2
1 Chimundaga kangunada ama kutin llakichingujka na ringumi yuyarigani.
2 Ñuka kangunada llakichikiga ¿pidi ñukadaga kushiyachingari?
Ñuka llakichishkagunalladimi kushichij ganguichi.
3 Shinushaga kangunajmu ñuka chayuki,
kanguna ñukada kushiyachinaguna ama llakichichunmi escribisha kachugani,
ashtan tuki kangunada yuyasha ʻÑukaj kushin kushiyangagunamiʼ nisha chi yuyin gagani.
4 Chida escribigushaga,
manchanaidi llakirisha iki ñawin wakugani.
Kangunada na llakichingu,
ashtangarin kangunada manchanaidi k'uyashkada rikuchingajmi shina escribigani.
Perdonanamunda
5 Maijinsh ñukada llakichijka na ñukallada llakichishkachu,
ashtanbish ashadaga tuki kangunadashmi llakichishka.
Shina nishaga na yallinga nigunichu.
6 Chi na alli rurujtaga taugaguna llakichishkaga,
¡ña chilla gachun!
7 Ashtanbish manchanaidi llakirisha yalli llakin ama tukurichunga perdonashaa alli kushiyachisha ayudanami ganguichi.
8 Chimunda kanguna kutin llakishkada paimu rikuchichun mañani.
9 Ñuka yachachishkada divirti tukida alli kazusha katigushkada yachungajmi chaishujtaga escribigani.
10-11 Maijinda kanguna perdonakiga ñukash perdonanimi.
Kangunaj allibujmi Cristoj ñaubukib ima perdonana tiyashkadaga Satanás imabish ñukuchida ama pandachichunmi perdonagani.
¡Pai pandachina yuyigunada charijtaga allimi yachanchi!
Troasbi Pablo llakilla gashkamunda
12 Troas pueblobi Cristomunda Alli Shimida parlungu chayukiga Manduj Dios punguda paskuga.
13 Shinash wauki Titon na tupanukushkamunda ñukaj yuyiga na samagachu.
Chimunda chi crijkunada ʻShuj p'unllagamachiʼ nisha Macedonia llaktamu rigani.
Criston vincinamunda
14 Criston vincigujkunada rurushkada rikuchisha ñukuchida pushuj Diosta ʻDiosolopaiʼ ninimi.
Cristomunda yachanaga,
k'uilla ashnaj shinami tuki ladugunabi ñukuchimunda yacharishka gagun.
15 Ñukuchiga kishpichishkagunamush chingarijkunamush,
Cristomunda Diosmu kushka k'uilla ashnarigujkunami ganchi.
16 Chingarijkunamunga,
wañimu apaj wañushka ashnarij layami ganchi;
c kishpichishkagunamunga kausida kuj k'uilla sami shinami ganchi.
Chashna ruranadaga ¿pidij p'aktachingu pudinga?
17 Ñukuchiga na shujkuna shina imadash japina yuyillanga Diosbuj Shimidaga parlagunchichu,
ashtangarin Dios kachashka gashkamunda shinaidi Criston shujlla tukushka gashkamundashmi na llullushalla Diosbuj ñaubuki alli parlagunchi.