9
1 Linshuyachishkagunamu sirvinamundaa escribisha katinaga na ministirinchu.
2 Kanguna tuki munin kuna yuyida charishkadaga rijsinimi.
Macedonia llaktabi kausujkunamunga ʻAcaya llaktamunda crijkunagab pasuj watamundadimi ayudangu gangunaʼ nisha kushidi parlagani.
Chi tuki munin gashkada uyushagarin chaubi yalli macedoniagunami manchanaidi kushiyasha ayudangu kallarigaguna.
3 Shina gakish kangunamunda ʻKungagunamiʼ nisha parlushka ama llagmashka gachun,
ashtan ñuka nishka layadi kanguna kunada tandachisha kachanalla chapachunmi kai kinsa waukigunadaga kachani.
4 Maijin macedoniamundaguna ñukan kangunajmu risha,
narij tandachishkada japikiga,
ñukuchi kangunamunda ʻKungagunamiʼ nisha parlushkamundaga pinganaimi gashun,
yallidijka kanguna.
5 Chimundami kai waukiguna ñaubusha kangunajmu richun ruganaidi tukugani,
kanguna sarun ʻKushunllamiʼ nishka kuchkida tandachichisha kachanalla gachun.
Shinami kangunaj tandachishkaga na mandushkamunda gangachu,
ashtangarin kungujti munusha na mitsashalla kushkami ganga.
6 Ashallada tarbujka ashalladami japin;
mirgada tarbujka mirgadami japin.
c Chida yuyaringuichi.
7 Kushilla kujtaga Dios k'uyujmi.
Shinushkamunda maijinsh kushaga na llakirishalla,
na mandujllabi,
ashtangarin kikinbuj shungun ña kungu yuyashkadami kuchun.
8 Diosga kanguna maibi gashash tuki ministishkada charichun,
shinaidi ashtanbish yallijta tuki laya alli ruranagunabi p'unllanda ayudachunmi tuki kushka alligunada kangunamu mirachi pudin.
9 Dios escribichishkabiga,
“Paibuj charishkadaga na charijkunamu rakisha kun.
Paibuj chi kabishka ruranaga nalladi tukuringachu,”
d nin.
10 Tarbuchun muyudash,
mikuchun mikunadash kuj Diosga kanguna tarbuchun muyuda mejorda kunga,
shinaidi alli granu shinagunada pachun kushaga kangunaj kabishka ruranada mirachinga.
11 Kangunaj charishkada tuki shungun shujkunamu kuchunmi Diosga tuki layagunada charichun ruranga.
Kanguna tandachishkada ñukuchi kuchun kachushkamundaga paigunaga Diosta ʻDiosolopaiʼ ningagunami.
12 Kanguna,
linshuyachishkagunamu ayudasha kushkaga na paigunaj ima ministishkamunda p'aktachingulla ganchu,
ashtangarin Diosta tuki shungun tauga kutin paiguna ʻDiosolopaiʼ nichunbishmi gan.
13 Kanguna parlagushka Cristomunda Alli Shimida kazusha,
na mitsushalla paigunamu tukigunamush kujkuna gashkamunda,
shina sirvishkada paiguna rikushaga,
Diosta ʻAllimi ganguiʼ ningaguna.
14 Shinaidi Dios kushka alligunada kanguna manchanaidi japishkamundaga kangunamunda paiguna manchanai llakisha Diosta mañungami.
15 Shimillan imadash na ni pudishka kumbidashkamundagae Diosta ʻ¡Diosolopai!
ʼ ninchi.