Kallari TESALONICENSES
Pablo saludashkamunda
1
1 Tesalónica pueblobi Taita Dioskun Mandaj Jesucristonbish tandanukushka crijkunamumi ñuka Pablomi Silvanon Timoteon Diosbuj kushka allish k'uilla kausish kangunabi gachun ninchi.
Tesalonicabi crijkuna alli crishkamunda
2 P'unllandijta tuki kangunamunda yuyarisha mañagushkabiga Diostaga ʻDiosolopaiʼ nigunchillami.
3 Kanguna crishkamunda alli rurashkagunada,
k'uyin imadash trabajashkada,
shinaidi ñukuchida Mandaj Jesucristobi yuyida churashkan ñaubujmu katigushkada alli yachashami p'unllandi ñukuchij Taita shinaidi Diosbuj ñaubuki kangunada yuyarigunchilla.
4 Dios k'uyashka wauki paniguna,
Pai kangunada agllashkadami yachanchi.
5 Na ñukuchij shimigunallan,
ashtangarin imadash ruri pudishkan,
Diosbuj Espiritun,
tuki shungun crishkanbishmi,
ñukuchi parlashka Alli Shimiga kangunamu shamuga.
Ñukuchi kangunan gasha kangunaj allibuj ima laya k'uyusha ruruj gashkada kangunalladi alli yachanguichimi.
6 Kangunaga ñukuchij,
shinaidi Manduj Jesusbuj rurashkagunada rikusha rurusha katishkanguichi.
Chimundami manchanaidi llakibi gagushash Diosbuj Espíritu kushida kushkan,
Alli Shimida japiganguichi.
7 Shina rurashami Macedonia Acaya llaktagunabi kausaj tuki crijkunamu alli katinada rikuchiganguichi.
8 Kangunamunda kallarisha Mandujbuj Shimiga na Macedoniallabish Acayallabish yachi chayashkachu,
ashtangarin tuki llaktagunabishmi kanguna Diosta crishkaga yacharishka gan.
Shina gakimi ñukuchi imada parlanash na ministirin.
9 Paigunalladimi kangunada rikungu riki ima laya ñukuchida kushilla japishkadash,
rurashka dioskunada sakisha kausuj kabishka Diosmu kuchuyasha Paibujllada rurungu kallarishkadash paigunalladimi parlanguna.
10 Shinaidi Dios kausachishka Paibuj Churi Jesús jawa pachamunda ima laya shamunada kanguna chapagushkadash parlangunami.
Shamuj llakichina p'unllamundaga Jesusmi kishpichin.