EFESIOS
Pablo saludashkamunda
1
1 Dios munashkamunda Jesucristo agllusha kachushka Pablomini;
Éfesoa pueblobi Cristo Jesuskun tandanukushka na shaikurishalla katij linshuyachishkagunamumi escribini.
2 Ñukuchij Taita Dios Manduj Jesucristosh k'uyasha alligunada k'uilla kausidash kangunamu kuchun.
ʻCristollabi alligunada japinchiʼ nishkamunda
3 Ñukuchida Mandaj Jesucristoj Taita Diosta ʻAllimi ganguiʼ nishunchi.
Criston tandanukushka gashkamunda espiritumu tuki laya alligunada jawa pachabi layaidib ñukuchimu kushka.
4 Shinaidi kai pachada narikish rurushaidimi Paibuj ñaubuki ima juchash illij linshuyachishka gachun nisha,
Jesucristobi ñukuchidaga aglluga.
Diosga k'uyushkamundami,
5 Pai ima munashkada alli p'aktachingu ñukuchidaga Jesucristomunda Paibujti wawaguna tukuchun nisha,
ñaubamundadi ch'ikunyachishka.
6 Shinushami Pai k'uyashka Churimunda ñukuchimu na kabikish kushka alliguna k'uitij gashkada ʻAllimiʼ ningu pudijllagunada ruraga.
7 Paimundami manchanaidi k'uyasha alligunada kushkan juchagunamunda perdonashka shinaidi Paibuj yaur jichashkamunda kishpichishka ganchi.
8 Pai tukida yachuj yuyisapaidi gasha chi kushka alligunada yallimanaidi kushami,
9 pish na yachushka Pai rurush nigushkadaga ñukuchimumi yachi chayachiga.
Chidaga Dios munashka shina ñaubarijtimi Cristomunda allida rurungu yuyashkaga.
10 Shina yuyushkagunada rurana p'unllaguna p'aktuki Cristolla mandachun churangajmi jawa pachabi imalla tiyashkada kai pachabi imalla tiyashkadash illujtada tandachinga.
11 Shina layaidi Paiyundi tandanukushkamunda ñukuchikish Diosmunda japinashkada charichunmi,
Diosga ñaubamundadi Pai rurungu yuyushka shina ñukuchida ch'ikunyachiga;
imallada rurasha Pai munashkada shinaidi Paimu alli rikurishkadami ruran.
12 Ñukuchidi ñaubusha Cristobi shuyagujllaguna gashkamunda,
Dios k'uilla gashkada tukiguna ʻAllimiʼ nichunmi shina rurushka.
13 Kangunash Paillabidimi kabishka parludaga kangunada kishpichina Alli Shimida uyusha Cristobi crishkamundami Diosbuj ʻKushamiʼ nishka jucha illuj Espiritun selloda churashka shina gaganguichi.
14 Diosga Paibujllagunada kishpichingagama Paimunda japina gashkada p'aktachingudi nisha ñaubachisha kushkaga chi Espiritumi gan.
Pai k'uilla gashkada ʻAllimiʼ nichunmi gan.
Crijkunamunda Pablo Diosta mañushkamunda
15 Chigunamundami ñukaidikish,
kanguna Mandaj Jesusta crishkamunda shinaidi Diosbujlla gaj tukigunan k'uyanukushkamundash uyushami,
16 Diosta mañagüi ratu kangunamundash ʻDiosolopaiʼ ninada na sakishalla kangunada yuyarisha,
17 ñukuchij Mandaj Jesucristoj Dios,
k'uilla gashka Taitaga,
Paimunda ashtan ima laya gashkada rijsij tukuchun yuyisapaidi ganada ruruj kabishkada rikuchij Espiritudaga kangunamu kuchun mañani.
18 Kangunaj yuyidash p'unllayachij shina paskachunmi mañani.
Shina paskakimi kangunaga imada shuyangaj kayushka gashkadash,
Dios Paibujlla gajkunamu kuna gashkaga tukida yalli k'uilla munanaidi gashkadash,
19 shinaidi Paibuj tukida ruri pudishkaga pish na jarki pudibuj manchanaidi jatun poderga ñukuchi crijkunaj allibuj gashkadash yachunguichi.
Kashna pachundi ruri pudishkaga tuki jursanmi
20 Cristobi rurariga;
Paidaga wañushkagunapuramunda kausachisha shinaidi jawa jawa pushtugunabi Paibuj alli ladumu tiyachisha,c
21 tuki jatun mandujkunaj,
mandanada charijkunaj,
poderda charijkunaj,
milli espiritugunaj,
kai pachabi tuki imalla tiyashkaj jawa jawabidimi mandachun churuga;
na kunun p'unllagunajllash ashtanbish shamuj p'unllagunakishmi gan.
22 Shinaidi imalla tiyajtash illujta Cristoj chaki sarunabi churushami Paidaga tandanukushka crijkunamush kusha uma shina tukida mandachun churuga.
23 Tandanukushka crijkunaga Cristoj cuerpo gashami tukibi tukida jundachiki Paiyun illujtada jundashkaguna tukun.