Crijkunapura ayudanukunamunda
6
1 Wauki paniguna,
maijindash juchabi gajta japishamaga kanguna Espiritun gajkunaga na takush nij yuyin alli tukuchun ayudanguichi.
Kikinlladadi yuyasha p'akta kambish pandachishkama tukunguimu.
2 Kaishujbuj chaishujbuj aparinagunada aparinukujkuna gaichi;
shina rurushami Cristo mandushkada p'aktachinguichi.
3 Maijinsh imash na gashash ʻJatunmi ganiʼ nisha yuyashaga paillamundimi llagmarin.
4 Shinakiga tukigunami kikinbuj rurashkalladadi allichushka na allichushkadaga alli yuyarichun.
Shina gashami na shujkuna ima rurushkabichu ashtangarin kikinllamundadi imamunda jatunyarina tiyakiga jatunyarisha,
ʻAlliminiʼ ninga.
5 Shinushaga tukigunami kikinbuj aparinashkalladadimi apusha rinagun.a
6 Diosbuj Shimida maijinsh yachagujka paida yachachijmu ima alligunada charishkamunda kunukuchun.
7 Kangunallamundi ama llagmanguichichu;
Diosga asishka naidi gai pudinchu.
Shuj k'ari imada tarbun chilladadimi japinga.
8 Maijinsh kikinbuj aichamu tarbujka aichamu tarbushkamundaga wañidami siguj shina japinga.
Ashtanbish maijinsh Espiritumu tarbujka Espiritumunda ima urash na tukurij kausidami japinga.
9 Shinushaga allida ruranagunadaga ama shaikurishunchi.
Shina na killanachishaga japina p'unlla chayuki siguj shina japishunmi.
10 Shinushaga ima ura pudishaidijka tukigunamu,
yallidijka crij wauki panigunamumi allida rurushunchi.
Tukurina yuyigunamunda
11 ¡Ima laya jatun letragunan ñukaj makinlladi escribigushkada rikichi!
12 Gentegunallamu allibi rikuringu munushallami ʻAicha karada p'itichinaidimigunʼ nisha atirigundijkuna;
kaigunaga Cristoj cruzbuj kauzamunda ama katik'ichushka gangullami shina puringuna.
13 Aicha karada p'itichishkagunaidikish mandashkabi nishkadaga na p'aktachijkunachushka.
Ashtanbish kanguna aichabi p'itishka gakimaga ʻAllimi ganchiʼ ningajllami aicha karada p'itishka tukuchun ninguna.
14 Shina gakish ñukaga ʻYallimi ganiʼ nina yuyida nalladi nishkanimu;
ashtangarin ñukuchij Manduj Jesucristobuj cruzllamundami ʻAlli ganiʼ nini.
Kaimundami kai pachaga chakatashkama shina ña imash na imachugun.
Shinaidi kai pachajka ñukash wañushkama laya ña imash na ganichu.
15 Aicha karada p'itichishkash na p'itichishka gashkash imakish na valinchu.
Ashtangarin mushujyachishka ganami valin.
16 Kaigunabi mandushka shina tuki purijkunamu shinaidi Diosbuj israelgunamundikishb k'uilla kausish Dios llakishkash paigunan gachun.
17 Ñukaj cuerpo Jesusbuj gashkamunda chugrishkagunada alliyashkadami charini;
shinusha kununmunda ichimunga ñukada pish ama llakichichun.
18 Wauki panigunalla,
ñukuchij Mandaj Jesucristo na kabikish kushka alligunaga kangunaj espiritun gachun.
Shina gachun.