Crijkunamu kachangaj kuchkida tandushkamunda
16
1 Linshuyachishkagunamu kuchkida tandusha kachanamundaga Galacia llaktabi kaibi chaibi tandanukushkagunamu ñuka yachachishka layaidi rurichi.
2 Ñuka kangunajmu chayuki ama tandachigungujka tuki semanaj kallari p'unllabi kanguna mashnalla ganashkamunda asha kuchkida kungujka wakichisha churichi.
3 Shinami ñuka chayashaga mashna kuchki tandachishkada japisha cartada rurusha kanguna agllushkaguna Jerusalén pueblomu apachun kachushami.
4 Ñukash rina alli gakiga igulda rishunllami.
Pablo maimu rinada yuyashkamunda
5 Kangunajmu rishaga Macedonia llaktadami rina gani;
chida pasushka k'ipaga kangunajmunga chayashami.
6 Asha p'unllagunada na gashaga tamia p'unllaguna pasungama kangunan sakirishachari.
Chi k'ipaga ñuka maimu rina gashkabi ayudanguichi.
7 Kununga rikusha pasungujllaga na munanichu,
ashtangarin Manduj Jesús munakiga tauga p'unllagunadami kangunan gasha nini.
8-9 Jesusbujta alli p'aktachisha rurachun punguguna illujta paskashkamundami taugaguna ñukada p'iñakish Pentecostés pishta p'unllagamami Éfeso pueblobi sakirisha.
10 Timoteo kangunajmu chayukiga pai kushiyachun alli japibanguichi;
paiga ñuka layaidi Manduj Jesusbujta rurajmi.
11 Shinaki,
maijinbish paidaga ama yangabi churanguichichu.
Waukigunandijmi chapaguni.
Pai ñukajmu kushilla shamuchun ayudabanguichi.
12 Wauki Apolostaga kaishuj waukigunan kangunada rikungu richun nisha kutin kutin mañakish na risha nigachu.
K'ipa p'unllami ri pudishaga ringa.
Alli yuyigunada kushkamunda
13 Chapariajkuna,
crishkabi jinchi katijkuna,
k'ari k'ariguna,
vincijkunash gaichi.
14 Imada rurashabish k'uyin rurichi.
15 Wauki paniguna,
Acaya llaktabi Estéfanas paibuj familiandij kallari crij tukushkada shinaidi crijkunamu paiguna sirvisha katigushkadash yachunguichimi.
16 Shinusha paiguna laya rurujkunada shinaidi mashnalla trabajajkunada ayudajkunadash kazuchunmi kutin kutin rugani.
17 Estéfanas,
Fortunato,
Acaicosh chayamukimi k'uilla kushiyagani.
Kanguna illasha na kui pudishkadami paigunaga kuga.
18 Paigunami kangunaj ñukajkish espirituda k'uilladij kushiyachiga.
Shina ayudajkunadaga ʻAllidami rurashkanguichiʼ nishkagunami gana gan.
Tukurina yuyigunamunda
19 Asia llaktabi kaibi chaibi tandanukushka crijkunaga saludogunada kachan.
Aquilash Priscilash paigunaj wasibi tandanukushka crijkunash Manduj Jesusbuj shutibi kushilladi saludangunami.
20 Tuki wauki panigunami kangunada saludan.
Linshuyachishka yuyin muchasha saludanukubanguichi.
21 Kai saludashkadaga ñuka Pablomi kikin makindi escribisha kachani.
22 Maijinsh Manduj Jesucristoda na k'uyujka llakichishka gachun.
¡Manduj,
shamubai!
23 Manduj Jesucristoj kushka alliguna kangunabi gachun.
24 Tuki kangunadaga Cristo Jesusbuj k'uyinmi k'uyani.