Na mitsushalla kunamunda
8
1 K'uyashka wauki paniguna,
Macedonia llaktabi iglillagunamua Dios kushka alligunadab ima laya rikuchishkadami kununga kangunamu parlungu munanchi.
2 Paigunaga jatun llakigunada pasushash kushillagunami gan;
imash illujkuna gashash ashtan tuki shungun na mitsushalla kugaguna.c
3 Paigunaga kungu pudishkada kushash,
ashtan yallinbish kushilladi kujkunada ñukadimi rikugani.
4 Paigunalladimi ʻLinshuyachishkagunamu ñukuchish kusha ayudachun valichibaichiʼ nisha kutin kutin ñukuchida rugugaguna.d
5 Ñukuchiga ʻAshalladami kungaʼ nisha yuyaganchimi;
shinash ashtan yallidami kugaguna,
kallarimunga paigunaidi Manduj Jesusmu,
chi k'ipaga Dios munashka shina ñukuchimu.
6 Sarun ima laya kanguna kushkada Tito tandachingu kallariga,
shina layaidi kushka alligunada tandachisha tukuringagama katichun paida ruguganchi.e
7 Kangunagarin,
ima laya tukibi yalli ganguichi:
crishkabi,
k'uilla rimashkabi,
yachashkabi,
shujkunada ayudangu munushkabi,
ñukuchida llakishkabish,
shinaidi kushka alligunabi kungu ashtan yalliguna gaichi.
8 Kaigunada nishaga na mandagunichu,
ashtangarin shujkuna ima laya kujkuna gashkada alli yachushaga,
kangunash divirti k'uyida charishkada rikuchichun niguni.
9 Ñukuchij Mandaj Jesucristo kushka alligunadaga yachunguichimi.
Paiga tukida charij gashash ashtan kangunada k'uyasha imadash na charij tukuga.
Pai shina laya tukushkamunda kanguna charijkuna tukuchunmi shina ruruga.
10 Ñuka yuyachishkadaga kangunaj allibujlladimi kashna nini:
Chaishuj watami kanguna,
tukigunada ñaubusha na kungajllaga kallariganguichichu,
ashtangarin tuki muninbishmi kallariganguichi.
11 Shinakiga,
kanguna tuki munin imalla charishkada kungu kallarishkadaga chi yuyillandi kununbish pudishkada rurusha tukuchichi.
12 Maijinbish alli munin kungu munakiga Diosga imada na charishkamunda kuchun na mañan,
ashtanbish ima charishkamunda kukiga alli japishkami ganga.
13 Shujkunada ayudashkamunda kanguna imash illuj tukuchunga na ganchu,
ashtangarin kangunash paigunash igul gachunmi gan.
14 Kanguna kunun mejorda charishkamundaga ministijkunamu ayudanami ganguichi.
Shuj p'unlla kanguna ministikimaga paigunash mejorda charishaga kungallami.
Shina rurushami igul ganguichi.
15 Dios escribichishkabiga,
“Mirgada tandachijmush na puchugachu;
ashallada tandachijmush na jualtugachu,”
f ninmi.
Titoda shujkunandij Pablo kachashkamunda
16 Kangunada ñuka llakishka layaidi Titosh llakishkamunda Diosta ʻDiosolopaiʼ ninimi.
17 Kangunada rikungu richun ñuka mingakiga ʻAriʼ niga.
Pailladi rikungu rina munida charishkamundaga kushilla rigun.
18 Paiyunmi shuj crij waukida kachunchi.
Paiga Alli Shimida parlushkamunda mashnalla Diosbuj tandanukigunabi alli uyarishkami.
19 Shinaidi,
tandachishka kuchkida apasha rinabi,
ñukuchin richun paidaga tauga iglillagunami aglluga.
Kai tandashkanga Manduj Dios jatunyachishka gachung shinaidi ñukuchi ayudana munida charishkada rikuchingajmi ruranchi.h
20 Kai na mitsushalla kushka kuchkida ñukuchi ima laya allibuj rurashkada ama pish juchachichun munanchi.
21 Ñukuchiga na Manduj Diosbuj ñaubujllabi,
ashtangarin gentegunaj ñaubukish kabishkada rurasha katigunchi.
22 Chi ishki waukin ñukuchij chaishuj waukidash kachanchi.
Paidaga tauga kutin kaida chaida alli rurajtami rikuganchi.
Kunungarin kangunabi tuki yuyida churashkamundaga ashtanmi rurana yuyin gan.
23 Titoga ñukan apanukujmi shinaidi kangunaj allibuj ñukan rurusha purijmi.
Kutin chaishuj waukigunaga crijkunaj tandanukigunamunda kachushkaguna,
shinaidi Cristoda jatunyachijkunami.
24 Chimunda tuki tandanukushka crijkuna yachachunga kanguna divirti k'uyujkuna gashkada,
imamunda ñukuchi kangunada ʻAlligunami ganʼ nishkadash kai chayujkunamu rikuchichi.