“Diosllada kazushunchi,” nishkamunda
10
1 Wauki paniguna,
ñukuchij ñauba taitaguna p'uyu llandubi gashkadash jatun yaku kuchada tukiguna ch'imbushkadash ama kungarichunmi munani.
2 Shinushami p'uyubish,
jatun yaku kuchabish bautizarishaga tuki paiguna Moiseskun shujlla tukugaguna.
3 Shinaidi tukigunami Dios kushka mikunada mikugaguna.
4 Tukigunami chi espiritullamunda ubianada ubiagaguna.
Paigunan igulda riguj rumi espiritumundami ubiagaguna.
Chi rumiga Cristomi.
5 Shina gashash chaubi yalliguna Diosta na kushiyachishkamunda shitashka pushtubi wañusha chutalla sakirishka.
6 Kai tuki tukushkagunaga ñukuchish ama paiguna laya na allida munachunmi shina rikuchigun.
7 Paigunapuramunda shujkuna laya rurushka dioskunada ama adorichichu.
Dios escribichishkabiga,
“Gentegunaga mikungu ubiungu tiyariga.
Chi k'ipaga paigunaj milli munigunan kushiyangumi jatarigaguna,”
a nin.
8 Paigunapuramunda shujkuna laya ama piyunbish siririjkuna gashunchi.
Shina rurushkamundami shuj p'unllallabi ishki chunga kinsa warangaguna (23.000) wañuga.
9 Shinalladi Mandujtaga paiguna shina ama p'iñachisha na kazujkuna tukushunchi.
Paigunadaga culebraguna wañuchiga.
10 Diosta p'iñusha ama rimichichu paigunapuramunda maijinguna laya.
Shina rimushkamundami tukuchishtaj ángel wañuchiga.
11 Ñauba taitaguna yuyachun kai tuki llakiga tukuga,
shinaidi ñukuchimu ʻP'aktaʼ nisha yachachingujmi escribichisha sakishka.
Kai tukuri p'unllagunaga ña ñukuchimu chayamun.
12 Shinakiga maijinsh ʻJinchi shayarijminiʼ yuyajka p'akta amadij urmachun.
13 Kangunaga na alli muniguna shamuki pi gente na api pudibuj llakigunadaga na apushkanguichichu.
Diosga p'aktachijmi;
shinushaga kanguna na apibuj llakida apachunga na sakinga,
ashtanbish na alli muniguna shamukiga Dioslladimi llujshinada kunga.
Rurashka dioskunada sakinamunda
14 Shinusha k'uyushka wauki paniguna,
rurushka dioskunada yuyarinamunda anchurichi.
15 Kangunaga ña yachujkuna gakimi ñuka nishka alli na alli gashkada kangunaidi rikuchun nini.
16 Diosta ʻDiosolopaiʼ nisha copabi gaj vinoda ubiashaga Cristoj yaurgun shuj shinalla tukunchi.
Tandada chaubisha mikushash Cristoj cuerpon shuj shinalla tukunchi.
17 Taugaguna gashash chishuj tandallada tukiguna mikushkamundaga shuj cuerpollami tukunchi.
18 Israelgunada alli yuyarichi.
Animalda wañuchisha,
Diosmu kusha altarbi rupachishka aichada mikujkunaga tukimi Dioskunga shuj shinalla tukunguna.b
19 Shina nishaga chi rurushka dioskuna,
na gashaga chi dioskunamu kushka animalgunaj aichagunaga ʻAlligunamiʼ nishaga na ninichu.
20 Ashtangarin kaidami nini:
Diosta na kazujkunaga animalgunada wañuchisha Diosmunga na kunchu;
ayagunamumi kun.
Kanguna ayagunan tandanukuchunga na munanichu.
21 Kangunaga Manduj Jesusbuj vino vazomundash ayagunaj vazomundash na ubyi pudinguichichu.
Shinaidi Manduj Jesusbuj mezabish ayagunaj mezabish na gai pudinguichichu.
22 ¿Manduj Jesustachu p'iñachinguc mununchi?
¿Paida yalli jinchigunachu ganchi?
Na watashka shina ganamunda
23 Maijingunaga,
“Tukida ruri pudinchimi,”
ninga;
shinash tukiga na allibuj ganchu.
Maijingunaga,
“Tukida ruri pudinchimi,”
ninga;
shinash jinchi crijkunadaga na ruranchu.
24 Pish na kikin alli gangu,
ashtangarin shujkuna alli gachunmi mashkachun.
25 Aicha k'atubi imalla k'atushkada,
kikin yuyibi ʻ¿Allichu?
¿Na allichu?
ʼ nisha na tapushalla mikichilla.
26 “Kai pachash tuki kaibi imalla tiyashkash Manduj Diosbujmi,”
d gashkamundami kashna niguni.
27 Maijin na crij,
kangunada mikuchun kayukiga rish nishaga richilla.
Imalladash mikuchun kushkadaga kikin yuyibi ʻ¿Allichu?
¿Na allichu?
ʼ nisha na tapushalla mikichilla.
28 Na gashaga maijinsh,
“Kai aichaga rurushka dioskunamu kushkami gan,”
nikiga chi parlujta shinaidi yuyida ama pandachingujka ama mikunguichichu.
29 Kashna nishaga na kambuj yuyibi,
ashtangarin parlujbuj yuyibi ima tiyashkamundami niguni.
Ñuka na watashka shina gasha imadash rurajta rikushae shujkunaj yuyashkan juchachichunga na munani.
30 ʻDiosolopaiʼ nisha ñuka mikushkamundaga ¿ima nishadi Diosta mañusha mikushkamundaga ñukada juchachingari?
31 Shinakish kanguna mikushash,
ubiashash,
imada rurushash Dios jatunyachishka gachun rurichilla.
32 Israelgunadash,
na israelgunadash,
Diosbuj tandanukushka crijkunadash ama trankarisha urmachinguichichu.
33 Ñukaga tukigunan alli gangumi shina tukida rurani.
Ñukaj alli ganadaga na mashkanichu,
ashtan taugagunaj allibuj shinaidi kishpichishka gachunmi shina rurani.