Mandushkamunda na gashaga crinamunda
3
1 ¡Galacia crijkunalla,
yuyi illujmi ganguichi!
¿Pidi kangunadaga muspayachigari?
Jesucristo chakatashkada kangunaj ñaubukidi rikuchishkama laya ñami parluganchi.
2 Kailladami kangunamunda yachungu munani:
¿Mandushkada p'aktachishkamundachu?
na gashaga ¿uyusha crishkamundachu Diosbuj Espiritudaga japiganguichi?
3 ¿Yuyi illujchumadi ganguichi?
¿Espiritun kallarishka jawash kununga aicha ruri pudishkallanchu p'aktachingu munanguichi?
4 ¿Imadadikish pasushkaga yangallachu?
¡Yangadijmaga na gashkachunga!
5 Dios Paibuj Espirituda kusha shinaidi pi na ruri pudishkada kangunapurabi rurushaga ¿mandushkada p'aktachishkamundachu shina rurun?
Ashtan uyusha crishkamundami gan.
Abrahamgun Dios ari nishkamunda
6 Shina layaidimi,
“Abrahamgaa Diostami criga,
shinushami Diosga ima juchachinash illujmada shina japiga.”b
7 Shinushaga kaida yachichi:
Abrahambuj wawagunaj wawagunadijka Diosta crijkunami gan.
8 Sarunmundadi Dios escribichishkabiga ʻNa israelgunash Diosta crikiga ima juchachinash illajta rurungamiʼ nishkamiga.
Shinusha kai Alli Shimidaga,
“Tuki llaktagunami kanmunda Diosbuj alligunada japinga,”
c nisha Abraham-mumi ñaubarijti ña parlushkaga.
9 Chimunda,
crij Abraham-mu alligunada kushka shina,
mashnalla crijkunamush kushkami ganga.
10 Mandashkagunada ruranallabi tuki mashnalla yuyida churujkunaga ʻLlaki tukushkanmuʼ nishkabimi ganguna;
shinusha escribishkabiga,
“Mandashka librobi escribishkagunada ruragusha na illujta p'aktachijkunaga,
ima llakish tukushkanmu,”
nishkami tiyan.
11 Shinakiga Diosbuj rikibiga mandashkabi nishkagunada rurashkanga ima juchachinash illujmaga pish na ganchu;
shinusha,
“Juchachinash illujka crishkallamundami kausunga,”
d nishkaga.
Chiga laruidimi gan.
12 Shinash mandushkaga crishkamundaga na shamunchu;
ashtangarin,
“Maijinsh mandushkabi nishkagunada p'aktachijka chigunamundami kausunga,”
e ninmi.
13 Mandushkagunada na p'aktachishkamunda llakichinalla gakimi Cristoga ñukuchij randi,
pachun llakida apasha kishpichiga.
Chimunda Dios escribichishkabiga,
“Maijinbish kaspibi warkushka wañujka ʻllaki tukushkanmuʼ nishkami gan,”
f nin.
14 Abraham-mu Dios alligunada ʻKushamiʼ nishka na israelgunamush Jesucristomunda kushka gachun shinaidi crishkamunda ñukuchikish ʻKushamiʼ nishka Espirituda japichunbishmi shina tukuga.
15 Wauki paniguna,
kaidaga maijin gentesh intindinalladami parlasha.
Gentegunapurallabish imadash rurungu,
ña ari ninukusha firmanukushka k'ipaga mirachinamash ʻNa valinchuʼ ningumash pish na pudingachu.
16 Kununga shinakiga,
Diosga Abraham-mu ʻKushamiʼ nishkagunadaga paibuj wawagunaj wawamushmi nishkaga.
Shina escribishkabiga,
taugaidi wawagunamamu layaga na nigunchu;
ashtangarin ʻkambuj wawamumiʼ nishaga shujlladami nigun.
Paiga Cristomi gan.
17 Kaidami nisha nini:
Diosga Abrahamgun ari ninukushkadaga ña ʻP'aktachishadimiʼ nishkamiga.
Chimundami Moisesbuj mandushkagunaga chusku patsaj kinsa chunga (430) wata k'ipa shamushkashaga shina ari ninukushkadash na chingachinllachu,
Dios ʻKushamiʼ nishkadash yangabiga na churi pudingachu.
18 Diosmunda japinashkaga mandashkagunada kazushkamunda gashkakiga ʻKushamiʼ nishkamundaga ña na ganmuchuga.
Ashtangarin Diosga Abraham-mu ʻKushamiʼ nishkamundaga kumbidagallami.
19 Shinakiga ¿mandushkagunaga ima allibujti gan?
Genteguna na kazuj gashkada rikuchingaj chi mandushkaga paltushka gaga;
Dios ʻKushamiʼ nishkada japingu gaj wawadi shamungagamami chidaga kuga;
shuj mañusha kuj Moisesbuj makibimi angelgunada kuchiga.g
20 Shuj gentella gakigarin mañusha kujmash na tiyanash kabinchu.
Shinash Diosgarin shujllami gan.
Mandushkaga ima allijti gashkamunda
21 Shina gakiga mandushkagunaga Dios ʻKushamiʼ nishkagunadaga ¿shujtijtadichu nin imadi?
¡Nalladij shinachugun!
Mandashkagunaga kausida kui pudij gashkakiga chi mandushkada kazushkallamundami ima juchachinash illuj tukungunamuga.
22 Ashtangarin Dios escribichishkabi nishka shinaga,
juchaga tuki ima tiyashkagunada illujtada prezu shina charigun.
Mashnalla crijkunaga Jesucristoda crishkallamunda Dios ʻKushaʼ nishkadaga japichunmi shina nin.
23 Shina gakish crina narij chayamukiga Mandushkaga chi crinada yachi chayachishka gachunmi ñukuchida ichkushtasha prezu layada chariguga.
24 Shinusha ñukuchi Cristobi criki ima juchachinash illujta rurushka gachunmi Mandashkaga ima layami shuj sirvijka marada iñachij gan shinaidimi Paibujmu pushaj gaga.
25 Shinash crina p'unlla chayamushkamundami,
iñachisha sirvijbuj ukubi ña na ganchichu.
26 Cristo Jesusta crishkamundami tuki kangunaga Diosbujti wawaguna ganguichi.
27 Shinaidi mashnalla Cristobi bautizarijkunaga Cristobimi churarij shina churarishkanguichi.
28 Israel ganash griego ganamash ña na tiyanchu;
watushka laya na watushka layamash,
k'arish warmish illunmi;
tuki kangunami Cristo Jesusbi shuj shinalla ganguichi.
29 Ña Cristoj gashami Abrahambuj wawagunaj wawagunadi ganguichi,
shinaidi Dios ʻKushamiʼ nishkadash japijkunami ganguichi.