4
1 Chimunda Manduj Jesusbi chi yuyin jinchiguna gaichi.
Ñuka k'uyashka,
rikunachishkaidij wauki paniguna,
kanguna ñukada kushiyachijkuna,
ñukaj corona shina ganguichi.
Alli kausachun nishkamunda
2 Evodia,
Síntique,
kangunada rugani:
Manduj Jesusbi shuj yuyinlla tukubaichi.
3 Ñukan Diosbujta alli rurusha p'aktachij wauki,
a kai ishki warmigunada ayudachun kandami mañani.
Paigunami Clementen,
chaishujkunandij shinaidi ñukan,
Alli Shimi parlanabi jinchida rurujkunami.
Tuki paigunaj shutigunaga na tukurij kausana librobi apuntashka tiyan.
4 Manduj Jesusbi kushi gagüichilla.
b Kutin nini:
¡kushiyichi!
5 Kanguna alli apanukujkuna gashkada,
tukigunamu uyarishka gachun.
Manduj Jesusga ña kuchubimi.
6 Ama imabish kaida chaida yuyaringuichichu,
ashtangarin tukibi Dioskun parlanukusha,
ima ministishkada Paida mañusha ʻDiosolopaiʼ nichi.
7 Shina rurakimi pish na intindibujka Diosbuj chulunlla kausiga Cristo Jesusbi kangunaj shungudash yuyidash wakichingami.
8 Tukuchingaj wauki paniguna:
tuki na llullashkabi,
tuki valishkabi,
tuki kabishkabi,
tuki ima juchash illaj ganabi,
tuki k'uilla ganabi,
tuki ʻAllimiʼ nishka ganabi yuyichi.
Tuki yalliguna ganabi,
shinaidi jatunyachishka ganabish chi yuyin yuyichi.
9 Ñukamunda yachashkada,
japishkada,
uyashkada,
rikushkadash rurusha katichi.
Shinaidi k'uilla kausida kuj Diosga kangunan gangami.
Ofrenda k'uilla ashnariguj shinashkamunda
10 Kanguna ñukada kunun yuyarishkamunda Manduj Jesusbi manchanaidimi kushiyani.
Kangunaga ñukada yuyarishkanguichimi,
ashtangarin ima laya ayudi na pudishkanguichichu.
11 Kaidaga ministij gashkamundaga na nigunichu.
Ñukaga mashna charishkan kushilla gangumi yachashkani.
12 Imash illuj ganada,
yallida charisha kausanadash yachanimi.
Sajsashka ganada,
yarijin ganadash,
imada yallin charinada,
ministisha llakibi ganadash,
tukida tukibi amañarishkami gani.
13 Ñukada jinchiyachij Cristonga tukida pudini.c
14 Shinash ñuka llakibi gaki,
ñukan gasha allidami rurushkanguichi.d
15 Filipoguna,
ñuka Diosbuj Alli Shimida parlungu kallarishkabi Macedonia llaktamunda llujshiki kangunallami kuchkida kuganguichi,
chaishuj iglillagunaga nimadash na kugagunachu.
Chidaga yachanguichimi.
16 Tesalónica pueblobi gakish ñuka ministishkabujka kutin kutinmi kachaganguichi.
17 Kumbidashkada japingullaga na nigunichu,
ashtangarin kanguna yallin charijkuna gachunmie munani.
18 Ñukaga ñami tuki ministishkada japishkani,
shinaidi yallidashmi charini.
Kanguna ñukamu kuchun nisha Epafroditomu kachashkangarin yallishmi charini.
Kanguna kushka ofrendaga k'uilla ashnariguj shinami,
Diosta kushiyachij japinalla sacrificio shinashmi gan.
19 Shinaki ñukaj Diosga,
Pai charishka manchanai k'uillagunada,
kanguna tuki ima ministishkadash Cristo Jesusmunda kunga.
20 Ñukuchij Taita Diosta na tukuribujta ʻ¡K'uilladimi gangui!
ʼ nishka gachun.
Chashna gachun.
Tukurina yuyigunamunda
21 Ñukamunda Cristo Jesusbi linshuyachishkagunada saludanguichi.
Ñukan gaj crijkunashmi saludanguna.
22 Mashnalla kaibi Dios linshuyachishkagunash yallidijka Romada jatun mandujbujta rurajkunashf saludanmi.
23 Manduj Jesucristo kushka alliguna tuki kangunaj espiritun gachun.