiʼ nina ganguichi.
Kaishuj chaishuj k'uillada kausichi.
14 Wauki paniguna,
kaigunada ruganchi:
imadash na rurajkunada rimichi,
mancharijkunamu ñaubujmu katina yuyida kuichi,
na jinchi crijkunada jinchiyachichi,
kangunash tukigunan na ut'ka p'iñarijkuna gaichi.
15 Yuyin ganguichi:
maijin ima na allida rurakish ama shinalladi ruranguichichu.
Chibuj randiga kangunapurabish shujkunamush p'unllandi tukigunan allida rurana yuyillan gaichi.
16 P'unllandijta kushilla gaichi.
17 Diosta mañanada amalladi sakichichu.
18 Tuki imamundash Diosta ʻDiosolopaiʼ ninguichi.
Cristo Jesusbi Diosbuj munashka kangunamu shinami gan.
19 Diosbuj Espirituj nina shinada ama wañuchinguichichu.
20 Dios nishkada parlujkunaj parlushkada na valichisha na uyush ninguichimu.
21 Imalla parlachishkagunadaga alli gashka na alli gashkada alli yuyarichi;
alligunaidami wakichinguichi.
22 Tuki laya millimunda anchurichi.
23 Alli k'uilla kausida kuj Dioslladi kangunada illijta linshuyachichun.
Paiga kangunaj tukida,
espiritudash,
almadash,
cuerpodash Mandaj Jesucristo shamuna p'unllagama pish na juchachibujta alli alli wakichichun.
24 Kangunada Kayajka tukida P'aktachijmi;
kaigunadash p'aktachingami.
Tukurina yuyigunamunda
25 Wauki paniguna,
ñukuchimundash Diosta mañichi.
26 Tuki wauki panigunadash alli yuyin ñawi ichibi muchasha saludichi.
27 Mandajbuj shutibi kai cartadaga tuki wauki panigunamu liyachun mingani.
28 Ñukuchij Mandaj Jesucristo kushka alliguna kangunabi gachun.