Watushka shina kutin na tukunamunda
5
1 Cristoga ñukuchi ama watushka shina kausachunmi chi watushkamunda kacharichiga.
Shinakiga Pai kacharichishkallabidi alli katinguichi.
Yugobi watashkaguna shinada rurachun kutin mandushkallabidijka ama gaichichu.
2 ¡Uyichi!
Ñuka Pablomi kaida nini:
Kanguna circuncisiondaa rurachiki Cristoga kangunabujka ima allibukish na ganmuchu.
3 Shinaidi kutinlladi maijin k'arish aicha karada p'itichijmunga yachi chayachisha nini:
mandushkadaga illujtadadimi p'aktachina gan.
4 Maijingunaga mandushkada p'aktachishkan jucha illuj tukusha nijkunaga Cristomunda partirisha Diosbuj k'uyimundashmi anchurishkanguichi.
5 Ashtanbish ñukuchiga ima juchachinash illuj tukuna yuyilla gasha Espiritumunda Diosta crisha shuyagunchilla.
6 Cristo Jesuskun shujlla tukushka gakiga aicha karada p'itichishka na p'itichishka gakish imash na imachugun.
Ashtangarin crishkami shujkunada k'uyasha rikuchiki yallidijka valin.
7 Kangunaga allimi katiguganguichi.
Kai kabishka parlushkada ama kazuchunga ¿pidi jarkuga?
8 Shina crichishkaga kangunada kayuj Diosmundaga na shamugachu.
9 “Ashalla levadurami tuki masushkadaga p'unguichin,”
ningunami.
10 Shinaidi kanguna shujtij layada na yuyanashkadaga Mandujbimi crini.
Shinash kangunada pandachisha purijtaga maijinda gakish Diosga llakichingami.
11 Wauki paniguna,
ñukamunda parlukiga ʻAicha karada p'itichinaidimigunʼ nisha parlusha katigushkashaga ¿imashti chairijti katik'ichushka gani?
Ñuka shina parlush katigushkamakiga cruzmunda parlushkash paigunada ña na p'iñachinmuchuga.
12 Kangunada shina pandachigujpanaga,
¡paigunajtari illujta p'itirishachari allimash ganmu!
13 Waukiguna,
kangunagarin na watushka shina gangumi kayashka gaganguichi.
Shinash ʻÑa na watushka shina ganchichuʼ nishaga aicha munushkada rurungu ama yuyichi.
Chibuj randiga k'uyanukusha kaishujkun chaishujkun allida ruranukujkuna gaichi.
14 Mandashkaguna illujta shujllamu tandachisha nikiga nin:
“Shujkunadash kikinda layaidi k'uyungui.”b
15 Yuyin gaichi,
kaninukusha kaishujkun chaishujkun mikunukushamagac kangunapuralladi tukuchishtanguichimu.
Aichaj ruranagunash Diosbuj Espirituj ruranagunash
16 Chimundami kaida nini:
Espiritullamunda kausichi;
chibimi kikinbuj aicha munushkagunada nalladi p'aktachinguichi.
17 Ashtangarin aicha muniga Espiritudaga jarkachijmi.
Shinaidi Espiritubish aicha munushkadaga jarkachijmi.
Shinusha kaigunaga randimunda na allibi churanukukimi kanguna munushkagunaida na rurachin.
18 Shinusha Espíritu pushashka gashaga ña na mandushkagunalla rurachishka kausanguichichu.
19 Aicha muniida ruranagunaga rijsilladigunami gan.
Chigunaga:
wainayana,
piyunbish siririna,
imabish millanaida rurana,
aicha munida na jarkarina,
20 rurushka dioskunada adorana,
brujuna,
p'iñanukuna,
rimanukuna,
shujkun rijta rikusha p'iñarina,
jawalladi p'iñarina,
p'iñanukibi churana,
ch'ikunyarichun chaubinchina,
shujtijta yachachina,
21 shujbujta munana,
wañuchina,
machana,
pishtagunabi maidash gachun rurana,
shina layaidi shujtij na alli ruranagunashmi gan.
Tuki kaigunamundaga ñuka kangunamu ña parlushka gakish kutinmi nini:
Kai shina na allida rurusha purijkunaga Diosbuj mandanabiga ima rikunadash na charingachu.
22 Ashtangarin Espiritumunda granoga kaigunamigun:
k'uyana,
kushidi gana,
chulunlla kausi,
na p'iñarijlla gana,
tukin allida rurana,
alli shungu,
p'aktachijti gana,
23 na jatun tukuna,
na alli ruranamunda jarkarinashmi gan.
Chigunada jarkanaga ima mandushkamash na tiyanchu.
24 Jesucristoj gajkunagarin kikinbuj aichadaga milli yuyigunandi na alli munigunandi ñami chakatashkaguna.
25 Espiritumunda kausagushadijka,
Espiritulladi pushachun sakishunchiri.
26 Ñukuchipuraga shujbujta munusha wañurisha kaishujkun chaishujkun p'iñanukuchisha ama jatun tukushunchi.