Cristoda rijsingu nishkamunda
3
1 Shinakiga kununga,
ñukaj wauki paniguna,
Manduj Jesusmunda kushilla gaichi.
Kangunamu ña escribisha kachushkada kutinlladi escribinash ñukamuga ima p'iñarinash na ganchu,
ashtangarin kangunaj allibujmi.
2 Achku shinagunamunda,
a millida rurujkunamunda,
cuerpoda p'itichichijkunamundashb yuyin puringuichi.c
3 Ñukuchimi,
Diosbuj Espiritun Paida ʻAllimi ganguiʼ nij,
Cristo Jesusbi kushiyarij,
shinaidi kai aichabi rurashkagunabi na yuyida churajkuna circuncidashkagunagad ganchi.
4 Aichabi imada rurashkallan alli gangaj gakiga,
¡ñukash chi yuyin gai pudinimumi!
Maijinsh aichabi ima shina gashkallan alli rikurisha nikiga,
ñukagarin yallimi gani:
5 Wacharishkamunda pusuj p'unllabi circuncidashka,
shinaidi israel gente,
Benjaminbuj familia,
hebreogunadash yalli hebreomi gani.
Moisés mandashkada p'aktachina partibiga fariseomi gagani.
6 Chida p'aktachingudi nishami crijkunadaga katik'ichusha llakichij gagani.
Shinaidi chi leyda kazuna partibiga pish na juchachibujmi gagani.
7 Kai tukiguna sarun ñukamunga tukida yalli valijkunaga kununga Cristomundaga imakish na valijmi gashkada yuyani.
8 Na chillashchu,
ashtangarin ñukada Manduj Cristo Jesusta rijsina tukida yalli k'uidi gakimi,
ñauba ñukamu alligunadaga tukida chingachij laya shitagani.
Cristomundami tukida chingachini,
Paibuj gangajka imakish na valij mapada laya shitani,
9 shinaidi Paigun shujlla gangaj.
Leymundaga ima juchachinash illuj rurashkaga na ganichu,
ashtangarin Cristoda crijllabimi ima juchachinash illuj rurashkaga Diosmunda Paida crishkallamundami shamun.
10 Ñukaga Cristoda rijsingu,
Paida kausachibi gaj poderda rijsingaj,
Pai apashka laya llakigunada apangaj,
Pai wañibi ima laya gashka,
shinami ñukash Pai laya tukusha nini.
11 Shinashaga wañushkagunamunda kausachishka ganadami shuyaguni.
Japingaj chayana yuyin rinamunda
12 Ñukaga ʻTukidami japishkani,
ña tukibimi yalli alli ganiʼ nishaga na ninichu,
shinash chida p'aktungu nisha ñaubujmu katigunilla.
Chibujmi Cristo Jesusga ñukada japiga.
13 Wauki paniguna,
ʻChayana gashkamu ñami chayaniʼ nishaga na ninichu,
ashtangarin kailladami ruraguni:
washamu sakirishkadaga kungarisha,
ñaubujmu gajta japingaj jinchi katigusha,
14 Dios kumbidashkada japingaj chayana yuyin rigunillami.
Chi jawa pachabi allida japichunmi Diosga ñukada Cristo Jesusmunda kayusha aglluga.
15 Shinushaga tuki jinchi crijkunaga chi yuyin gashunchi.
Shuj yuyin kanguna tukukiga Diosmi intindichun rikuchinga.
16 Tukimunda yalliga,
ima laya ña p'aktashkamundaga chiyun kausashunchi.
17 Wauki paniguna,
ñuka laya katichi.
Shinaidi ñukuchi ima laya yachachishka shina kausujkunada rikusha alli katichi.
18 Shina gakish tauga kutin rimugani,
shinaidimi kununbish iki ñawinmi nini:
Cristo cruzbi wañushkada na rikunachijkunagae taugagunami puringuna.
19 Shina gentegunaga chingachishkami ganga.
Diosta k'uyana randiga mikunallada yalli k'uyanguna,
shinaidi pinganaida rurashash ashtan chiyun jatun tukunguna.
Imalla kai pachabi tiyajlladami yuyanguna.
20 Ashtangarin ñukuchiga jawa pachajmi ganchi.
Shinaidi chi pachamunda ñukuchida Kishpichij Manduj Jesucristo shamunadami shuyanchi.
21 Ñukuchij na valij ismujlla aichadaga shujtijyachishami Paibuj cuerpomu rijchij k'uidijta ruranga.
Chidaga Pai imalla tiyashkagunada mandi pudinada charishkanmi Pailladi shina rurunga.