K'ipa CORINTIOS
Pablo saludashkamunda
1
1 Dios munashkamunda Cristo Jesús Paimunda parlachun agllusha kachushka Pablomi wauki Timoteondij Corinto pueblobi Diosbuj tandanukushka crijkunamu,
tuki Acaya llaktabi gaj linshuyachishkagunamush escribinchi.
2 Ñukuchij Taita Diosbuj shinaidi Mandaj Jesucristoj kushka allish k'uilla kausish kangunabi gachun.
Diosga ñukuchida kushiyachishkamunda
3 Ñukuchida Manduj Jesucristoj Taita Diosta ʻAllimi ganguiʼ nishunchi.
Paiga ñukuchida llakij Taita,
shinaidi ima tukukish kushiyachij Diosmi.
4 Ima tuki llakibi gajkunada,
ñukuchi Diosmunda japishka kushin kushichichunmi,
Diosga tuki jatun llakigunamunda ñukuchida kushiyachin.
5 Ima layami Cristoj llakiguna ñukuchin manchanaidi gagun,
shinaidimi Paimunda,
kushigunaga manchanaidi ñukuchin gan.
6 Ñukuchi manchanaidi llakigunada apagushkaga,
kanguna kushiyachun shinaidi kishpichishkaa gachunmi gan.
Ñukuchida kushichishkaga kangunada kushichichun ñukuchi layaidi jatun llakigunada apagushkabiga na shaikushalla alli jinchiguna gachunmi gan.
7 Ima layami ñukuchij llakigunabi ganguichi,
shinaidimi ñukuchij kushibi kushiyanguichi.
Shinada yachushkamunda kanguna jinchi katinadaga crinchimi.
8 Wauki paniguna,
Asia llaktabi jatun llakigunada ñukuchi japishkada yachachunmi munanchi.
Na aguantibuj manchanaidi llakigunada apagushaga ʻÑa na kausashunchuʼ yuyaganchimi.
9 Shinushaga wañuchun kachushka layami sintiganchi.
Ñukuchillabidijka ama yuyisha,
ashtangarin wañushkagunada kausachij Diosbi yuyida churachunmi shina tukushka.
10 Wañuna jatun llakimundami Diosga ñukuchida kacharichiga,
shinaidi kacharichinga.
Shinushaga ʻKacharichigungallamiʼ nisha chi yuyinmi katigunchi.
11 Shina gachunga kangunashmi ñukuchimunda Diosta mañusha ayudagunguichi.
Taugaguna ñukuchimunda mañakiga Diosbuj alligunada ñukuchi japishkamunda taugaguna Diosta ʻDiosolopaiʼ ningaguna.
Pablo imamunda Corintomu na rishkamunda
12 Ñukuchij shungu yuyishkaga kai pachabi,
yallidijka kangunapurabi gasha,
Dios kushka alli linshuyachishkan na llullasha kausushkada rikuchin.
Na gentegunaj yachashkan,
ashtangarin Dios kushka alligunanmi shina rurashkada rikuchinchi.
Shinushkamundaga mejordi kushiyanchimi.
13-14 Kangunamu kachagushka cartabiga ima na liyi pudinada shinaidi na intindiribujtaga na escribishkanchichu.
Kanguna ñukuchida ashada intindishka shinalla Manduj Jesús shamibi ima laya ñukuchi kangunamunda kushiyanada shinaidi kangunash ñukuchimunda kushiyi pudinadaga illujta intindichunmi munani.
15-16 Kaida alli yuyashkamundami kanguna ishki kutin kushiyachunga kangunajmundi chayungu munugani.
Macedonia llaktamu rishaga kangunajmundi chayushka k'ipa Macedoniamu risha,
kutin kangunajmu chayuki,
ñuka Judea llaktamu rinabi ayudasha kachachun yuyagani.
17 Shina ñuka ringu munashaga ¿nij tukushallachu rurashkani?
¿Aicha munushka layallachu chi ratulladi “Ari” “Na” nishkada yuyanguichi?
18 Diosga ima layami p'aktachij gan,
shinaidimi ñukuchish kangunamu ʻAriʼ nishkash ʻNaʼ nishkash na nishkallachu.
19 Ñukaga Silvanon Timoteonbish kangunapurabi gashaga Diosbuj Churi Jesucristomunda parlaganchi.
Paiga “Ari” “Na” na nijchuga,
ashtan Pai “Ari” nishkada p'aktachijmi.
20 Imallada Dios ʻKushamiʼ nishkagunaga,
Cristobimi p'aktun.
Chimundami Diosta jatunyachishka gachun Cristo Jesusbuj shutibi ʻShina gachunʼ ninchi.
21 Ñukuchidash kangunadash Cristobi jinchiyachigujka,
Diosmi gan.
Pai ñukuchida ch'ikunyachishaga
22 ʻÑukajmi ganguiʼ nisha selloda churasha,
Pai ima kumbidana gashkada rikuchingub ñukuchij shungubi Paibuj Espirituda churaga.
23 Ñuka kangunada ama llakichingu nishallami Corinto pueblomu narij kutin rini.
Chidaga ñuka kausida rijsij Diosga yachunmi.
24 Crishkamunda kanguna jinchi shayarijkuna gashkamundaga ʻKashna chashna crichiʼ nisha mandungujka na ganchichu,
ashtangarin kushillaguna gachunmi ayudangu munanchi.c