Kallari CORINTIOS
Pablo saludashkamunda
1
1 Dios munushkamunda Jesucristoj agllusha kachushka gachun kayashka Pablomi,
wauki Sosteneskun,
2 Cristo Jesusbi ch'ikanyachishkaguna Corinto pueblobi Diosbuj iglillamua escribini.
Tukiguna maibi gashash ñukuchij Manduj Jesucristoj shutibi kayasha mañajkunandijmi kangunaga Diosbuj linshuguna gachun kayashkaguna ganguichi.
Mandujka paigunakish ñukuchikishmi.
3 Ñukuchij Taita Diosbuj shinaidi Mandaj Jesucristoj kushka allish k'uilla kausish kangunabi gachun.
ʻDiosolopaiʼ nishkamunda
4 Ñukaj Diostaga Paibuj kushka alligunada Cristo Jesusmunda kangunamu kumbidashkamundaga p'unllandijta ʻDiosolopaiʼ nigunillami.
5 Shinusha Paibuj tuki alli parlushkagunan shinaidi tuki yachushkagunanbish manchanaidi charijkuna tukushkanguichi.
6 Shina Cristomunda ñukuchij parlushkaga kangunabi alli rikurishkami,
7 yallidika ñukuchij Mandaj Jesucristo shamunada chapariajkunamu Espíritu kumbidashkaga imash na faltanchu.
8 Ñukuchij Mandaj Jesucristo shamuki kangunada ima juchachinash illuj gachunga kai pacha tukuringama jinchi shayarisha alli katichun Diosga ayudangami.
9 Diosga Pai ʻRurushamiʼ nishkadaga p'aktachijmi.
Pailladimi Paibuj Churi ñukuchij Manduj Jesucriston shujlla tukusha kausachun kangunada kayuga.
Crijkunapura p'iñanukushkamunda
10 Wauki paniguna,
tukigunalladij shuj shinalla parlanukushaga ama chaubiringuichichu,
ashtangarin tukiguna shuj shinalla,
shuj yuyilla tukusha kausachunmi ñukuchij Manduj Jesucristoj shutibi kutin kutin mañani.
11 Ñuka wauki paniguna,
kangunapurabi p'iñanuki tiyashkada Cloej familiamundaguna parluki yachani.
12 Kangunaga,
“Ñukaga Pabloda katijmi gani,”
shujkunaga,
“Apolosta katijmi gani,”
kaishujkunaga,
“Ñukaga Cefasta katijmi gani,”
kutin shujkunash,
“Ñukaga Cristoda katijmi gani,”
nigujta uyani.
13 ¿Cristoga chaubirishkachumadi gan?
¿Pablochu kangunamunda chakatashkaga?
na gashaga ¿Pabloj shutibichu kangunaga bautizashkanguichi?
14 ¡Kangunadaga maijindash na bautizashkamundaga Diosta ʻDiosolopaiʼ ninimi.
Crispoda shinaidi Gayolladami bautizagani!
15 Shinushaga maijinsh ʻPabloj shutibimi bautizashka ganiʼ ningujka na pudingachu.
16 Shinash Estefanasbuj familiadash bautizaganimi;
kutin shujkunada bautizashkadaga na yuyarinichu.
17 Cristoga ñukadaga bautizachunga na kachugachu,
ashtangarin Alli Shimida parlachunmi kachuga.
Cristo cruzbi wañushka ama yanga rikurichunmi ñukaga gentegunaj jatun yachushka shimigunanga na parlanichu.
Cristoga Dios pudinada yachanadash rikuchishkamunda
18 Chingarijkunamunga Cristo cruzbi wañushkada parlushkaga imakish na sirvij yangallami gan,
ashtanbish ñukuchi kishpichishkagunamunga kai parlushkaga Diosbuj podermi gan.
19 Shinakiga Dios escribichishkabiga,
“Jatun yachujkuna yachushkadaga chingachishami.
Alli yuyiyujkunadash yuyi illujkunadami rurasha,”
b nishka tiyagun.
20 Jatun yachujkish,
manchanaidi yachachijkish,
kai pachabi ima tukushkada parlujkish ¿maibishi gan?
¡Diosga kai pachabi imadash yachujkunadaga imakish na sirvij yanga muspagunada rurushka!
21 Shinusha Diosga,
yachuj gashkamundaga kai pachabi kausujkuna kikin yachushkan Paida rijsichunga na sakigachu.
Chimundami shujkunamu kai parlushka imakish na sirvij yanga laya gakish ashtan chiyunmi Diosga Paida crijkunada kishpichingu munuga.
22 Israelgunaga pi na ruri pudishka señalgunadami rikush ninguna,
shinaidi griegogunaga jatun yachigunadami mashkunguna.
23 Ashtan ñukuchiga chakatashka Cristomundami parlagunchi.
Kaida parlushkaga israelgunamunga litushkami gan;
c kutin na israelgunamunga imakish na sirvij yangallami.
24 Shina gakish Dios kayashkagunamunga israel gakish,
griego gakish,
kai Dios agllusha kachushka Mesiasga Diosbuj tuki ruri pudinada shinaidi alli yachaj gashkadash rikuchijmi gan.
25 Shinusha Diosmunda yachanaga na sirvij nishka gashash gentegunaj yachanadaga yallimi.
Shinaidi Dios rurashkaga na valij gashash gentegunaj rurashkadaga tukida yallimi.
26 Wauki paniguna,
kanguna ima layaguna gaki Dios kayashkada yuyarichiri.
Gentegunaj yuyashkabiga ashagunallami yachujkuna,
na taugaguna imadash ruri pudijkuna shinaidi valichishka familiamundash na gaganguichichu.
27 Ashtan Diosga yachujkunada pinganaibi sakingajmi kai pachabi ʻNa yachujkunachuʼ nishka gentegunada aglluga.
Shinaidi manchanaidi rurajkunada pinganaibi sakingajmi kai pachabi imadash na ruri pudijkunada aglluga.
28 Shinaidi ʻ¡Alligunami ganchi!
ʼ nijkunada na valichingumi kai pachabi yanga nishka,
p'iñushka,
imash na gaj gentegunada Diosga aglluga.
29 Shina rurukimi Diosbuj ñaubukiga ʻYalli ganiʼ ningujka pish na pudinga.
30 Ashtan Diosmundami kangunaga Cristo Jesuskun tandachishka ganguichi.
Pailladimi kangunadaga Paimunda yachujkunada,
kabishkagunada,
Paibujlla gachun linshushkagunada,
shinaidi randisha kishpichishkagunada ruruga.
31 Chimundami escribichishkabi nishka shinaga,
“Maijinbish jatun tukusha parlujka,
ashtan Mandaj Diosmunda jatun tukusha parlachunlla.”d